گۇلىم دوسماعانبەتوۆا ەڭبەك جولىن 1975 جىلى ماتەماتيكا ءپانىنىڭ مۇعالىمى بولىپ باستاعان. بۇگىندە ەڭبەك ءوتىلى – 48 جىل. تۋعان جەرىنە تۋ تىگىپ, ەلىنىڭ ەلۋلىسى, حالقىنىڭ قالاۋلىسى بولىپ, قاسيەتتى قورعالجىن جەرىندە ۇزاق جىل ۇستازدىق ەتتى.
2005 جىلدان بەرى استانا قالاسىنداعى ءبىلىم بەرۋ سالاسىندا وزىندىك ورنى بار مەكتەپتىڭ ءبىرى – №4 قازاق مەكتەپ-گيمنازياسىندا ماتەماتيكا مەن فيزيكا ءپانى مۇعالىمى بولىپ قىزمەتىن جالعاستىردى. 2010-2011 وقۋ جىلىنان باستاپ استانا قالاسىنداعى №64 مەكتەپ-ليتسەيدە ديرەكتوردىڭ وقۋ-تاربيە ءىسى جونىندەگى ورىنباسارى بولىپ ەڭبەك ەتىپ, 2021 جىلى زەينەتكە شىقتى.
№64 مەكتەپ-ليتسەي ەلىمىزدە «100 مەكتەپ, 100 اۋرۋحانا» باعدارلاماسى بويىنشا سالىنعان ەلورداداعى جاڭا مەكتەپتەردىڭ ءبىرى ەدى. اشىلعانىنا ساناۋلى عانا جىلدار بولسا دا, جاس ۇرپاق تاربيەلەۋدەگى مەكتەپ ۇجىمىنىڭ تابىسى قوماقتى بولدى. گۇلىم التايقىزى ءوزىنىڭ تاباندىلىعى مەن ەڭبەكقورلىعىنىڭ ارقاسىندا تاڭ اتقاننان كۇن باتقانعا دەيىن تابانىنان تىك تۇرىپ, وسى مەكتەپتىڭ الدىڭعى قاتاردان كورىنۋىنە بار كۇش-جىگەرىن سالدى. ءار ۋاقىتتا, وسى كۇندەردە دە ارىپتەستەرىنە, ءىزىن باسقان جاس ماماندارعا دا ايتارى مول, بولىسەر ويى مەن تاجىريبەسى جەتەرلىك. ۇستازداردىڭ ۇستازى اتانىپ, ارىپتەستەرى دە ەرەكشە قۇرمەت تۇتادى.
قاي جەردە جۇرسە دە گۇلىم التايقىزى ءوزى قالاپ, تاڭداپ العان ۇستازدىقتىڭ اششى دا ءتاتتى ءدامىن تەرەڭ سەزىنىپ, ماڭداي تەرىمەن ەڭبەك ەتتى. الدىنداعى شاكىرتتەرىن قىراننىڭ بالاپانىنداي باۋلىپ, ءبىلىم نارىمەن سۋسىنداتتى, تۋرا جولدى نۇسقادى. 48 جىلداعى ەڭبەك جولىندا قانشاما شاكىرتى ءوز كەزىندە ءپان وليپيادالارىندا, عىلىمي جوبالار سايىسىندا جۇلدەرى ورىندارعا يە بولدى. 2008 جىلدان بەرى قالالىق, رەسپۋبليكالىق ءپان وليمپياداسىندا وقۋشىلارى جوعارى دارەجەلى ديپلوممەن ماراپاتتالىپ, ۇستاز ابىرويىن اسىردى. ۇستاز ءتالىمىن كورگەن قانشاما شاكىرتى ومىردەن ءوز ورنىن تاۋىپ, ەل تانىعان ازامات بولىپ, ەڭبەگىمەن ەل تۇرمىسىن جاڭارتۋدا.
«ءومىردىڭ ەڭ ءبىر قىزىعى – ول ءتالىم-تاربيە بەرۋ» دەپ ۇلى ۇستاز ءال-فارابي ايتقانداي, قاي ورتادا ءجۇرىپ ەڭبەك ەتسە دە ىستەگەن ءىسى, توككەن تەرى مەن ەڭبەگى تەككە كەتكەن جوق. ەڭبەگى ەلەۋلى ەل سىيلايتىن تۇلعا بولدى. جاس بۋىنعا ماتەماتيكا ءپانىن مەڭگەرتۋدىڭ شىعارماشىلىق جولدارى, جاڭا تەحنولوگيالارمەن جۇمىس ىستەۋ تاسىلدەرى تۋرالى ءتۇرلى تاقىرىپتا سەمينار, كونفەرەنتسيادا ءىس-تاجىريبەسىمەن ءبولىستى. ۇستازدىق «ماتەماتيكا ساباقتارىنا ينتەراكتيۆتى تاقتانى قولدانۋدىڭ ءتيىمدى تاسىلدەرى», «وقۋشى شىعارماشىلىعىن دامىتۋدا دەڭگەيلىك تاپسىرمالاردى قولدانۋ», «لوگيكالىق ەسەپتەر شىعارۋ ارقىلى وقۋشىلاردىڭ ويىن دامىتۋ» تاقىرىبىنداعى ءىس-تاجىريبەلەرى, ساباق ۇلگىلەرى ءتۇرلى ادىستەمەلىك باسىلىمداردا جارىق كوردى. جالپى ورتا ءبىلىم بەرەتىن مەكتەپتىڭ 7-سىنىبىنىڭ گەومەتريا وقۋلىعىمەن ديداكتيكالىق ماتەريالدار جيناعىنىڭ, 12 جىلدىق ءبىلىم بەرۋدەگى 8-سىنىپ گەومەترياسى باعدارلاماسىنىڭ اۆتورلىق قۇرامىندا, مۇعالىمنىڭ ستاتۋسى جونىندە زاڭ جوباسىن دايىنداۋ بويىنشا جۇمىس توبىندا بولدى. ماتەماتيكانىڭ قىر-سىرىن مەڭگەرۋدەگى ءىس-تاجىريبەسى بۇگىندە جاس ۇستازدارعا ۇلگى. وسى سالاداعى ەڭبەگى ەلەنىپ, 2010 جىلى استانادا وتكەن 51-حالىقارالىق ماتەماتيكالىق وليمپيادا قارساڭىندا «استانا دارىنى» وڭىرلىك عىلىمي-پراكتيكالىق ورتالىعى شىعارعان «ماتەماتيكا – مەنىڭ ءومىرىمنىڭ ءمانى» اتتى ءبىلىم سالاسىنا ەڭبەگى سىڭگەن ماتەماتيكا ءپانىنىڭ مۇعالىمدەرى تۋرالى مالىمەتتەر جيناعىنا ەنگىزىلدى, اۋداندىق, قالالىق, رەسپۋبليكالىق اكىمدىكتەر مەن ءبىلىم سالاسىنىڭ ماراپاتتارىمەن, 1994 جىلى «قازاقستان رەسپۋبليكاسى ءبىلىم بەرۋ ءىسىنىڭ ۇزدىگى» توسبەلگىسىمەن ماراپاتتالدى.
بالا كەزدەن بويعا بىتكەن قايسارلىق پەن تىنىمسىز ەڭبەك ۇستاز انانى قاشاندا سىنعا سالىپ شىنىقتىردى. سودان دا بولار, ءبىر باسىنا سوزگە تاپقىر شەشەندىك, توگىلگەن شەبەر كۇيشىلىك, قوڭىر داۋىستى انشىلىك, ەشكىمدى جاتىرقامايتىن باۋىرمالدىق قاسيەتتەردى جيعان ۇستازدىڭ ونەگەلى ءومىرى كەيىنگى جاستارعا ۇلگى.
ۇستاز ونەگەسىنە ءبىز دە قوسىلىپ, بۇگىندە ەڭبەگىنىڭ زەينەتىن كورگەن ۇستاز-اناعا وسى ءبىر ءساتتىڭ قۋانىشىنا بولەنىڭىز, شاڭىراعىڭىزدان شاتتىق ارىلماسىن دەگىمىز كەلەدى. شاكىرتتەرىڭىز ءوز ۇستازىن ەسكە الىپ, ساعىنسا, بۇل دا ەڭبەكتىڭ ەش بولماعانى. اتالارىمىز «راحات ىزدەسەڭ بەينەتىنە, باقىت ىزدەسەڭ ازابىنا شىدا» دەگەندەي, ماڭداي تەرمەن اتقارعان ەڭبەكتىڭ جەمىسى دە مول بولسىن دەپ تىلەيمىز!
جانات تابىسپاەۆا
