ەلوردادا «مەرەيلى وتباسى-2024» ۇلتتىق بايقاۋىن وتكىزۋدى ۇيىمداستىرۋ جونىندەگى قالالىق كوميسسيانىڭ وتىرىسى ءوتتى, دەپ حابارلايدى astana-akshamy.kz/
مۇندا كوميسسيا مۇشەلەرى وتباسىلىق قۇندىلىقتاردى دارىپتەۋگە جانە وتباسى ينستيتۋتىن ارتتىرۋعا باعىتتالعان ۇلتتىق بايقاۋعا باق سىناۋعا ءوتىنىم بەرگەن وتباسىلاردىڭ ىشىنەن ۇزدىگىن تاڭداۋ ءۇشىن قۇجاتتارمەن تانىسىپ, بەينە روليكتەردى قارادى.
كوميسسيا مۇشەلەرى ۇزدىك وتباسىلاردى تاڭداۋ كەزىندە ولاردىڭ ارقايسىسىنىڭ جەتكەن جەتىستىكتەرىنە, وتباسىلىق داستۇرلەرى مەن ۇلتتىق قۇندىلىقتارعا ءمان بەردى.
ودان بولەك, وتباسى مۇشەلەرىنىڭ قابىلەتى مەن دارىنى دا نازاردان تىس قالمادى. بوس ۋاقىتىن ءتيىمدى وتكىزۋ, سالاۋاتتى ءومىر سالتىن ۇستانۋ, ۆولونتەرلىك, قايىرىمدىلىق ىستەرى دە تاڭداۋ كەزىندە ەسكەرىلدى.
“كوميسسيانىڭ ءاربىر مۇشەسى وتباسىلاردى بالدىق جۇيە بويىنشا باعالايدى. بالداردىڭ جالپى سانى تەڭ بولعان جاعدايدا تۇپكىلىكتى شەشىم اشىق داۋىس بەرۋ ارقىلى قابىلدانادى. كەيىن كوميسسيا شەشىمىنىڭ نەگىزىندە جەڭىمپاز وتباسىلارعا «مەرەيلى وتباسى» ۇلتتىق كونكۋرسىنىڭ لاۋرەاتى اتاعى بەرىلەدى”, – دەدى استانا قالاسى اكىمدىگى ىشكى ساياسات باسقارماسىنىڭ ۇكىمەتتىك ەمەس سەكتورمەن جۇمىس ءبولىمىنىڭ باسشىسى ايدانا قامزاەۆا.
كونكۋرستىڭ نەگىزگى ماقساتتارى – وتباسى ينستيتۋتىن, ادامگەرشىلىكتى نىعايتۋ, جاۋاپتى نەكەنىڭ ماڭىزدىلىعىن مويىنداۋ; اتا-انالاردىڭ بالا تاربيەسىندەگى جاۋاپكەرشىلىگىن ارتتىرۋ; وتباسىلىق قۇندىلىقتاردى, كامەلەتكە تولعان بالالاردىڭ ەڭبەككە جارامسىز جانە قارت اتا-انالارعا قامقورلىعىن ناسيحاتتاۋ; قازاقستاندىق وتباسىنىڭ وڭ ءيميدجىن ناسيحاتتاۋ.
بيىل 238 وتباسى كونكۋرسقا قاتىسۋ ءۇشىن قۇجاتتار تاپسىردى. ەڭبەك پەن سپورتتا, شىعارماشىلىق جانە زياتكەرلىك سالالاردا, عىلىم مەن ونەردە جەتىستىكتەرى بار وتباسىلار, سونداي-اق قوعامدىق پايدالى قىزمەتكە بەلسەندى ارالاساتىن وتباسىلار, كوپبالالى وتباسىلار, ەرەكشە بالالارى بار وتباسىلار, ارداگەرلەر, ەڭبەك ادامدارى جانە شىعارماشىل اۋلەتتەر قاتىسىپ وتىر.
كوميسسيا وتىرىسىنان سوڭ قالالىق كەزەڭنىڭ جەڭىمپازدارى بەلگىلى بولادى. ۇزدىك دەپ تانىلعان وتباسى رەسپۋبليكالىق كەزەڭگە جولداما الادى. ال قالالىق كەزەڭنىڭ سالتاناتتى ماراپاتتاۋ ءراسىمى استانا كۇنى قارساڭىندا وتكىزىلەدى.
ايتا كەتەيىك, «مەرەيلى وتباسى» ۇلتتىق بايقاۋى قازاقستاندا 2013 جىلدان باستاپ جىل سايىن وتكىزىلىپ كەلەدى.
