قالالىق ءماسليحاتتىڭ ءماجىلىس زالىندا ەلوردانىڭ قوعامدىق كەڭەسىنىڭ وتىرىسى ءوتتى. جيىندا «استانا قالاسىنداعى ادىستەمەلىك ورتالىق» مەكەمەسىنىڭ قىزمەتى تۋرالى ەسەپ تىڭدالدى.
كۇن تارتىبىندەگى ءبىرىنشى ماسەلە بويىنشا قالالىق ءبىلىم باسقارماسىنىڭ باسشىسى قاسىمحان سەنعازىەۆ بايانداما جاسادى. قازىرگى ۋاقىتتا استانادا 32 كوللەدج, ونىڭ ىشىندە 9 مەملەكەتتىك, 23 جەكەمەنشىك كوللەدج جۇمىس ىستەيدى. ولاردا 35 923 وقۋشى, ونىڭ ىشىندە مەملەكەتتىك ءبىلىم بەرۋ تاپسىرىسى بويىنشا 20 289 (56%) وقۋشى ءدارىس الىپ جاتقانىن ايتا كەلە, باسقارما باسشىسى قالاداعى ءار مەكەمە ءوز مۇعالىمدەرىن اتتەستاتسيادان وتكىزىپ وتىرۋى كەرەگىن جانە ەلورداداعى مەكتەپتەردى اتتەستاتتاۋ, مەملەكەتتىك اتتەستاتتاۋدىڭ ناتيجەلەرى تۋرالى ماسەلەگە توقتالدى. ودان ءارى استانا قالاسى اكىمدىگىنىڭ «ادىستەمەلىك ورتالىق» مكقك باسشىسى سىندار داۋەشوۆا بايانداما جاسادى.
سونداي-اق, «2024-2028 وقۋ جىلدارىنا تەحنيكالىق جانە كاسىپتىك, ورتا بىلىمنەن كەيىنگى ءبىلىمى بار كادرلاردى دايارلاۋعا ارنالعان مەملەكەتتىك ءبىلىم بەرۋ تاپسىرىسىن بەكىتۋ تۋرالى» قۇجات تالقىلاندى. باسقارما باسشىسىنىڭ ايتۋىنشا, جاڭا كاسىپتەر كارتاسىنا سايكەس, الداعى 3-7 جىلدا ەڭبەك نارىعىنا كىرەتىن بىرقاتار جاڭا كاسىپتەردىڭ: ونلاين وقىتۋ بويىنشا تيۋتور, ينكليۋزيۆتى ءبىلىم بەرۋ بويىنشا مامان, كوممۋنالدىق جىلجىمايتىن مۇلىكتى باسقارۋشى, قۇرىلىستاعى ساپانى باسقارۋ جونىندەگى مامان, قۇرىلىس تەحنولوگى-يننوۆاتور, BIM-تەحنولوگيالاردى ەسكەرە وتىرىپ, جىلجىمايتىن مۇلىكتى پايدالانۋ جونىندەگى مامان, تسيفرلىق كوممەرتسيا جانە تولىقتىرۋ ورتالىقتارىنىڭ لوگيستيكا مامانى, اۆتوموبيل ديزاينەرى-جوندەۋشىنىڭ پايدا بولۋى بولجانۋدا. جىل سايىن ەرەكشە ءبىلىم بەرۋ قاجەتتىلىكتەرى بار مەكتەپ تۇلەكتەرىنىڭ سانى ارتىپ كەلەدى, وسىعان بايلانىستى ارنايى ينكليۋزيۆتى توپتاردا كادرلار دايارلاۋعا مەملەكەتتىك تاپسىرىس ءوسىپ, 4 كوللەدجە ءۇش ماماندىق بويىنشا 74 ورىن ءبولىندى. ەكونوميكا سالالارىندا تەحنيكالىق جانە كاسىپتىك ءبىلىم بەرۋ كادرلارىن دايارلاۋدى جۇيەلەۋ, سونداي-اق ەلوردالىق كوللەدجدەردى زاماناۋي ءبىلىم بەرۋ ينفراقۇرىلىمىنا اينالدىرۋ ماقساتىندا ولاردى جوسپارلى بەيىندەۋ جۇرگىزىلۋدە. اتالعان قاۋلىنى قوعامدىق كەڭەس مۇشەلەرى ءبىراۋىزدان ماقۇلدادى.
وتىرىستىڭ كۇن تارتىبىندە بەلگىلەنگەن ماسەلەلەر بويىنشا سىندارلى ۇسىنىستار ەنگىزىلدى.
