نەسيە قىمباتتاپ بارادى

قازاقستاندىقتار بانكتەن نەسيە العاندا, كەيىن قارىزىن قاي پايىزبەن وتەيتىنىنە ءمان بەرۋى كەرەك.

قر ۇلتتىق بانكىنىڭ مالىمەتىنشە, 2024 جىلعى ساۋىردە تەڭگەمەن بەرىلگەن نەسيەلەر بويىنشا ونىڭ ورتاشا ءمانى 20,8 پايىزعا جەتتى. ءبىر ايدا بۇل كورسەتكىش 0,8 پايىزدىق تارماققا ءوستى.

ناۋرىزدا ول 20 پايىز, ال اقپان ايىندا 18,7 پايىز عانا بولعان ەدى. باسقاشا ايتقاندا, ورتاشا پايىزدىق ءوسۋ جالعاسۋدا. بۇل – كوپتەگەن جىلدار ىشىندەگى ەڭ جوعارى ءمان.

ۇلتتىق بانكتىڭ ستاتيستيكالىق مالىمەتتەرىنە سايكەس, تەڭگەمەن بەرىلگەن نەسيەلەر بويىنشا ەڭ جوعارى ورتاشا پايىزدىق مولشەرلەمە 2015 جىلعى اقپاندا عانا (21,4 پايىز) تىركەلدى. ايتا كەتەرلىگى, ول بازالىق مولشەرلەمەنىڭ تومەندەۋىن توقتاتا تۇرۋ جانە قازاقستاندىق بانكتەردەگى تەڭگەلىك دەپوزيتتەر بويىنشا سىياقى مولشەرىنىڭ ازايۋى اياسىندا وسۋدە.

الايدا نەسيە شارتتارىنا بايلانىستى مولشەرلەمەلەر ءتۇرلى بولۋى مۇمكىن ەكەنىن تۇسىنگەن دۇرىس. ماسەلەن, ساۋىردە ەڭ جوعارى پايىزدار تەڭگەلىك قارىزدار بويىنشا بولدى, ولار 1 ايعا دەيىنگى مەرزىمگە بەرىلدى – جىلدىق مولشەرلەمەسى 33,8 پايىز.

ودان كەيىنگى ورىندا 1 ايدان 3 ايعا دەيىنگى مەرزىمگە بەرىلەتىن نەسيەلەر – 24,8 پايىز, ال قىمباتتىلىعى بويىنشا ءۇشىنشى ورىندا 1 جىلدان 5 جىلعا دەيىنگى مەرزىمگە بەرىلەتىن نەسيەلەر – 21,5 پايىز.

5 جىلدان جوعارى مەرزىمدەر بويىنشا ورتاشا مولشەرلەمە 20,1 پايىز, ال مەرزىمى 3 ايدان 1 جىلعا دەيىنگى نەسيەلەر ەڭ ارزان بولىپ شىقتى – 19 پايىز.

شەتەل ۆاليۋتاسىندا بەرىلگەن نەسيەلەرگە كەلەتىن بولساق, ولار ءبىر ايدا ايتارلىقتاي ارزاندادى – ولاردىڭ ورتاشا نارىقتىق مولشەرلەمەسى جىلدىق 5 پايىزدان 4,8 پايىزعا دەيىن تومەندەدى. وسىلايشا قازىرگى ۋاقىتتا نەسيە نارىعىندا شارتتار تۇتىنۋشىلار ءۇشىن بىرتە-بىرتە قاتاڭداتىلىپ جاتىر.

بۇل بولاشاقتا نەسيە الۋدىڭ تومەندەۋىنە اكەلۋى مۇمكىن, دەگەنمەن ەلدە ءبىرىنشى توقساندا كەپىلسىز تۇتىنۋشىلىق نەسيەلەرگە سۇرانىستىڭ ايتارلىقتاي وسكەنى بايقالدى.