ەلوردانىڭ «نۇرلى جول» ۆوكزالىندا بەس ميلليونىنشى جولاۋشى انىقتالىپ, ونى تەمىرجولشىلار سالتاناتتى تۇردە قۇتتىقتادى, دەپ حابارلايدى astana-akshamy.kz.
«نۇرلى جول» تەمىرجول ۆوكزالىندا بيىلعى جىلدىڭ باسىنان باستاپ «جولاۋشىلار تاسىمالى» اق پويىزدارىمەن جولعا شىققان بەس ميلليونىنشى جولاۋشىنى قۇتتىقتاۋ ءراسىمى ءوتتى. بۇل مەرەيتويلىق بيلەتتىڭ يەسى 11 جاسار ايلينا ەرعالي ءۇشىن كۇتپەگەن توسىنسىي بولعانى انىق. قىز بالا اناسى قارلىعاش ەرعاليەۆامەن بىرگە الماتىدان استاناعا №3/4 پويىزىمەن كەلگەن بولاتىن.
ۇلتتىق تاسىمالداۋشىنىڭ وكىلدەرى بەس ميلليونشى جولاۋشىعا جۇمساق ويىنشىق, iPad گادجەتى, سىمسىز قۇلاققاپ پەن اناسىنا گۇل شوقتارىن تابىس ەتتى.
«بۇل ءبىز ءۇشىن كۇتپەگەن توسىنسىي بولدى. پەرروندا ءبىزدى كوپتەگەن ادامدار قارسى العانىن كورگەندە, مەن قوبالجىعان بولاتىنمىن. بىراق وسىنداي كەرەمەت سىيلىقتار الامىن دەپ ويلاماپپىن. ءبىزدىڭ وتباسىمىز پويىزبەن ساياحاتتاۋدى جاقسى كورەدى, ال بۇل ساپاردى مەن ءومىر بويى ەستە ساقتايمىن. ۇيىمداستىرۋشىلارعا ۇلكەن العىس بىلدىرەمىن,» – دەپ, ايلينا ەرعالي اسەرىمەن ءبولىستى.
ۇلتتىق تاسىمالداۋشى جىل سايىن تەمىرجول قىزمەتتەرىن تاڭداعانى ءۇشىن العىسىن ءبىلدىرۋ ماقساتىندا ميلليونشى جولاۋشىنى انىقتاۋدى جاقسى داستۇرگە اينالدىردى.
