استانادا جۋرناليست بايان بۇلعاقباەۆانىڭ «قايتا ورالماس ءومىر» اتتى جاڭا كىتابىنىڭ تۇساۋكەسەرى ءوتتى.
بايان قۇرمانتايقىزى ۇزاق جىل قاراعاندى وبلىستىق «ورتالىق قازاقستان» گازەتىندە, ساكەن سەيفۋللين اتىنداعى قازاق تەاترىنىڭ ادەبيەت بولىمىندە ەڭبەك ەتتى. قازىر باس قالادا تۇرادى.
بايان بۇلعاقباەۆانىڭ (لاقاپ اتى باياندى ءالپي) «قايتا ورالماس ءومىر» كىتابى ءوزى ءومىر ءسۇرىپ وتىرعان جىلدارداعى جانىنداعى قۇربى-دوستارىنىڭ, تۋىسقاندارىنىڭ باسىنان وتكەن, ياعني ومىردە بولعان وقيعالار جەلىسىمەن جازىلعان اڭگىمەلەر مەن نوۆەللالاردان تۇرادى, ەسسەلەرى دە بار. ءبىر ەرەكشەلىگى, ءوزى ەكى تىلدە بىردەي جازاتىن قالامگەر.
شىعارماشىل جاننىڭ بۇعان دەيىن بىرنەشە كىتابى جارىق كورگەن. «تامشى», «جانىم مەنىڭ اقىن با؟» ولەڭدەر توپتاماسى – اتا-اناسى مەن تۋعان جەرگە, تابيعاتقا, ال «جۇرەك سىرى» پوۆەسى جاستايىنان جەتىم قالعان ەڭبەك ادامىنا ارنالعان.
تۇساۋى كەسىلگەن كىتاپتا ەرەكشە اسەر قالدىرعان «ءبىر كەم دۇنيە», «جان دوسىم» اڭگىمەلەرى – ومىردەن الىنعان كوركەم دۇنيەلەر. اۆتوردىڭ سول سياقتى دىنمۇحامەد قوناەۆپەن, شىڭعىس ايتماتوۆپەن كەزدەسۋى, باسقا دا ونەر تارلاندارى تۋرالى ەستەلىگى وتە جىلى جازىلعان. جۋرناليست الماتىدا جازۋشىلار وداعىندا قىزمەت ىستەپ جۇرگەندە اتاقتى اقىن-جازۋشىلارىمىز عابيت مۇسىرەپوۆ, سول جىلدارداعى قازاقستان جازۋشىلار وداعىنىڭ توراعاسى ءادي ءشارىپوۆ, قابدىكارىم ىدىرىسوۆ, ءسابيت مۇقانوۆ پەن باۋىرجان مومىشۇلى تۋراسىندا ەستەلىكتەر جازعان. كەرەمەت ويمەن قاعاز بەتىنە تۇسكەن مۇقاعالي ماقاتاەۆ جايلى اڭگىمەسى دە اسەرلى شىققان. قورىتا ايتقاندا, باياندى ءالپيدىڭ «قايتا ورالماس ءومىر» اتتى اڭگىمەلەر جيناعى – اينالامىزدا جۇرگەن ادامداردىڭ تاعدىرى. اركىم وزىنە ۇقساس ادامداردى وسىنداعى اڭگىمەلەردەن تابادى. كىتاپتىڭ ءتىلى كوركەم, جاتىق, وقۋعا جەڭىل.
عاليا بالتاباي,
«قۇرمەت» وردەندى جۋرناليست
