قازاق پوەزياسىنا نازىكتىك پەن بيازىلىق اكەلگەن مارفۋعا بەكتەمىروۆا تۋعان جەرىن ءسۇيدى, كەربەز دە سۇلۋ كوكشەتاۋدى, جەر ءجانناتى بۋرابايدى, اسقاق وقجەتپەستى, تىلسىم جۇمباقتاستى, سۋى ءموپ-ءمولدىر ايناكولدى جىرعا قوستى. سوسىن دا ەلىن سۇيگەن پەرزەنتىن جەرلەستەرى ۇمىتپاي, قادىرلەيدى. اقمولا وبلىسىنداعى بۋراباي اۋدانىنىڭ ورتالىعى ششۋچە قالاسىنداعى ءبىر كوشەگە اقىن ەسىمىنىڭ بەرىلۋى – سونىڭ جارقىن ايعاعى.
قالاداعى جوعارى پەداگوگيكالىق كوللەدجدىڭ ءماجىلىس زالىندا قازاقتىڭ كورنەكتى اقىنى, قوعام قايراتكەرى مارفۋعا بەكتەمىروۆا كوشەسىنىڭ اشىلۋ سالتاناتى ءوتتى. ءىس-شاراعا بۋراباي اۋداندىق, قالالىق اكىمدىكتىڭ قىزمەتكەرلەرى, ارداگەرلەر, مۇعالىمدەر, كوكشەتاۋ, استانا قالالارىنان كەلگەن اقىن-جازۋشىلار, باق وكىلدەرى قاتىستى.
– حالقىمىزعا ادال قىزمەت ەتىپ, مادەنيەتىمىز بەن ادەبيەتىمىزدى دامىتۋعا زور ەڭبەك سىڭىرگەن قايراتكەرلەرىمىزدىڭ, اسىلدارىمىزدىڭ ەڭبەگىن ءبىز ەشقاشان ۇمىتپاي, ەستە ساقتاۋىمىز كەرەك. بۇل وسكەلەڭ ۇرپاقتى پاتريوتتىق رۋحقا, ادامگەرشىلىككە, مەيىرىمدىلىككە, جاقسىلىققا تاربيەلەۋگە كومەكتەسەدى. قالامىزداعى ءبىر كوشەنىڭ تالانتتى اقىن مارفۋعا بەكتەمىروۆا ەسىمىمەن اتالۋىنىڭ ءوزى زامان مەن ۇرپاقتىڭ اجىراماس بايلانىسىن تاعى ءبىر مارتە كورسەتەدى. اقىن ومىردەن ەرتە كەتسە دە, ءوزىنىڭ ويشىل دا جاقۇت جىرلارىمەن حالىق جادىندا ماڭگىلىك ساقتالادى دەپ سەنەمىن, – دەدى ششۋچە قالاسىنىڭ اكىمى اسحات مۇحامەدجانوۆ.
ەندى بۋراباي اۋدانىنىڭ ورتالىعى ششۋچە قالاسىنداعى بۇرىنعى ەمەليان پۋگاچەۆ كوشەسى مارفۋعا بەكتەمىروۆا ەسىمىمەن اتالادى. بۇل كوشە شاھاردىڭ ءبىر شەتىندەگى كوكشەتاۋ تاۋىنىڭ ەتەگىنەن باستالىپ, ۆوكزالعا دەيىن ۇزىننان ۇزاق سوزىلىپ جاتىر.
جيىندا اقىننىڭ جارى, جازۋشى ەسەنگەلدى ءسۇيىنوۆ وسى ءىس-شارانى ويداعىداي وتكىزۋگە بەلسەنە اتسالىسقاندارعا وتباسى, تۋعان-تۋىسقاندار اتىنان العىس ايتتى. ءىس-شارادا مارفۋعا بەكتەمىروۆانىڭ سىرشىل ولەڭدەرى وقىلدى, سوزىنە جازىلعان جانە ءتول اسەم اندەرى ورىندالدى. «جان-دۇنيەمنىڭ جاڭعىرىعى» اتتى كىتاپ كورمەسى ۇيىمداستىرىلدى.
اقەركە بازارعاليەۆا,
ل.گۋميلەۆ اتىنداعى ۋنيۆەرسيتەتىنىڭ ستۋدەنتى
