باس قالادا قازاقستاننىڭ حالىق ءارتىسى, مەملەكەتتىك سىيلىقتىڭ لاۋرەاتى نۇرجامال ۇسەنباەۆانىڭ شىعارماشىلىعىنا ارنالعان I حالىقارالىق ۆوكالدىق ونەر بايقاۋى ءوتتى. ايتۋلى ونەر دوداسىنا الەمنىڭ تۇكپىر-تۇكپىرىنەن تالانتتى جاستار باعىن سىناۋعا كەلدى. بايقاۋدى استانا قالاسى اكىمدىگىنىڭ قولداۋىمەن ەركەعالي راحماديەۆ اتىنداعى مەملەكەتتىك اكادەميالىق فيلارمونيا ۇيىمداستىردى.
جاھاندانۋ داۋىرىندە زاماناۋي وتاندىق مادەنيەتتى ىلگەرىلەتۋ, ۇلتتىق ۆوكالدىق مەكتەپتىڭ داستۇرلەرىن ساقتاۋ, دامىتۋ جانە ارتتىرۋدى ماقسات ەتكەن بايقاۋعا 20-35 جاس ارالىعىنداعى الەمنىڭ كەز كەلگەن ەلىنىڭ كاسىبي ۆوكالمەن ءان ايتاتىن ونەرپازدار قاتىستى.
تالانتتى جاستاردىڭ جولىن اشاتىن بايقاۋ جەڭىمپازدارى وپەرا تەاترلارىندا ونەر كورسەتىپ, ۇلكەن ساحنادا العاشقى قادامىن جاسايدى, جەكە ورىنداۋشىلىق ەرەكشەلىگىن, مۋزىكالىق جانە ارتىستىك قابىلەتىن شىڭداۋعا مۇمكىندىك الادى. بايقاۋدىڭ قازىلار القاسى الەمدىك كلاسسيكاداعى كاسىبيلىگى جوعارى جانە كورنەكتى ساحنا شەبەرلەرىنەن قۇرالعان.
بايقاۋ كەزەڭدەرى ە.راحماديەۆ اتىنداعى مەملەكەتتىك اكادەميالىق فيلارمونيانىڭ كامەرالىق جانە كونتسەرت زالدارىندا ءوتتى. ونەر دوداسى اياسىندا قازىلار القاسى مۇشەلەرىنىڭ شەبەرلىك ساباقتارى جوسپارلانعان.
نۇرجامال ۇسەنباەۆانىڭ I حالىقارالىق ۆوكالدىق ونەر بايقاۋى 2024 جىلعى 4 ماۋسىمدا جەڭىمپازدار مەن قازىلار القاسى قاتىساتىن سالتاناتتى گالا-كونتسەرتپەن اياقتالدى. بايقاۋدىڭ جالپى جۇلدە قورى 13 200 000 تەڭگە بولسا, ونىڭ ىشىندە گران-پري جۇلدەسى 5 ميلليون تەڭگەنى قۇرادى.
مىڭنان جۇيرىك شىققان جەڭىمپازدار – بايقاۋدىڭ لاۋرەاتتارى مەن ديپلومانتتارى «استانا وپەرا» مەملەكەتتىك وپەرا جانە بالەت تەاترىنىڭ ارنايى سىيلىعىنا يە بولدى, ياعني ۇزدىك تانىلعاندار ك.بايسەيىتوۆا اتىنداعى كامەرالىق زالدىڭ ساحناسىندا 2024 جىلعى 5 ماۋسىمدا ۇلكەن ساحنادا ونەر كورسەتەدى.
