ونەر – جالپىعا ورتاق, ەشقاشان مۇقالمايتىن, ماڭىزىن جويمايتىن, جۇرەك تۇكپىرىنەن ورىن الىپ, جان تەبىرەنتەتىن ەرەكشە قۇبىلىس. ونىڭ سان ءتۇرلى تارماعى ءتۇرلى جانردى قامتيدى. وسكەلەڭ ۇرپاقتى جاستايىنان ونەرگە باۋلۋ ورەسى كەڭ, وركەنيەتتى ەلدىڭ سانالى تۇرعىندارىنىڭ سانىن ارتتىرارى ءسوزسىز.
ساحنا – كيەلى ۇعىم. ونىڭ وزىندىك مادەنيەتى, ءتارتىبى مەن تالعامى بار. ورەندەردىڭ ونەرىن ورگە ءجۇزدىرۋ ءۇشىن ەڭ الدىمەن ساحنا مادەنيەتىنە باۋلىپ, ادەپتىلىكتىڭ ماڭىزىن دارىپتەۋىمىز قاجەت. اسىرەسە تەاتر ساحناسىندا ءمۇلت كەتۋگە جول جوق. مەن اتالمىش سالانىڭ مامانى رەتىندە ءبىلىم الۋشىلاردىڭ بارىنشا ونەرگە دەگەن قۇرمەتىن قالىپتاستىرۋدى العاشقى ورىنعا قويامىن. سەبەبى ءوز ىسىنە, اينالاسىنا سىيلاستىقپەن قاراعان ادام شىعارماشىلىقتى شىڭداپ قانا قويمايدى, ونى جان دۇنيەسىمەن ۇعىنىپ, وزگەلەرگە دە دارىتۋعا تىرىسادى.
تەاتر – جاندى كينو ءتارىزدى. وقيعانىڭ بار بولمىسى ساحنادا كورىنىس تابادى. قويىلىمنىڭ كورەرمەننىڭ جۇرەگىنە جول تابۋى, جالپاق جۇرتتىڭ ونەرگە دەگەن كوزقاراسى اكتەرلەردىڭ شەبەرلىگىنىڭ ۇيلەسىم تابۋىنا تىكەلەي بايلانىستى. سوندىقتان ساحنا مادەنيەتىن ۇستانعان جانداردىڭ بويىندا ۇلكەن جاۋاپكەرشىلىك جۇگى بار ەكەنىن سەزىندىرۋ قاجەت.
وقۋ مەن تاربيە ەگىز ۇعىم ەكەنىن ەسكەرسەك, وقۋشىلاردىڭ جاۋاپكەرشىلىگىن ارتتىرۋ بارىسىندا دايىندىقتى سەبەپسىز بوساتپاۋىن قاداعالاۋ قاجەت. ساحنانىڭ ءار دەتالى, ءار ءساتى تالقىلانىپ, الدىن الا پىسىقتالاتىن تۇستا قويىلىمعا قاتىساتىن وقۋشىلاردىڭ ساباقتى سەبەپسىز بوساتۋى ولقىلىقتىڭ ورىن الۋىنا نەگىز بولارى انىق. سوندىقتان جاس ارتىستەردىڭ ونەرگە دەگەن كوزقاراسىن قالىپتاستىرۋ بارىسىندا ونىڭ ماڭىزىن دارىپتەپ وتىرۋ كەرەك.
ارينە, ساحنادا بوي كورسەتىپ, جالپاق جۇرتتىڭ الدىندا ونەر كورسەتۋ وڭاي ەمەس. بۇل, ۇلكەن جاۋاپكەرشىلىك پەن دايىندىقتان بولەك, بالالاردىڭ ءوز-وزىنە دەگەن سەنىمدىلىگىن بايقاتادى. قوبالجۋ, قورقىنىش سەزىمىنىڭ بويدى بيلەۋى – زاڭدى قۇبىلىس. دەگەنمەن بۇل ۇلكەن ەڭبەكتى جوققا شىعارىپ, ءتىپتى تولىق قۇرامنىڭ قانشاما توككەن تەرىنە دە كەدەرگى كەلتىرۋى مۇمكىن. سوندىقتان دارىندىلىقپەن قاتار, ءار وقۋشىنىڭ بويىندا سەنىمدىلىك سەزىمىن قالىپتاستىرۋ اسا ماڭىزدى.
بۇل تالاپتاردىڭ ءبارىن ورىنداپ, ءوزىن ۇزدىك قىرىنان كورسەتىپ جۇرگەن شاكىرتتەر قاتارى جەتىپ ارتىلادى. دەگەنمەن توپ ىشىنەن دارالانىپ شىعىپ, بىردەن كورەرمەن كوزايىمىنا اينالعان, ەڭبەگى مەن ونەرگە دەگەن زور قۇشتارلىعىنىڭ ارقاسىندا بيىك بەلەستەردى باعىندىرىپ جۇرگەن شاكىرتىم اباي جاڭابايدىڭ ورنى تىم ەرەكشە. 2020 جىلدان بەرى ءدارىس الىپ, ساحناعا ابدەن توسەلگەن ونەرپاز وسى جىلدار ارالىعىندا جەتىستىكتەرگە دە جەتىپ ۇلگەردى. ماسەلەن, «Turkestan Music Festival» اتتى حالىقارالىق كونكۋرستا قارسىلاستارىنا دەس بەرمەي, لاۋرەات اتانىپ, ءى ورىندى قانجىعاعا بايلادى. ابايدىڭ بۇل حالىقارالىق دارەجەدەگى جالعىز جەڭىسى ەمەس, الماتى قالاسىندا وتكەن «Almaty Music Festival» بايقاۋىندا دا بيىكتەن كورىنىپ, 1-ورىندى يەلەنگەن بولاتىن. ودان بولەك, رەسپۋبليكالىق بالالار, جاسوسپىرىمدەر جانە ۇستازدار اراسىنداعى «اتا ونەرى – بالاعا مۇرا» اتتى سايىستا دا ءىىى ورىن الدى.
ونەردى جانىنا سەرىك ەتكەن جان سالاۋاتتى ءومىر سالتىن دا ۇنەمى نازاردان تىس قالدىرماي, سپورتتى دا جانىنا سەرىك ەتكەن. «ەركىن كۇرەس» سايىسىندا 30 كەلى سالماق دارەجەسى بويىنشا ءىىى ورىن يەلەنسە, «Adlet Boxing Club» اشىق تۋرنيرىندە قولا مەدالدى قانجىعاعا بايلادى.
ونەرگە قادام باسقان كەزدەن باستاپ العا قويعان ماقساتقا جەتۋ جولىندا تاپسىرمالاردى بۇلجىتپاي ورىنداپ, بار بەيىمى مەن قابىلەتىن جوعارى دەڭگەيدە كورسەتكەن وقۋشىم بيىل قازاق ۇلتتىق ونەر ۋنيۆەرسيتەتىنە «دراما جانە كينو اكتەرى» ماماندىعىنا وقۋعا قۇجاتىن تاپسىردى. مۇنىڭ ءوزى جوعارى جەتىستىك دەپ ويلايمىن. بويداعى قورقىنىشىن سەيىلتىپ, وزىنە دەگەن سەنىمى بەكىگەن شاكىرتىمنەن بولاشاقتا زور ءۇمىت كۇتەمىن!
ۇلپان اسانوۆا,
استانا قالاسى №2 ونەر
مەكتەبى تەاتر ءبولىمىنىڭ مۇعالىمى, ونەرتانۋ
عىلىمدارىنىڭ ماگيسترى
