مۋزىكانىڭ ادام ومىرىنە جاقسى جاعىنان اسەر ەتەتىنى ءسوزسىز. اسىرەسە, بۇكىل ادامزاتتىڭ ورتاق قۇندىلىعىنا اينالعان سيقىرلى سكريپكانىڭ ءۇنى كىم-كىمدى عاجايىپ الەمگە شاقىرعانداي. ول باعدات ءابىلحانوۆتاي مىقتى ماەسترونىڭ ورىنداۋىندا بەرىلسە, ناعىز تاڭعاجايىپتىڭ ءوزى دەۋگە بولادى.
«استانا وپەرانىڭ» كامەرالىق زال ساحناسىندا تەاتردىڭ كامەرالىق وركەسترىنىڭ ورىنداۋىندا, ديريجەر – ايدار ءابجاحانوۆتىڭ جەتەكشىلىگىندە اسقاق ونەردى باعالايتىن جانداردىڭ نازارىنا انتونيو ۆيۆالدي مەن استور پياتستسوللانىڭ «جىل مەزگىلدەرىنە» ارنالعان «كوكتەم», «جاز», «كۇز», «قىس» ايگىلى شىعارمالارىن ۇسىندى. سوليست – وركەستر كونتسەرتمەيستەرى, قر ەڭبەك سىڭىرگەن قايراتكەرى باعدات ءابىلحانوۆ. كونتسەرت باعدارلاماسى «كامەرالىق مۋزىكا كەشى» دەپ اتالدى.
جاڭا جىلدا شىرقالعان مۋزىكا, سازدى سكريپكادان توگىلگەن اۋەن ادام ءومىرىنىڭ بارلىق كەزەڭىن قامتيتىن ماعىنالى شاقتاردى كوز الدىڭا اكەلەدى. ادامنىڭ قۋانعانى, جىلاعانى, شارىقتاپ اسقاقتاعان ساتتەرى مۋزىكا ارقىلى ءساتتى جەتكىزىلەدى. جاڭا جىلدان ادامزاتتىڭ كۇتەرى كوپ, ءۇمىتىن سەنىمگە جالعاپ, سيقىرلى كەش ءبارىن جاقسىلىققا بۇرارداي ىنتىعىپ ارماندايدى, العا ۇمتىلادى.
ءبىر سۇحباتىندا قازاقستاندىق تانىمال سكريپكاشى ب.ءابىلحانوۆ بەتحوۆەن مەن موتسارتتىڭ شىعارماشىلىعىنا تەرەڭ بويلاۋ ارمانىم دەپ ايتقان ەكەن. شىنىندا دا الەمدىك دەڭگەيدە ونەر كورسەتىپ جۇرگەن مۋزىكانت ءۇشىن ءوزىن-ءوزى ارى قاراي جەتىلدىرۋ ماڭىزدى. جەتىستىكتەرمەن عانا توقتاپ قالۋعا بولمايدى, اسىرەسە, اتاقتى موتسارتتىڭ شىعارمالارى ەرەكشە دەيدى ول. موتسارتتى زەرتتەپ جۇرگەن ماماندار ونى سىناق تاپسىرار الدىندا, شىعارماشىلىق شابىت تالاپ ەتكەن كەزدە, جاۋابى جوق شەشىمدەردى ويلاعان كەزدە تىڭداۋ كەرەك دەپ كەڭەس بەرەدى. موتسارتتىڭ كلاسسيكالىق نوتالارى ميدىڭ جۇمىسىن جاقسارتادى دەيدى. ءتىپتى دو-ماجور سوناتاسى ميدى تىنىشتاندىرىپ قانا قويماي, تىڭ سەرپىن بەرسە, رە-ماجور سوناتاسى قازىرگى ەمى جوق كەي اۋرۋدى ەمدەۋگە كومەكتەسەدى دەيدى.
تالعامى بيىك, ونەرى جارقىن باعدات ءابىلحانوۆ قاتىسقان كونتسەرتتەن تىڭ كۇش جيناپ, ميىمىز سەرگىپ, ونەردىڭ قۇدىرەتىنە باس ءيىپ شىقتىق. سونىسىمەن دە ونەر عاجاپ, ماڭگىلىك!
