كەشە ەلورداداعى «كەرۋەن» ساۋدا-ويىن-ساۋىق ورتالىعىندا «قاۋىپسىز ساۋدا» رەسپۋبليكالىق اكتسياسى اياسىندا استانا قالاسى توتەنشە جاعدايلار دەپارتامەنتىنىڭ ۇيىمداستىرۋىمەن ادامدار كوپ شوعىرلاناتىن ورىنداردا ءورت قاۋىپسىزدىگىن ساقتاۋ جونىندە اۋقىمدى الدىن الۋ ءىس-شاراسى مەن ءورت-تاكتيكالىق وقۋ ساباعى وتكىزىلدى.
ساعات تاڭەرتەڭگى 9:15-تە ساۋدا-ويىن-ساۋىق ورتالىعىنىڭ ەكىنشى قاباتىندا شارتتى تۇردە ارناۋلى شتاب قۇرىلىپ, عيماراتتان ادامداردى شۇعىل سىرتقا شىعارۋ, ياعني ەۆاكۋاتسيا باستالدى.
استانا قالاسى توتەنشە جاعدايلار دەپارتامەنتى مەملەكەتتىك ءورت باقىلاۋ باسقارماسى باسشىسىنىڭ ورىنباسارى انار رۇستەموۆانىڭ ايتۋىنشا, مۇنداي وقۋ-جاتتىعۋ ساباعى قالادا ايىنا ءبىر-ەكى رەت ءوتىپ تۇرادى.
– قازىر قالادا ءورت شىعۋ وقيعالارى كوبەيىپ وتىرعانى الاڭداتادى. ونىڭ ادام ءومىرى مەن دەنساۋلىعىنا, قورشاعان ورتاعا جانە ماتەريالدىق قۇندىلىقتارعا ورنى تولماس زيان كەلتىرەتىنى بەلگىلى. سوندىقتان وسىنداي ءورت قاۋىپسىزدىگىن ساقتاۋعا بايلانىستى تاكتيكالىق وقۋ-جاتتىعۋ ساباقتارى جوسپارلى تۇردە جۇرگىزىلىپ كەلەدى. شاھارداعى ءىرى ساۋدا ورىندارىنىڭ ءبىرى – «كەرۋەندە» وسىنداي ءىس-شارا ءوتىپ, وعان جەكە قۇرامنىڭ قىزمەتكەرلەرى مەن ارناۋلى جاساق قاتىستى, – دەدى ول.
باستى ماقسات – ءورت شىققان كەزدە ادامداردىڭ وزدەرىن ۇستاۋى مەن ۇرەيگە بوي الدىرماي, جوعارى قاباتتان باسپالداق ارقىلى ءتۇسىپ, تەز سىرتقا شىعۋ. «ەۆاكۋاتسيا, تەز سىرتقا شىعىڭدار!» دەگەن بۇيرىق كەزىندە ساۋدا ورتالىعىنداعى 150-گە تارتا ادام ساناۋلى مينۋتتا سىرتقا شىعىپ ۇلگەردى. ال ىشتە ءورتتى ءسوندىرۋ ءۇشىن سۋ, كوبىك, كومىر قىشقىلى, ينەرتتى گاز, قۇم, ۇنتاق جانە برەزەنت, كيىز, اسبەست سياقتى ءتۇرلى جاپقىش قۇرالدار قولدانىلدى.
«تۇرمىسقا كەرەك زاتتاردى الايىن دەپ ەرتەمەن «كەرۋەن» ساۋدا ورتالىعىنا كىرە قويىپ ەدىم. «ءورت شىقتى, تەز باسپالداقپەن ءتۇسىپ, سىرتقى ەسىككە بەتتەڭدەر!» دەگەندە ابدىراپ قالدىم. جالما-جان تومەن ءتۇسىپ سىرتقا شىقسام, وقۋ-جاتتىعۋ ەكەن. كوڭىلىم ورنىنا ءتۇستى. دۇرىس, قازىر ءورت كوبەيىپ كەتتى. سوندىقتان ساقتانىپ, بارىنە ساقاداي ساي بولعانعا نە جەتسىن!» دەيدى قالا تۇرعىنى ايناگۇل بيشاەۆا.
سونداي-اق بۇل كۇنى ەلوردالىق توتەنشە جاعدايلار دەپارتامەنتى قىزمەتكەرلەرى ءورت قاۋىپسىزدىگى ەرەجەلەرىن ساقتاۋ ماسەلەلەرىنە بايلانىستى قالاداعى حوستەلدەرگە جوسپاردان تىس تەكسەرۋ جۇرگىزدى.
