دۇنيەجۇزىلىك دەنساۋلىق ساقتاۋ ۇيىمىنىڭ مالىمەتىنشە, ءسۋيتسيدتىڭ 800-گە جۋىق سەبەبى بار. ولار ەموتسيالىق كۇيزەلىس, وتباسىنداعى شەشىلمەي جاتقان ءتۇيىندى تۇيتكىلدەر, پسيحيكالىق بۇزىلىس, قارجى تاپشىلىعى سياقتى بولىپ جالعاسا بەرەدى. ءارى بۇل ادامنىڭ جاس ەرەكشەلىگى مەن مىنەزىنە دە بايلانىستى. وعان ومىرىندە ورىن العان وقيعالار دا قاتتى اسەر ەتۋى مۇمكىن.
جان دۇنيە قۇلازىپ, كەۋدەسى بوس قالعانداي كۇي كەشكەندە ادام ىشتەي ۇرەي مەن ءوزىن-ءوزى كىنالاۋعا بوي الدىرادى. ءوزىن ەشكىمگە قاجەتسىز سەزىنىپ, جان جاراسى تەرەڭدەي تۇسەدى. وسىنداي ءتۇپسىز تەرەڭ شىڭىراۋدان شىعۋدىڭ جولى تەك ومىرمەن قوش ايتىسۋ دەپ ءتۇسىنىپ, جاڭىلىس قادامعا باراتىندار ءجيى كەزدەسەدى. اسىرەسە مۇنداي قادامعا پسيحيكالىق اۋىتقۋى بار, ۇزاق ۋاقىت بويى سوماتيكالىق اۋرۋلاردان زارداپ شەگەتىندەر, جاسوسپىرىمدەر مەن قارتتار بەيىم كەلەدى. سونداي-اق ميگرانتتار, قورلىق كورگەن جانە ادىلەتسىزدىكتى باستان وتكەرگەن ادامدار دا ءوز-وزىنە قول جۇمساپ جاتادى. سۋيتسيدتىك ارەكەتتەردى باسقالارعا قاراعاندا ايەلدەر كوبىرەك جاسايدى. نەكەسىز, اجىراسقان, جەسىر قالعان, بالاسىز جانە جالعىز تۇراتىن ادامدار اراسىندا سۋيتسيد جاساۋ دەڭگەيى جوعارى. جاسى بويىنشا ايتاتىن بولساق, 15-24 جاس ارالىعىنداعى جاسوسپىرىمدەر ومىرىندە تۋىنداعان قيىندىقتارعا بايلانىستى وزىنە قول جۇمسايدى. سونىمەن قاتار 40-50 جاس ارالىعىنداعى ەرەسەكتەر مەن 65 جاستان اسقان ادامدار سۋيتسيد جاساۋعا بەيىم كەلەدى. استانا قالاسى بويىنشا 20-29 جاس ارالىعىنداعى جاستار سۋيتسيد جاساۋعا ارەكەت جاسايدى, ءبىر-اق كوپ جاعدايدا دەر كەزىندە كورسەتىلگەن كومەكتىڭ ارقاسىندا امان قالىپ جاتادى. ال 40-49 جاس ارالىعىنداعى ادامداردىڭ مۇنداي ارەكەتى, وكىنىشكە قاراي, قايعىلى اياقتالادى.
ەگەر ءسىز توماعا-تۇيىق, ەشتەڭەگە زاۋقى جوق, ەنجار جۇرگەن تانىسىڭىزدى كەزدەستىرسەڭىز نەمەسە اينالاڭىزداعى ادامداردىڭ بويىنان وسىنداي بەلگىلەردى بايقاساڭىز, ەسكەرۋسىز قالدىرماڭىز. ولارمەن اشىق اڭگىمە جۇرگىزۋ ارقىلى نەگە ءومىر سۇرگىسى كەلمەيتىنى تۋرالى بىلۋگە تىرىسىڭىز. بۇل ارادا جاقىن جاندارىڭنىڭ كۇندەلىكتى مىنەز-قۇلقىندا, قارىم-قاتىناسىندا بايقالاتىن وزگەرىستەرگە ءمان بەرۋ اسا قاجەت. سۋيتسيد اياق استىنان پايدا بولمايدى, ول بىرتىندەپ, ءيمپۋلسيۆتى تۇردە كەلەدى. ياعني ۋشىعىپ تۇرعان جاعدايدىڭ كۇندەردىڭ كۇنىندە جارىلارى ءسوزسىز. سۋيتسيد جاساعانداردىڭ كوبى ءوز ماقساتىن قانداي دا ءبىر تۇردە بىلدىرەدى ەكەن. ولار اشىلىپ اڭگىمەلەسكىسى كەلەدى, بىرەۋدىڭ ونى تىڭداعانىن قالايدى. كەيبىر ءسۋيتسيدتى جوسپارلاعان ادامدار اياق استىنان دوستارىنا, تۋىستارىنا زاتتارىن بەرىپ, سىيلىقتار ۇلەستىرە باستايدى. ءتىپتى ءوزى ءۇشىن قىمبات, قۇندى سانالاتىن زاتتارىن دا وڭاي قيا سالادى. وسىنداي جاعدايلاردى بايقاعان بويدا ول اداممەن اشىق سۇحباتتاسىپ, سىرلاسۋ كەرەك. ەڭ باستىسى, جاناشىرلىق تانىتا سويلەسۋ كەرەك.
قازىر استانادا سۋيتسيد بويىنشا ارنايى قىزمەت تاۋلىك بويى جۇمىس ىستەيدى. وعان ءانونيمدى رەجيمدە كەز كەلگەن ادام جۇگىنە الادى. ەرەسەكتەر مەن جاسوسپىرىمدەرگە ارنالعان ەكى شۇعىل پسيحولوگيالىق كومەك كابينەتى بار. ءوز-وزىنە قول جۇمساۋعا ارەكەت جاسالعاننان كەيىن ادام كوبىنەسە سوماتيكالىق ستاتسيونارعا تۇسەدى. وندا ونىڭ فيزيكالىق جاعدايى قالپىنا كەلگەننەن كەيىن پسيحياتردىڭ دياگنوستيكالىق كەڭەسى جۇرگىزىلەدى. ناتيجەگە بايلانىستى ول شۇعىل پسيحولوگيالىق كومەك كابينەتىنە جىبەرىلەدى. مۇندا دياگنوز قويىلادى, سۋيتسيد قاۋپى باعالانادى. بۇل قادامعا ەكىنشى رەت بارمايتىنىنا كەپىلدىك جوق. سۋيتسيدكە ءبىر رەت ارەكەت جاساعان ادامداردىڭ 10 پايىزى ءوز-وزىنە قايتا قول جۇمساۋ سالدارىنان قايتىس بولادى.
وسى كەلەڭسىزدىكتىڭ الدىن الۋدىڭ بىرنەشە باعىتى بار. باستاپقىسى – ول سۋيتسيدتىك مىنەز-قۇلىقتىڭ پايدا بولۋىن بولدىرماۋعا باعىتتالعان شارالار. ەكىنشىسى – بۇل دارىگەرلەر مەن پسيحولوگتاردىڭ سترەسس كەزىندە پسيحيكالىق ءوزىن-ءوزى رەتتەۋ ءادىسىن يگەرۋ. ءۇشىنشى پروفيلاكتيكا – سۋيتسيدتىك ارەكەتتەردىڭ قايتالانۋىن بولدىرماۋ. مۇنداي جاعدايدا ارەكەت جاساۋشىنىڭ جاقىندارىنا كوپ جاعداي بايلانىستى. وكىنىشتىسى, قوعامدا پسيحولوگ مامانعا تەك پسيحيكالىق اۋىتقۋشىلىعى بار ادامدار عانا جۇگىنەدى دەگەن تۇسىنىك قالىپتاسقان. وسى جاڭساق پىكىردى سانادان شىعارىپ, مامان كەڭەسىنە قۇلاق اسۋ كەرەك. ءسۋيتسيدتىڭ الدىن الۋ ءۇشىن ءبىرىنشى كەزەكتە كۇندەلىكتى قارىم-قاتىناستاعى جاقىن ادامدارىمىزعا جىلى شىراي تانىتىپ, ىشكى جان دۇنيەسىن تۇسىنۋگە تىرىسۋ قاجەت.
ەكاتەرينا ميرونوۆا,
استانا قالاسىنداعى پسيحولوگيالىق كومەك
ورتالىعىنىڭ سۋيتسيدولوگ-مامانى
