“قاراسورا” رەسپۋبليكالىق جەدەل-پروفيلاكتيكالىق ءىس-شاراسى قۇرامىندا ەسىرتكى بار وسىمدىكتەر وسەتىن كەزدە وتكىزىلەدى. ءبىرىنشى ماۋسىمنان بەرى پوليتسەيلەر كۇشەيتىلگەن رەجيمدە قىزمەت اتقارىپ جاتىر. ولار جابايى قاراسورا وسەتىن جەرلەردى, وتىرعىزىلعان پلانتاتسيالاردى انىقتايدى. بۇل ءىس-شارالارعا ءىىم, ۇلتتىق ۇلان, قورعانىس مينيسترلىگىنىڭ ارنايى بولىنىستەرى جۇمىلدىرىلعان, دەپ حابارلايدى astana-akshamy.kz. Polisia.kz سايتىنا سىلتەمە جاساپ.
زاڭسىز ەسىرتكى پلانتاتسيالارى شالعاي جەرلەردە وسىرىلەتىنىن ەسكەرە وتىرىپ, ولاردى انىقتاۋ ماقساتىندا “قازاقستان عارىش ساپارى” اق مۇمكىندىكتەرى پايدالانىلادى.
– قۇقىق قورعاۋ ورگاندارىنىڭ كاننابيس توبىنداعى ەسىرتكىگە دەگەن مۇنداي نازارى جالپى اۋدانى 63 مىڭ گا قۇرايتىن شۋ القابىمەن عانا بايلانىستى ەمەس. قازىرگى ۋاقىتتا باسقا دا وڭتۇستىك وبلىستاردا كريميناليتەت وكىلدەرى ونەركاسىپتىك اۋقىمدا ءۇندى قاراسوراسىن وسىرۋگە تىرىسۋدا. مۇنداي قاراسورا بولاشاقتا ىرگەلەس مەملەكەتتەرگە تاسىمالدانۋى مۇمكىن. سوندىقتان ۇشۋ اپپاراتتارىنىڭ كومەگىمەن دە, جاياۋ پاترۋلدەردىڭ كومەگىمەن دە شالعايداعى اۋماقتارعا بارلاۋ جۇرگىزىپ جاتىرمىز, – دەدى ءىىم ەسىرتكى قىلمىسىنا قارسى ءىس-قيمىل دەپارتامەنتىنىڭ باستىعى قاجىعالي يماجانوۆ.
“قاراسورا” جەدەل-پروفيلاكتيكالىق شاراسىن وتكىزۋدىڭ 10 كۇنىندە رەسپۋبليكا اۋماعىندا 45 ەسىرتكى قىلمىسى انىقتالدى. ونىڭ ىشىندە 8 ەسىرتكى وتكىزۋ فاكتىسى, 9 اسا ءىرى مولشەردە ساقتاۋ فاكتىسى, قۇرامىندا ەسىرتكى بار وسىمدىكتەردى ءوسىرۋدى ۇيىمداستىرۋدىڭ 18 جاعدايى, 9 كونتراباندا فاكتىسى جانە ەسىرتكىنى زاڭسىز ناسيحاتتاۋدىڭ ءبىر فاكتىسى بار. زاڭسىز اينالىمنان 114 كگ ەسىرتكى تاركىلەندى. ونىڭ 6 كەلىدەن استامى سينتەتيكا. جاقىندا عانا جەتىسۋ وبلىسىندا 30 جاستاعى جەرگىلىكتى تۇرعىن ۇستالدى. ونىڭ جازعى اس ۇيىندە ديۆاننىڭ استىنان قىزمەتتىك يت بەس پاكەت گاشيش تاپتى.
تاركىلەنگەن ەسىرتكىنىڭ جالپى سالماعى 4,5 كگ قۇرادى. پەتروپاۆلدا اۆتوكولىكتى جوسپارلى تەكسەرۋ كەزىندە قالا تۇرعىنى ۇستالدى, ونىڭ كولىگىندە 2 كەلىدەن استام گاشيش پەن تراۆماتيكالىق تاپانشا تاركىلەندى. “قاراسورا” ارنايى وپەراتسياسى جالعاسىپ جاتىر. قر ءىىم
