وتكەن عاسىردىڭ توقسانىنشى جىلدارى باسىندا الەمدىك ساياسات ارەناسىندا بۇرىن قاراپايىم جۇرتتىڭ ويىنا كىرىپ تە شىقپاعان نەبىر دۇربەلەڭ, ساياسي وقيعالار ورىن الدى ەمەس پە؟.. سونىڭ ءبىرى جانە ەڭ ناقتى كورىنىسى – مىزعىماس بەرىك دەپ كەلگەن كەڭەس وداعىنىڭ ىرگەسى سوگىلىپ, ىدىراي باستاۋى بولاتىن. كەشەگى بودان ەلدەر تاۋەلسىزدىككە قولدارى جەتكەن سوڭ بىردەن ساياسي-ەكونوميكالىق باعىت-باعدارىن انىقتاپ الا الماي, ابدىراپ قالعانى دا راس. ەلدىڭ وسىنداي داعدارىس پەن كۇيزەلىسكە ۇشىراعان تالاي ساتتەرىندە بيلىك باسىنداعى لاۋازىمدى تۇلعالاردىڭ پاراساتتى كورەگەندىگى مەن ىسكەر بىلىكتىلىگى الىپ شىققاندىعىنا تاريح كۋا. سونداي جەكە تۇلعالار قاتارىندا رەسەيدىڭ ەڭ ۇلكەن ايماقتارىنىڭ ءبىرى – كەمەروۆ ولكەسىنىڭ گۋبەرناتورى, قانداس باۋىرىمىز امانكەلدى مولداعازىۇلى تولەەۆتىڭ ەسىم-سويىن ايرىقشا اتاپ وتكەنىمىز ورىندى.
كوپكە بەلگىلى, XXI عاسىر وزىمەن بىرگە الا قۇيىن داۋىل بولىپ تا كەلدى. عاسىرلار بويى جينالعان الەۋمەتتىك, ەكونوميكالىق, دەموگرافيالىق, تاپتىق, ساياسي, ۇلتتىق, مەملەكەتارالىق قايشىلىقتار شيەلەنىسە ءتۇستى. ول ءبىر قول قۋسىرىپ قاراپ وتىرۋعا بولمايتىن اسا كۇردەلى كەزەڭ ەدى… ەل ءىشىن جايلاعان ۇرگەدەك كوڭىل-كۇيدى شۇعىل, قارقىندى ءارى باتىل تۇردە قولعا العان ءىس-ارەكەتتەر عانا باسا الاتىن ەدى. سول زاماتتا زاماننىڭ ءتول پەرزەنتى امان تولەەۆتىڭ تالانتىنىڭ ءمانى, ونى كۇردەلى ەكونوميكالىق جانە الەۋمەتتىك ماسەلەلەردى شەشۋگە قابىلەتتىگى, سونىمەن قاتار ساياسي جاعىنان جۇزەگە اسىرۋعا بولاتىن شەشىمدەردى قابىلداۋعا دەگەن ايرىقشا سەزىمتالدىعى كورىنىس بەردى.
ول وزگەرىستىڭ كۇشتى كاتاليزاتورى بولدى. تولەەۆتىڭ بويىنداعى ەرەكشە ادامگەرشىلىك قاسيەتتەرى – كۇشتى تەمپەرامەنت, قۋات-جىگەر, ستراتەگتىك كورەگەندىك, قالىپتاسقان جاعدايدى ءدال تۇسىنۋشىلىك, دەر كەزىندە ەسكى مۇرادان باس تارتىپ, وزگەرىس جاساۋ كەرەكتىگىن مويىنداۋ ءتارىزدى قابىلەتتەر باسىم ەدى.
وسى رەتتە ەل پرەزيدەنتى قاسىم-جومارت توقاەۆتىڭ جاقىندا اتىراۋدا وتكەن قۇرىلتايدا ايتقان مىنا ءسوزى ەسكە ورالادى:
«ادال ادام دەگەنىمىز – جاقسى قاسيەتتەرگە يە بولىپ, ادال ەڭبەك ەتەتىن جانە تابىسقا ادال جولمەن جەتەتىن ادام. ءاربىر ادام «ادال ازامات» دەگەن اتقا لايىق بولسا, ەلىمىزدە ءادىل قوعام ورنايدى. «ادال ادام – ادال ەڭبەك – ادال تابىس» ءبىر-بىرىنەن اجىرامايتىن ۇعىمدار» دەپ كورسەتسە, سول تالاپتى جاستايىنان بويىنا سىڭىرگەن, جات جەردە جالىنداي جارقىراپ كورىنگەن امانكەلدى تولەەۆ بولدى. ول ناعىز ادال ادام ەدى, ولاي بولماعاندا, ول ورتادا وعان ورىن جوق ەدى. كەمەر حالقى ونىڭ قولى تازا, ءجۇزى تازا, جۇرەگى تازالىعىنا باس ءيدى, سول ءۇشىن ەرەكشە قولدادى. ءبىز, اعا بۋىن, ونى حالقىمىزعا, جاس ۇرپاققا ۇلگى ەتەمىز.
امانكەلدى تولەەۆ ءوزى ءومىر سۇرگەن ورتادا, حالىق قازىناسىن ەل يگىلىگىنە جاراتۋعا بار كۇش-جىگەرىن جۇمساپ, ادالدىقتىڭ الدىڭعى ساپىنداعى تۇلعا ازامات رەتىندە تانىلدى. ول حالىقتىڭ قالتاسىن قاعىپ, بايلىققا باتقاندارعا قارسى شىعىپ, حالىق مۇددەسىن قورعاي ءبىلدى. سوندىقتان, ول حالىق گۋبەرناتورى دەگەن اتقا يە بولىپ, ۇزاق جىلدار الىپ رەسەيدىڭ ايتۋلى ايماعىن الەمگە تانىتتى. كەيبىر بيلىك ءوز جۇرتىن توناپ, ابىرويلارىن اياق استى ەتىپ جاتقاندا, تۋعان ەلگە كەلىپ, ەڭبەك ەتۋىنە كەدەرگى كەلتىرۋشىلەر ونىڭ تازالىعىنا, ىسكەرلىگىنە تامسانعانمەن, تابالدىرىقتان اتتاۋىنا ىقىلاس بىلدىرمەدى.
امانكەلدى مولداعازىۇلى رەسەي قوعامىندا «جاڭا ەكونوميكالىق باعىت» دەگەن باعدارلامالىق رەفورمالاردىڭ ۇلكەن پاكەتىن دايىنداۋ جونىندە ۇسىنىس جاسادى. ول رەسەي پرەزيدەنتى ب.ەلتسيننىڭ بۇل ۇسىنىسقا نەمقۇرايدى, ءاتۇستى قاراعاندىقتان, ءوز تالاپتارىن اشىق اۋديتورياعا الىپ شىقتى. سول تۇستا ءاربىر گۋبەرناتور ءوز ايماعىنىڭ ءبىر-ءبىر كنيازى ىسپەتتەس ەدى. ولار وزدەرىنە بەرىلگەن بيلىكتەن ايرىلىپ قالماۋدى ويلادى. ال امانكەلدى مولداعازىۇلى حالىق يگىلىگى ءۇشىن ەشتەڭەدەن تايىنبادى. ول حالىق الدىندا اشىق شەشەندىك تىلىمەن دە, سالماقتى پىكىرىمەن دە, ءوز ءيميدجىن قالىپتاستىرعان ساياساتكەر بولدى. سوندىقتان, حالىق ونى «حالىق گۋبەرناتورى» دەپ اتاپ كەتتى.
ءبىز كوبىنە وپپوزيتسيا مەن بيلىك اراسىندا ديالوگتىڭ جوقتىعى, بيلىكتىڭ ديالوگقا كەلۋگە ۇمتىلىسى جوق ەكەنىن اشىق سىنايمىز. بيلىك ءۇشىن قۇرىلعان, جەكەلەگەن تۇلعالاردىڭ مۇددەسى ءۇشىن قىزمەت ەتەتىن ۇيىمدار دا جوق ەمەس ەدى. مىنە, رەسەيدە وسىنىڭ بارىنە قارسى باستاماشى بولعان امانكەلدى مولداعازىۇلى سەمسەر ءسوزدى ماحامبەت باباسى سەكىلدى ساياسات مايدانىندا بوي كوتەردى. وسىلايشا رەسەي بيلىگىنىڭ ونىمەن ساناسۋىنا تۋرا كەلدى.
امانكەلدى مولداعازىۇلى, كانىگى ساياساتكەرلەر تىلىمەن ايتقاندا, ءۇش قاناتتى قايراتكەر ەدى. ءوزىنىڭ ارعى تەگىنەن اجىراماعان ادام – «اسپان ادامى», رۋحاني باستاۋىنان بولىنبەگەن ادام – «قاسيەتتى ادام», شىندىقتان بولىنبەگەن ادام «كەمەل ادام» دەگەن ەكەن (چجان تسزى). ول وسى ءۇش تالاپقا دا جاۋاپ بەرە الدى.
1991 جىلى ساۋىردە كەمەروۆو تەمىرجولىنىڭ كەنشىلەرى مەن جۇمىسشىلارىنىڭ ەڭبەك ۇجىمدارى امان تولەەۆتى رسفسر پرەزيدەنتتىگىنە كانديدات ەتىپ ۇسىنادى. سول جىلعى 12 ماۋسىمداعى داۋىس بەرۋ قورىتىندىسى بويىنشا التى كانديداتتىڭ اراسىنان بوريس ەلتسين, نيكولاي رىجكوۆ جانە ۆلاديمير جيرينوۆسكيدەن كەيىن ءتورتىنشى ورىنعا يە بولۋىنىڭ ءوزى وعان دەگەن حالىقتىڭ سەنىمىن كورسەتەدى.
ماسكەۋدە حالىق اسسامبلەياسى ۇيىمداستىرعان وپپوزيتسيالىق ميتينگىلەرگە قاتىسىپ, پرەزيدەنت بوريس ەلتسيننىڭ باعىت-باعدارىنا قارسى شىعىپ, ەگور گايدار باستاعان رەسەي ۇكىمەتىنىڭ ەكونوميكالىق باعدارلاماسىن سىنادى جانە 1993 جىلى قازاندا پرەزيدەنت پەن جوعارعى كەڭەس اراسىنداعى قاقتىعىس كەزىندە پارلامەنتتى تاراتۋعا قارسى بولدى. ول حالىق دەپۋتاتتارىنىڭ سەزىن ماسكەۋدەن كەمەروۆاعا كوشىرۋدى ۇسىندى. بۇل ونىڭ كوزسىز باتىرلىعى ەدى.
1993 جىلى 12 جەلتوقساندا ا.تولەەۆ № 42 كەمەروۆو قوس مانداتتى سايلاۋ وكرۋگى بويىنشا رەسەي فەدەراتسيا كەڭەسىنىڭ ءبىرىنشى شاقىرىلىمىنىڭ دەپۋتاتى بولىپ سايلاندى. ول اقيقاتتى ايتۋدان قانشاما زاپا شەكسە دە, ودان باس تارتپايدى. ەلتسين بيلىگى تۇسىندا رۋحاني ءومىردىڭ جانە مەملەكەتتىك مودەلدىڭ دۇرىس جۇرگىزىلمەي وتىرعاندىعىن سان مارتە سىناپ, ءوز ويىن اشىق بىلدىرەدى. شەشىم قابىلداۋدا رەسەي ورەسكەل زور قاتەلىكتەرگە بوي الدىرىپ وتىرعانىن ەسكەرتەدى.
1996 جىلى تامىزدا امانكەلدى مولداعازىۇلى ۆيكتور چەرنومىرديننىڭ جاڭا ۇكىمەتىنە قوسىلۋ تۋرالى ۇسىنىستى قابىلدايدى. رەسەي فەدەراتسياسىنىڭ تمد-عا مۇشە مەملەكەتتەرمەن ىنتىماقتاستىق جونىندەگى ءمينيسترى قىزمەتىن اتقارادى. سونىمەن بىرگە ول جەدەل ماسەلەلەر جونىندەگى ۇكىمەتتىك كوميسسيانىڭ مۇشەسى بولدى. امانكەلدى تولەەۆ كەمەروۆو وبلىسىن 21 جىلعا جۋىق باسقاردى. ول سايلاۋدا حالىقتىڭ ەڭ كوپ قولداۋىنا يە بولعان اكىمدەردىڭ ءبىرى بولدى.
2018 جىلدىڭ 1 ساۋىرىندە رەسەي پرەزيدەنتى ۆلاديمير پۋتين تولەەۆتىڭ وتستاۆكاسىن قابىلدايدى. ەكس-گۋبەرناتوردىڭ ايتۋىنشا, ونىڭ وبلىس باسشىسى قىزمەتىنەن كەتۋى تۋرالى شەشىمى كەمەروۆوداعى «زيمنيايا ۆيشنيا» ساۋدا ورتالىعىندا 60 ادامنىڭ ءومىرىن قيعان ورتتەن كەيىنگى ءوز ارى الدىنداعى «دۇرىس شەشىم» بولدى. ودان كەيىن دە حالىقتىڭ ۇسىنىس-تىلەگىنە ساي وبلىستىق دەڭگەيدەگى بىرنەشە لاۋازىمدى قىزمەتتەر اتقاردى.
ول – پرەزيدەنتتىك سايلاۋعا ءۇش رەت كانديدات بولىپ تىركەلگەن تۇڭعىش گۋبەرناتور. ساياساتكەردىڭ كەمەروۆو وبلىسىنىڭ ومىرىندە تۇتاس ءبىر ءداۋىرى قالدى. سونشاما قيىن تالماۋىر كەزەڭدە وعان وت پەن سۋدى بىرىكتىرۋگە تۋرا كەلدى. اپتانىڭ جيىرما ءتورت ساعاتىندا اۋىر ارپالىستا جۇرگەن كەزدەر دە بولدى. سوڭىندا قاتتى سىرقاتقا ۇشىرادى. ونىمەن قوشتاسۋ راسىمىندە ءسوز سويلەگەن رەسەيلىك ساياساتكەرلەر امان تولەەۆتى ءوز قىزمەتىندە ارقاشان حالىق مۇددەسىن ءبىرىنشى ورىنعا قويعان ناعىز حالىقتىق گۋبەرناتور رەتىندە ەسكە الدى. ونى «ىشكى ساياساتتىڭ پاتريارحى», «ءوز اتىن كۋزباستىڭ جانە بۇكىل رەسەيدىڭ تاريحىنا جازعان كوشباسشى» دەپ اتادى. ونىڭ جەكە قاسيەتتەرى ىشىندە تولەەۆتىڭ ادالدىعىن, دانالىعىن ەڭ كۇردەلى ماسەلەلەردى شەشۋگە بولاتىن جوعارعى قابىلەتىن, ادەپتىلىگى مەن ىزگىلىگىن اتاپ ءوتتى.
فەدەراتسيا الدىندا سىڭىرگەن ەڭبەگى ءۇشىن ا.م.تولەەۆ كوپتەگەن ماراپاتتارعا يە بولدى. 2000 جىلى قىركۇيەكتە ۆلاديمير ءپۋتيننىڭ قولىنان «قۇرمەت» وردەنىن الدى, IV, III جانە II دارەجەلى «وتانعا سىڭىرگەن ەڭبەگى ءۇشىن» وردەندەرىمەن ماراپاتتالعان. ول موڭعوليا عىلىم اكادەمياسى ۋلان باتور ۋنيۆەرسيتەتىنىڭ قۇرمەتتى پروفەسسورى, حالىقارالىق اقپاراتتاندىرۋ اكادەمياسىنىڭ جانە حالىقارالىق ينجەنەرلىك اكادەميانىڭ تولىق مۇشەسى, قازاقستان پەداگوگيكالىق عىلىمدار اكادەمياسىنىڭ شەتەلدىك مۇشەسى ەدى.
پەندە ءوز زامانىنىڭ, ۋاقىتتىڭ امىرىنە باعىنباي تۇرا المايدى. كەڭەستىك جۇيەنىڭ ءرولىن ۇستاپ قالعان قۇرىلىم – وزگەلەردىڭ وزىنە قۇل بولۋىن قالادى. ال ناعىز ۇلتجاندى ازامات قۇل بولماق ەمەس. ورمانداي ورىستىڭ اراسىندا قانشا جاۋاپتى قىزمەت اتقارسا دا, تۋعان ەلىنە دەگەن قۇرمەتى, پەرزەنتتىك سەزىم وتى وشكەن ەمەس. ول ءاردايىم قازاققا جۇرەگىنىڭ مايىن شام ەتىپ جاعىپ, تىلەك ەتتى.
مىنانى قاراڭىز… ءبىر كەزدە وگەي اكەسىنىڭ تەگىمەن ۆلاسوۆ بولىپ جازىلماي, ءوزىنىڭ اتاتەگى تولەەۆ بولىپ تانىلعان ونىڭ سوناۋ بالداۋرەن-بالالىق شاعىنىڭ وزىندە قانىنا تارتقان تەكتىلىك جاتىر ەمەس پە؟! ول بۇرىن دا, كەيىن دە قازاق ەلىنىڭ ءبىر قيان شەتىندەگى ماڭعىستاۋ, ءمىرزاشول, شاردارا وڭىرلەرىندەگى اعايىن تۋىس-باۋىرلارىن ىزدەپ كەلىپ, اكە رۋحى, اتا-بابالار رۋحىن ۇلىقتاپ, اراگىدىك ات ءىزىن سالىپ تۇرعانى, سىرتتاي تىلەكتەس قالىڭ قازاق جۇرتىمەن قاۋىشىپ, كوڭىلى مارقايىپ, مارە-سارە بولىپ قايتقانى ەلدىڭ ءالى ەسىندە!..
وسى ولكەنى ءوزىنىڭ تۋعان جەرىندەي كوردى. ەت جاقىن تۋىستارىن دا وسى ولكەدەن تاپتى. ونىڭ كوپ ارالاعان, كوڭىلىن سەرگىتكەن دالاسى دا, جانىنا جالاۋ ىزدەگەندە تىنىشتىق تاباتىن رۋحاني ورتاسى دا وسى توپىراق بولدى.
ۇلت رۋحىنا ءومىرىن ارناعان جاندار – ناعىز باتىرلار. امانكەلدى اعامىز ءوزىنىڭ اتىنا ساي ناعىز رۋحى مىقتى باتىر بولعانىن بايقايمىز. ەگەر ونىڭ رۋحى بولماسا قالىڭ ورىس ۇلتىنىڭ اراسىندا ءجۇرىپ, قول باستاماس ەدى. ول تاۋەلسىزدىك زامانىندا عاسىرلار بويى كىرىپتار بولعان تاريحىمىزعا ءۇڭىلدى, حالقىمىزدىڭ رۋح كۇشىنە باس ءيدى, تاريح قويناۋىنا وي تاستاپ, ۇلىلارىمىزعا كوڭىل قويدى. بۋىرقانىپ-بۇرقانىپ جاۋ اپتىعىن باسا بىلگەن, ۇلتىنا دەگەن ءسۇيىسپەنشىلىگىن ۇرپاعىنا مۇرا ەتكەن اسىل تەكتى اتا-بابالارىمىزدىڭ ەرلىك ىستەرىنەن جىگەر جانىعان كۇش-قۋات الدى. اقيقاتىندا, ءار جاننىڭ ءوز عۇمىرىندا ولشەۋلى باعى مەن مۇڭى بولادى. تاعدىردىڭ ءومىر جولى دا سيرەك توعىسىپ جاتادى. ءبىر نازار اۋدارارلىعى, بيلىك باسىندا جۇرگەن ادامدار ءوز قاسىرەتىن جۇرەك تۇكپىرىنە جاسىرادى. ال وعان ءۇڭىلىپ قاراساڭ, ول بىردە جارقىن, بىردە سۇرقاي, كەيدە بولىمسىز شاراسىزدىقتارعا تولى بولىپ كەلەدى. ءيا, ول مۇنداي ساتتەردى باسىنان سان مارتە وتكىزگەنى انىق. پەندە بولعاسىن, ءىشىڭ جانىپ تۇراتىن كەزدەر دە بولادى. كەيدە ىشكى ەنەرگياڭ ءسونىپ بارا جاتقاندا, ماڭداي تىرەيتىن جاقىنىڭدى ىزدەيسىڭ. وسىنداي ساتتە امانكەلدى اعامىزدىڭ وزىنە رۋحاني تىرەكتى ءوزى اڭساپ كەتكەن تۋعان حالقى مەن قازاق دالاسىنان ىزدەگەنى انىق. سەبەبى ول وزىمەن سۇحبات قۇرعان جۋرناليستكە «ماعان جۇماقتىڭ ءتورى قايدا دەسە – وعان قازاقتىڭ جەرىندە دەپ جاۋاپ بەرەر ەدىم, قازىر قاناتى قايىرىلعان قۇستاي بولىپ وتىرمىن» دەپ ايتپاعان بولار ەدى.
كەيدە قيتۇرقى سۇراقتار قويىپ, بەلگىلى ءبىر ماقساتپەن سىناعىسى كەلگەندەرگە تىكە جاۋاپ بەرۋدەن دە تايسالمادى. «قازاقستاندا الاش ارىستارىنىڭ رۋحى بار, ابايدىڭ رۋحى بار. مەنىڭ اتىمنىڭ ءوزى – قازاق باتىرىنىڭ قۇرمەتىنە قويىلعان» دەپ جاۋاپ بەرۋدەن تارتىنبادى.
ادىلەتتى ادام ارقاشاندا ەشنارسەدەن قايمىقپايدى. ول ۇنەمى قورقىنىشسىز, ادىلەت جاعىندا بولدى. ونى توبىردىڭ ايقايى دا, تيراننىڭ زورلىعى دا ادىلدىك شەڭبەرىنەن شىعۋعا ءماجبۇر ەتە المادى. وعان بىرنەشە رەت قاستاندىق تا جاسالدى. بىراق, قاسكۇنەمدەر ونى العان باعىتىنان تايدىرا المايدى. مۇنداي ازاماتتار ەش ۋاقىتتا تاريحتىڭ ساحناسىنان دا, حالىقتىڭ ساناسىنان دا وشپەيتىنى انىق. شىعىستىڭ ۇلى شايىرى رۋمي: «ۇلى ادامنىڭ بەيىتىن جەر بەتىنەن ىزدەمەڭدەر, ولار ءوز حالقىنىڭ جۇرەگىنە جەرلەنەدى» دەگەن ەكەن. امانكەلدى مولداعازىۇلى كىسىلىگىنە كىر شالدىرماي, ادام دەگەن ۇلى اتقا داق تۇسىرمەي وتكەن, رۋحى بيىك, پاراساتتى الىپ تۇلعا بولاتىن.
تۇلعالارىمىزدىڭ ەسىمىن ۇرپاق جادىنا سالىپ وتىرۋ – ءبىزدىڭ اسىل مىندەتتەرىمىزدىڭ ءبىرى. ول ءبىزدىڭ اتا-بابا جانە وتكەندەر الدىنداعى قاسيەتتى پارىزىمىز بولماق. سوڭىندا وشپەستەي ءىز قالدىرعان جانداردى ايالاۋ, قاستەرلەۋ – وسەر ەلدىڭ تىرلىگى دەپ بىلەمىز. تولەەۆتىڭ كورنەكتى قايراتكەر بولىپ كورىنۋىندە قازاق ەلىنىڭ دە تىلەۋى بار.
امانكەلدى مولداعازىۇلى سياقتى ەسىل ەردىڭ ەسىمىن ەل ەسىندە ساقتاۋ ءۇشىن ءوزى ايانباي ەڭبەك ەتىپ, ماڭدايىنىڭ تەرى سىڭگەن كەمەر ولكەسىندە ءبىر ايتۋلى شارا قابىلدانسا دەگەن تىلەك بار. رەسەي بيلىگى امان تولەەۆ سياقتى ناعىز مەريتوكرات-پاتريوتتى, شىن مانىندەگى مەملەكەت جانە قوعام قايراتكەرىنىڭ رەسەي حالقى الدىنداعى ەڭبەگىن جوعارى باعالاپ, ونى ماڭگى ەستە قالدىرۋ باعىتىندا ءتيىستى ءىس-شارالار قابىلدايدى دەپ سەنەمىز. مۇنداي ساتتە ەردىڭ ارۋاعى دا ريزا, ەلىنىڭ ەڭسەسى دە بيىك بولار ەدى.
بۇل رەتتە ءبىزدىڭ دە جاۋاپكەرشىلىگىمىز بار زاڭدىلىقتى ساقتاي وتىرىپ, استانا, الماتى, شىمكەنت قالالارىندا كوشەلەرگە ەسىمى بەرىلىپ, ەسكەرتكىشىن تۇرعىزۋدى دا قولعا الساق, قۇبا-قۇپ بولار ەدى. بۇل ماسەلەلەردى اتقارۋشى بيلىك ەسكەرەر دەپ ويلايمىز.
ءيا, ۋاقىت وزادى, زامان الماسادى! امانكەلدى مولداعازىۇلى ءوز كىتابىندا جازعانداي, «جەمىستىڭ ءتاتتىسىن حالقىنا بەرىپ, اششى ءدامىن ءوزى تاتقان» ونىڭ جارقىن بەينەسى حالىق جادىنان, ءسىرا, وشپەك ەمەس!..
بەكەت تۇرعاراەۆ,
قازاقستاننىڭ ەڭبەك سىڭىرگەن قايراتكەرى, زاڭ عىلىمدارىنىڭ دوكتورى
