استانادا اۋقىمدى «وپەراليا-2024» حالىقارالىق فەستيۆالى ءوتىپ جاتىر, دەپ حابارلايدى astana-akshamy.kz
ءىس-شاراعا يسپانيا, يتاليا, قازاقستان, قىتاي, رەسەي, تاجىكستان, گرۋزيا, ۋكراينا جانە چەحيادان تانىمال ارتىستەر قاتىسادى. قازاقستاندا ەكىنشى رەت ءوتىپ جاتقان فەستيۆال – وپەرا, بالەت جانە سيمفونيالىق ونەردىڭ كوركەمدىگىن ايشىقتايتىن نەگىزگى مادەني ءىس-شارالاردىڭ ءبىرى.
فەستيۆالدىڭ اشىلۋىندا بەلگىلى يتاليالىق ارتىستەر دەزيرە رانكاتورە, البەرتو گازالە جانە دجۋليو پەلليگرا «استانا وپەرا» سوليستەرىمەن بىرگە وپەرا ونەرى جاۋھارلارىنان اريالار ورىندادى.
«مەن قازاقستانعا كەلگەنىمە جانە وسى ماڭىزدى دەبيۋتتىك قويىلىمعا قاتىسقانىما قۋانىشتىمىن. مەن قازاقستاندىق كورەرمەنگە يتاليالىق وپەرا ارقىلى سۇيىسپەنشىلىك پەن الۋان ءتۇرلى سەزىمدەردى جەتكىزگىم كەلەدى. ءبىز ورىنداعان كەرەمەت رەپەرتۋاردىڭ ارقاسىندا كورەرمەن ساحنادا سومداعان كەيىپكەرلەردىڭ بارلىق كوڭىل-كۇيى مەن ەموتسياسىن تەرەڭ سەزىنە الدى دەپ ۇمىتتەنەمىن», – دەدى دجۋليو پەلليگرا.
ايتا كەتەيىك, بيىل قازاقستان مەن يتاليا اراسىنداعى ءوزارا ىنتىماقتاستىق تۋرالى مەموراندۋم جاسالدى. «وپەراليا» ەكى ەل اراسىنداعى ارتىستەرىمەن ءوزارا الماسۋ جوسپارلارىن ىسكە اسىرۋدىڭ ءبىر بولىگى بولدى. مەموراندۋم قازاق مادەنيەتىنىڭ الەمدىك مادەني كەڭىستىكتە ورنىعۋىنا مۇمكىندىك بەرەدى.
«وپەراليا-2024» اياسىندا «استانا وپەرادا» قىتاي مەن رەسەي ارتىستەرىنىڭ قاتىسۋىمەن گالا-بالەت ءوتتى.
فەستيۆال قازاقستاندىق وپەرا ونەرىن ناسيحاتتايتىن الاڭعا اينالدى. كورەرمەنگە ع.جۇبانوۆانىڭ «ەڭلىك – كەبەك», ە.برۋسيلوۆسكيدىڭ «قىز جىبەك», ە.راحماديەۆتىڭ «الپامىس» جانە «قامار سۇلۋ» وپەرالارىنان ءۇزىندى قويىلدى. قوناقتارعا «تۇران» ەتنو-فولكلورلىق ءانسامبلىنىڭ مۋزىكاسىنا, انۆارا سادىقوۆا مەن المات شامشيەۆتىڭ حورەوگرافياسىنا قويىلعان «جارمەڭكە» جاڭا بي ءنومىرى مەن Steppe Sons فولكلورلىق توبىنىڭ بالاما مۋزىكاسىنا انۆارا سادىقوۆانىڭ «سارماتتىق ابىز ايەل» اتتى تاعى ءبىر قويىلىم ۇسىنىلدى.
ءتۇرلى ەلدەر مەن داۋىرلەردىڭ ونەرىن بىرىكتىرەتىن فەستيۆال 13 شىلدەگە دەيىن جالعاسادى.
