كولىك ءمينيسترى مارات قاراباەۆ ازاماتتاردى جەكە قابىلدادى, دەپ حابارلايدى astana-akshamy.kz
ءوتىنىش بىلدىرۋشىلەر اۋە جانە تەمىرجول كولىگىنە بيلەت ساتىپ الۋ, جاڭا تەمىرجول باعىتتارىن اشۋعا قاتىستى سۇراقتارىمەن جۇگىندى.
ورال قالاسىنىڭ تۇرعىنى «ورال-استانا» باعىتى بويىنشا تالگو پويىزىن ىسكە قوسۋعا قاتىستى سۇراق قويدى. مينيستر بيىل كۇزدە اتالعان باعىت بويىنشا تالگو پويىزى ىسكە قوسىلاتىنىن اتاپ ءوتتى. سونىمەن قاتار بەيىندى مينيسترلىكتىڭ باسشىسى تەمىرجول ۆاگوندارى پاركىن جاڭارتۋ بويىنشا جۇرگىزىلىپ جاتقان جۇيەلى جۇمىستار تۋرالى دا ايتتى. اتاپ ايتقاندا, بيىل 140 بىرلىك جاڭا ۆاگون ساتىپ الىنسا, كەلەسى 2025 جىلى 224 جاڭا ۆاگون ساتىپ الىنادى.
اۋە تاسىمالى بويىنشا ايتا كەتەرلىگى, قازىرگى ۋاقىتتا ورال – استانا باعىتى بويىنشا كوممەرتسيالىق نەگىزىندە «ەير استانا» اۋەكومپانياسى اپتاسىنا 6 رەيس, Fly Arystan لوۋكوستەرى اپتاسىنا 4 رەيس ورىندايدى.
كەزدەسۋدىڭ قورىتىندىسى بويىنشا ءوتىنىش بىلدىرۋشىلەرگە تولىققاندى جاۋاپتار قايتارىلىپ, بىرقاتارى ءمينيستردىڭ جەكە باقىلاۋىنا الىندى.
