استاناداعى «جاسىل بەلدەۋدە» ورمان-دالا ورتتەرىن ءسوندىرۋ بويىنشا ءورت-تاكتيكالىق جاتتىعۋ ءوتتى, دەپ حابارلادى astana-akshamy.kz
وقۋ-جاتتىعۋ شارتتارى بويىنشا دەمالۋعا كەلگەن ادامدار سوندىرمەي, قالدىرىپ كەتكەن وت وشاقتارى قۇرعاق ءشوپتىڭ جانۋىنا سەبەپ بولدى.
ءورتتىڭ ارى قاراي ورمان بەلدەۋىنە تارالۋ قاۋپى تۋدى. وقيعا ورنىنا استانا قالاسىنىڭ توتەنشە جاعدايلار دەپارتامەنتى, پوليتسيا دەپارتامەنتى, اپاتتار مەديتسيناسى ورتالىعى, «استانا ورمانى» جشس, «جاسىل-ايماق» رمم جانە قالانىڭ كوممۋنالدىق قىزمەتتەرى كەلىپ, ءورتتى سوندىرۋگە كىرىستى.
سالدەن سوڭ قاتتى جەل تۇرىپ, سونىڭ سالدارىنان ءورتتىڭ ەلدى مەكەنگە تارالۋى بايقالدى. سوندىقتان ءورت ورنىنا «استانا ورمانى» جشس كومەكشى تەحنيكاسى, ءورت ءسوندىرۋ قىزمەتىنىڭ, قۇقىق قورعاۋ ورىندارىنىڭ كۇشتەرى مەن قۇرالدارى كەلىپ جەتتى.
ءورتتى ءسوندىرۋ بارىسىندا 2 قىزمەتكەر ۋلى گازبەن ۋلانىپ, وندا اپاتتار مەن جەدەل جاردەم مەديتسيناسى ورتالىعىنىڭ بريگاداسى زارداپ شەگۋشىلەرگە العاشقى مەديتسينالىق كومەك كورسەتىپ, جاقىن ماڭداعى اۋرۋحاناعا جەتكىزدى.
ءورت ءسوندىرۋ بولىمشەلەرى ءورت وشاعىنا بارلاۋ جۇرگىزىپ, جەدەل شتاب قۇردى جانە بىرلەسكەن ارەكەتتەردىڭ ناتيجەسىندە ءورتتى جويدى.
شارتتى تۇردە بولعان ءورت وقيعاسىن توتەنشەلىكتەر باقىلاپ وتىردى.
بۇگىن ء«ورت-2024» جىلعى رەسپۋبليكالىق كوماندالىق-شتابتىق جاتتىعۋ اياسىندا استاناداعى «جاسىل بەلدەۋدە» كوماندالىق جاتتىعۋ وتكىزىلدى. جاتتىعۋعا 10-نان استام بولىمشە, جەكە قۇرامنىڭ 75 ادامى جانە 25 بىرلىك تەحنيكاسى قاتىستى. ونىڭ ىشىندە استانا قالاسىنىڭ توتەنشە جاعدايلار قىزمەتكەرلەرى, استانا قالاسىنىڭ اكىمدىگى جانە مەملەكەتتىك كۇشتەر قىزمەتكەرلەرى بار.
جالپى, ءبىزدىڭ تەحنيكالارىمىز ءورت وشاعىنا 10 مينۋت ىشىندە جەتە الادى. قازىر ءورت قاۋپى جوعارى ماۋسىمنىڭ باستالۋىنا بايلانىستى استانا قالاسى اكىمدىگى, «استانا ورمانى» جشس-دەن كۇندەلىكتى 40-تان استام ادام كەزەكشىلىك اتقارادى», – دەدى استانا قالاسى توتەنشە جاعدايلار دەپارتامەنتى باستىعىنىڭ ورىنباسارى ماديار مىرزاگەلديەۆ.
ۇيىمداستىرۋشىلاردىڭ ايتۋىنشا, كۇن جىلىنعاننان كەيىن ادامدار تابيعات اياسىندا دەمالۋعا شىعا باستايدى. الايدا ولاردىڭ نەمقۇرايلى ارەكەتى سالدارىنان دالا مەن ورماندا ءورت تۇتانىپ جاتادى. قۇرعاق ءشوپتىڭ جانۋى ۋاقىتىندا جويىلماسا, ۇلكەن شىعىنعا اكەپ سوعۋى مۇمكىن.
ايتا كەتەيىك, ەلوردادا 8 ساۋىردەن باستاپ ءورت قاۋىپتىلىگىنىڭ جوعارى كەزەڭى باستالدى. وسى كەزەڭنىڭ باسىنان باستاپ قۇرعاق شوپتەر مەن قامىستاردىڭ 15 جانۋى تىركەلدى, ونىڭ جالپى اۋماعى 2 197,5 شارشى مەتردى قۇرادى. تابيعي قوقىس الاڭدارىن جويۋ جۇمىستارى جۇرگىزىلدى جانە 149 گەكتاردان استام قامىس پەن قۇرعاق وسىمدىكتەر شابىلدى.
