بۇگىن استانادا روبوتوتەحنيكادان ورتالىق ازياداعى ەڭ اۋقىمدى دودا Central Asia FIRST Championship چەمپيوناتى اشىلدى. ءۇش كۇن بويى بەس ەلدەن كەلگەن 3 مىڭنان استام مەكتەپ وقۋشىلارى ءوزارا باسەكەگە تۇسەدى, دەپ حابارلايدى astana-akshamy.kz.
بايقاۋعا قاتىسۋشىلار الدىندا ءسوز سويلەگەن ورتا ءبىلىم بەرۋ كوميتەتىنىڭ توراعاسى مينيسترلىكتىڭ STEM ءبىلىم بەرۋدى دامىتۋعا ەرەكشە كوڭىل بولەتىنىن اتاپ ءوتتى.
«مۇنداي بايقاۋلار جاس زەرتتەۋشىلەرگە ءوز الەۋەتىن اشۋعا جانە تەحنيكا, تەحنولوگيا, فيزيكا, ماتەماتيكا سالالارىندا وزدەرىن دالەلدەۋگە كومەكتەسەدى. بۇل الاڭ تاجىريبە الماسۋ, شابىت الۋ جانە وقۋشىلاردىڭ عىلىمي قىزىعۋشىلىقتارىن دامىتۋ ءۇشىن تاماشا مۇمكىندىك. وسى يدەيا ەلىمىزدە روبوتوتەحنيكانىڭ دامۋىنا ۇلەس قوسىپ, قاتىسۋشىلار تاماشا ناتيجەلەرگە قول جەتكىزسىن. بارشاڭىزعا ساتتىلىك تىلەيمىن!», – دەدى قانىبەك جۇماشەۆ.
كونكۋرس الەمدىك FIRST باعدارلاماسى اياسىندا ءۇش جاس كاتەگورياسى بويىنشا وتەدى: FLL Explore (6-10 جاس), FLL Challenge (10-16 جاس) جانە FIRST Tech Challenge (12-18 جاس). سونىمەن قاتار چەمپيوناتتا يننوۆاتسيالىق جوبالار بايقاۋى مەن قازىلار سەسسياسى دا بولادى.
ايتا كەتۋ كەرەك, FIRST چەمپيوناتتارى جىل سايىن ءتۇرلى تاقىرىپتار بويىنشا وتكىزىلەدى. بيىلعى ماۋسىم ونەر تاقىرىبىنا ارنالدى. بايقاۋ جەڭىمپازدارىنا باعالى سىيلىقتار, اقش, اۆستراليا, سينگاپۋرداعى حالىقارالىق وليمپيادالارعا قاتىسۋعا ليتسەنزيالار, قازاقستاندىق جانە شەتەلدىك جوعارى وقۋ ورىندارىنا گرانتتار, سونداي-اق وقۋ-اعارتۋ مينيسترلىگىنىڭ I, II, III دارەجەلى ديپلومدارىمەن ماراپاتتالادى.
چەمپيوناتتى «دارىن» رەسپۋبليكالىق عىلىمي-پراكتيكالىق ورتالىعى, «USTEM Foundation» جانە استانا قالاسىنىڭ ءبىلىم باسقارماسى قازاقستان رەسپۋبليكاسى وقۋ-اعارتۋ مينيسترلىگىنىڭ جانە استانا قالاسى اكىمدىگىنىڭ قولداۋىمەن بىرلەسىپ وتكىزۋدە.
