ەركەعالي راحماديەۆ اتىنداعى مەملەكەتتىك اكادەميالىق فيلارمونيا ۇجىمدارى وتان قورعاۋشىلار كۇنىنە جانە جەڭىس كۇنىنە وراي بىرقاتار ءىس-شارا وتكىزدى. فيلارمونيانىڭ كونتسەرت زالىندا «وتان دەپ سوققان جۇرەكتەر» اتتى مەرەكەلىك كونتسەرت ءوتتى.
كونتسەرتكە قاتىسۋشىلار مۋزىكالىق اسپاپتاردا ويناۋ شەبەرلىگىن كورسەتىپ, ءان شىرقاپ, بي بيلەدى. اتاپ ايتقاندا, فيلارمونيا انشىلەرى التىنبەك ءابىلدا, جاندوس يمانباي, التىنشاش مۇقاتاەۆا, پاراسات وتان, قىمبات جامبىلبەك, ايدىن جۇماباي, مۇراتبەك حايرولدا, باۋىرجان تۇرعىمباەۆ, ۇلتتىق ۇلاننىڭ ءان-بي ءانسامبلى, «Alem» زاماناۋي حورەوگرافيا بالەتى جانە «جاس سارباز» بالالار شەبەرلىك ستۋدياسى ونەر كورسەتتى.
ەسىل وزەنى جاعالاۋىنداعى جاياۋ جۇرگىنشىلەرگە ارنالعان كوشەدە ە.راحماديەۆ اتىنداعى مەملەكەتتىك اكادەميالىق فيلارمونيانىڭ سيمفونيالىق وركەسترىنىڭ شەرۋى ءوتتى.
قالىپتاسقان ءداستۇر بويىنشا تۇرعىندار كوپ جينالاتىن ەلوردانىڭ ورتالىق ساياباعىندا مۋزىكانتتار قالا تۇرعىندارى مەن قوناقتارىن جەڭىس كۇنىمەن قۇتتىقتاپ, ونەر كورسەتتى. كەنەسارى حان ەسكەرتكىشىنەن باستالىپ, ورتالىق ساياباقتىڭ «امفيتەاتر» اۋماعىنا دەيىن جالعاسقان شەرۋ بارىسىندا بارشاعا تانىس ءارى سۇيىكتى شىعارمالار ورىندالدى.
استانالىق فيلارمونيانىڭ ۇرلەمەلى اسپاپتار وركەسترى مەن «استانا جاستارى» مەكەمەسىنىڭ جاستارى «Red bus» ەكسكۋرسيالىق ەكى قاباتتى اۆتوبۋسپەن ۇلى وتان سوعىسىنىڭ ارداگەرلەرى تۇراتىن مەكەنجايلارعا باردى. ەرەكەشە فورماتتاعى بۇل ءىس-شارادا مايدانگەرلەر الدىندا اسكەري-پاتريوتتىق تۋىندىلار مەن سوعىس جىلدارىنداعى اندەر ورىندالدى.
