بۇگىن استانادا وتكەن بريفينگتە ساراپشىلار ايەلدەر قۇقىعى مەن بالالار قاۋىپسىزدىگىن قامتاماسىز ەتۋ ماسەلەلەرى بويىنشا جاڭا زاڭنىڭ ەرەجەلەرىن ەگجەي-تەگجەيلى ءتۇسىندىردى. اتالمىش قۇجات 16 ماۋسىمدا كۇشىنە ەنەدى, دەپ حابارلايدى astana-akshamy.kz.
ايەلدەر قۇقىعى مەن بالالار قاۋىپسىزدىگىن قامتاماسىز ەتۋ ماسەلەلەرى بويىنشا زاڭنىڭ قابىلدانۋى – وتباسى ينستيتۋتىن نىعايتۋ مەن تۇرمىستىق زورلىق-زومبىلىقتىڭ الدىن الۋداعى ماڭىزدى قادام. بۇگىنگى تاڭدا ەلىمىزدە ءتۇرلى ومىرلىك جاعدايلاردى شەشۋدە وتباسىلارعا كەشەندى كومەك كورسەتۋ ءۇشىن 68 ورتالىق جۇمىس ىستەيدى. 2025-2027 جىلدارى وقو سانىن 200-گە دەيىن جەتكىزۋ جوسپارلانۋدا. بۇل تۋرالى وكق بريفينگىندە قر مام جاستار جانە وتباسى ىستەرى كوميتەتى توراعاسىنىڭ ورىنباسارى نايلا مۇحتاروۆا مالىمدەدى.
ورتالىقتار حالىقتى الەۋمەتتىك قورعاۋ جانە جۇمىسپەن قامتۋ ماسەلەلەرى جونىندەگى جەرگىلىكتى اتقارۋشى ورگانداردىڭ جانىنان اۋدانداردا جانە قالالاردا قۇرىلاتىن بولادى.
«مادەنيەت جانە اقپارات مينيسترلىگى زاڭنامالىق دەڭگەيدە وتباسى ساياساتى سالاسىنداعى ۋاكىلەتتى ورگانعا اينالدى. ومىرلىك قيىن جاعدايعا تاپ بولعان ادامداردى قولداۋ ماقساتىندا, ورتالىقتار ءوتىنىش بىلدىرگەندەردىڭ جاعدايىن كەشەندى باعالاپ, سونداي-اق وتباسىعا جاردەم كورسەتۋدىڭ جەكە جوسپارىن جاسايدى جانە جۇرگىزەدى. وتباسىعا جاردەم كورسەتۋ جۇيەسىنىڭ نەگىزى –ماماندى ءبىر وتباسىنا بەكىتۋ. بۇل وتباسىعا كومەك پەن قولداۋدىڭ بارلىق باعىتىندا جاردەم كورسەتۋگە, باسقا مامانداردىڭ جۇمىسىن ۇيلەستىرۋگە مۇمكىندىك بەرەدى. كەيس-مەنەدجمەنتتەگى ۆەدومستۆوارالىق ءوزارا بايلانىس جۇيەسى نەگىزگى رولدەردىڭ ءبىرىن اتقاراتىن بولادى», – دەپ اتاپ ءوتتى نايلا مۇحتاروۆا.
ورتالىقتاردىڭ كومەگىنە جۇگىنۋ ءۇشىن, قازاقستاندىقتار وزدەرى جەكە, «111» بايلانىس ورتالىعىنا, الەۋمەتتىك جەلىلەر, مو اقپاراتتىق جۇيەلەر, سونداي-اق كاج جانە القالى ورگاندار ارقىلى جۇگىنە الادى.
ورتالىقتار قىزمەتىنىڭ تيىمدىلىگىن ارتتىرۋ ءۇشىن, وتباسىلىق تسيفرلى كارتا پلاتفورماسىنا جانە وتباسىلارعا كومەك كورسەتۋ ءۇشىن FSM ءموبيلدى قوسىمشاسىنا قوسىلۋ ارقىلى بيزنەس-پروتسەستەردى وڭتايلاندىرۋ جوسپارلانۋدا.
ەڭبەك جانە حالىقتى الەۋمەتتىك قورعاۋ جانە تسيفرلىق دامۋ مينيسترلىكتەرىمەن بىرلەسىپ ورتالىق قىزمەتكەرلەرى ءۇشىن, اۆتوماتتاندىرىلعان جۇمىس ورىندارىن ازىرلەۋ جۇمىسى جۇرگىزىلۋدە.
