بۇگىن پارلامەنت پالاتالارىنىڭ بىرلەسكەن وتىرىسى ءوتىپ, وندا سەگىزىنشى سايلانعان پارلامەنتتىڭ ەكىنشى سەسسياسى رەسمي تۇردە جابىلدى, دەپ حابارلايدى astana-akshamy.kz.
بۇل تۇرعىدا دەپۋتاتتار بيىلعى 1 قىركۇيەككە دەيىن پارلامەنتتىك كانيكۋل دەپ جاريالاناتىنى تۋرالى ارنايى قاۋلى قابىلدادى.
«بۇگىن ءبىز سەگىزىنشى سايلانعان قازاقستان پارلامەنتىنىڭ ەكىنشى سەسسياسىنىڭ جۇمىسىن اياقتاعالى وتىرمىز. ءداستۇر بويىنشا اتقارىلعان جۇمىستى قورىتىندىلايمىز, كەلەشەككە جوسپار قۇرامىز. مەملەكەت باسشىسى قاسىم-جومارت كەمەلۇلى توقاەۆتىڭ ساياسي رەفورمالارى پارلامەنت جۇمىسىنا جاڭا باعىت-باعدار بەردى. كوپپارتيالى پارلامەنت زاڭ شىعارۋشى ورگاننىڭ قىزمەتىنە تىڭ سەرپىن اكەلدى, قوعامنىڭ ءتۇرلى يدەولوگيالىق كوزقاراستاعى ءارالۋان وكىلدەرىنىڭ كەلۋى قابىلداناتىن زاڭداردىڭ ساپاسىن ارتتىرا ءتۇستى. مۇنىڭ ءبارى — قازاقستان پارلامەنتاريزمى تاريحىنداعى جاڭا كەزەڭگە اينالدى», — دەدى ءماجىلىس توراعاسى ەرلان قوشانوۆ.
ونىڭ ايتۋىنشا, وتكەن سەسسيا «كۇشتى پرەزيدەنت — ىقپالدى پارلامەنت — ەسەپ بەرەتىن ۇكىمەت» فورمۋلاسىنىڭ تيىمدىلىگىن ءىس جۇزىندە دالەلدەدى. بيلىك تارماقتارىنىڭ تەپە-تەڭدىگىن قامتاماسىز ەتەتىن بۇل جۇيە پارمەندى شەشىمدەر قابىلداۋعا مۇمكىندىك تۋعىزدى.
«وسىنىڭ ءبارى ەلىمىزدى ودان ءارى دامىتۋعا, حالىقتىڭ ءال-اۋقاتىن ارتتىرۋعا باعىتتالعان. پرەزيدەنت جاريالاعان «زاڭ مەن ءتارتىپ ۇستەمدىگى قاعيداتى» وتكەن زاڭ شىعارۋ ماۋسىمىندا باستى باعدار بولدى, قوعامنىڭ ساپالى زاڭدار قابىلداۋعا دەگەن سۇرانىسىن ارتتىرا ءتۇستى. پارلامەنت ەلىمىزدەگى ەڭ وزەكتى پروبلەمالار بويىنشا زاڭنامالىق شەشىمدەر شىعارۋ جانە ولاردى اشىق تالقىلاۋ الاڭىنا اينالدى. تۇيتكىلدى ماسەلەلەردى زاڭدار ارقىلى شەشۋ نەگىزگى تەتىك رەتىندە قالىپتاسىپ كەلەدى. نورماتيۆتىك قۇجاتتاردىڭ مارتەبەسى مەن سالماعى ارتىپ وتىر. مۇنىڭ ءبارى — پارمەندى ءارى ىقپالدى پارلامەنت قالىپتاستىرۋ باعىتىنداعى كونستيتۋتسيالىق رەفورمانىڭ ءمان-ماڭىزىن ايشىقتاي تۇسۋدە», — دەدى ءماجىلىس توراعاسى.
بۇل تۇرعىدا ە. قوشانوۆ وسى سەسسيادا پارلامەنتتىك جۇمىس كەزەڭى تولىق ءارى تابىستى اتقارىلعانىن ايتتى.
«مەملەكەت باسشىسىنىڭ جىلداعى جولداۋلارىن, پرەزيدەنتتىك سايلاۋالدى باعدارلاماسىن, ۇلتتىق قۇرىلتايدا قابىلدانعان شەشىمدەردى ىسكە اسىرۋ دەپۋتاتتىق كورپۋس قىزمەتىنىڭ نەگىزگى وزەگىنە اينالدى. وسىعان بايلانىستى ەكىنشى سەسسيانىڭ زاڭنامالىق كۇنتارتىبى دە مازمۇندى بولدى. پالاتالاردىڭ 5 بىرلەسكەن وتىرىسى, ءماجىلىستىڭ 39 وتىرىسى جانە سەناتتىڭ 43 وتىرىسى ءوتتى. سەسسيا بارىسىندا ەكى پالاتانىڭ قاراۋىندا 179 زاڭ جوباسى بولدى, ونىڭ 120-ءسى قابىلداندى. سەسسيا بارىسىندا دەپۋتاتتار بىرقاتار ماڭىزدى زاڭ جوبالارى بويىنشا ۇكىمەتپەن بىرلەسە جۇمىس ىستەدى», – دەدى ول.
