پروكۋرورلار استاناداعى ءبىر پاتەردە شەتەلدىكتەردى قوسقاندا 937 ادامدى تىركەگەن تۇرعىندى انىقتادى, بىراق وندا ءبىر عانا وتباسى تۇرعان, دەپ حابارلايدى astana-akshamy.kz باس پروكۋراتۋراعا سىلتەمە جاساپ.
ەلىمىزدىڭ التى وڭىرىندە (جامبىل, تۇركىستان, سولتۇستىك قازاقستان, قاراعاندى وبلىستارى, الماتى جانە استانا قالالارى) پروكۋرورلار زاڭسىز كوشى-قون ارنالارىن انىقتاپ, سوتقا دەيىنگى تەرگەپ-تەكسەرۋدى باستادى.
مىسالى, قاراعاندى وبلىسىندا حقكو, مەديتسينالىق مەكەمەلەر مەن «كومەكشىلەر» دەپ اتالاتىن قىزمەتكەرلەردى قامتيتىن قىلمىستىق توپتىڭ جۇمىسى توقتاتىلدى, ولار اقشا ءۇشىن ەڭبەك شارتتارىن, مەديتسينالىق انىقتامالاردى قولدان جاساپ, تۇرعىن ءۇيدى جالعان تىركەۋدى رەسىمدەگەن.
قورداي اۋدانىندا جامبىل وبلىسى پروكۋراتۋراسىنىڭ ۇيلەستىرۋىمەن 20 پاكىستاندىققا شەكارانى زاڭسىز كەسىپ ءوتۋدى ۇيىمداستىرعان قازاقستان مەن قىرعىزستاننىڭ ءۇش ازاماتى ۇستالدى.
«ولاردىڭ ءبىرى ميگرانتتاردى كولىكپەن جانە تۇرعىن ۇيمەن قامتاماسىز ەتكەن جانە ول سوتتالدى, قالعان ەكەۋىنە قاتىستى ءىس سوتقا جولداندى (م ەسىمدى ازامات باس بوستاندىعىنان ايىرۋعا سوتتالدى, ا جانە و ەسىمدى ازاماتتارعا قاتىستى ءىس سوتقا جىبەرىلدى)», – دەلىنگەن حابارلامادا.
پروكۋرورلار جالعان مەكەن-جايلار بويىنشا جانە «رەزەڭكە پاتەرلەردە» تىركەلگەن 22 مىڭ شەتەلدىكتى انىقتادى.
«تەكسەرىس ناتيجەلەرى بويىنشا قۇجاتتاردى قولدان جاساۋعا, شەكارانى زاڭسىز كەسىپ وتۋگە, سوت اكتىلەرىن ورىنداماۋعا جانە باسقا دا بۇزۋشىلىقتارعا بايلانىستى بارلىعى 42 سوتقا دەيىنگى تەرگەپ-تەكسەرۋ باستالدى. قازىرگى جاعدايدا كوشى-قون پروتسەستەرىن ءتيىمدى باسقارۋ ەلدىڭ قاۋىپسىزدىگىن, تۇراقتىلىعىن جانە دامۋىن قامتاماسىز ەتۋدىڭ نەگىزگى ەلەمەنتىنە اينالادى وسىعان بايلانىستى القا قورىتىندىلارى بويىنشا شەكارالاردىڭ ينجەنەرلىك-تەحنيكالىق قورعالۋىن نىعايتۋدى, اقپاراتتىق جۇيەلەردى جاڭعىرتۋ مەن ينتەگراتسيالاۋدى, سونداي-اق زاڭنامالىق تۇزەتۋلەردە كوزدەلگەن جاڭا ەرەجەلەردى ىسكە اسىرۋ شارالارىن پىسىقتاۋدى كوزدەيتىن كەشەندى شارالار ازىرلەندى», – دەلىنگەن حابارلامادا.
