م.وتەمىسۇلى اتىنداعى وقۋشىلار سارايىندا قالالىق ءبىلىم باسقارماسى ادىستەمەلىك ورتالىعىنىڭ ۇيىمداستىرۋىمەن «بالا پسيحولوگياسى» تاقىرىبىندا Psy talks ءوتتى, دەپ حابارلايدى astana-akshamy.kz
ءىس-شارانىڭ ماقساتى – بالا تاربيەسىنە قاتىستى پسيحولوگيالىق-پەداگوگيكالىق بىلىمدەرىن كوتەرۋ.
ەلوردادا وتكەن جيىنعا استانا قالاسى ءبىلىم باسقارماسىنىڭ وكىلى, قازاق ۇلتتىق حورەوگرافيا اكادەمياسىنىڭ عالىمدارى, قازاقستاندىق جاس عالىمدار, «Bilim Foundation» قوعامدىق قورىنىڭ وكىلدەرى, ادىستەمەلىك ورتالىقتىڭ ادىسكەرلەرى قاتىستى. سپيكەرلەر قاتىسۋشىلارمەن ديالوگ الاڭىن قۇرىپ, بالا تاربيەسى, بالا پسيحولوگياسىنا قاتىستى سۇراقتارىنا اشىق جاۋاپ بەردى.
سونىمەن قاتار, مەكتەپ ديرەكتورى مەكتەپ پەن وتباسىنىڭ بىرلەسكەن ارەكەتى ناتيجەسىندە وقۋشىسىنىڭ جەتكەن جەتىستىگى جايلى وي ءبولىستى.
«بالا پسيحولوگياسى ءۇشىن باستى ماسەلە – بالانىڭ پسيحيكالىق دامۋىنىڭ فاكتورلارىن, پسيحيكالىق دامۋ شارتتارىن ءتۇسىندىرۋ. بالا پسيحولوگياسىندا جالپى پسيحولوگيانىڭ نەگىزگى ادىستەرى جاس ەرەكشەلىكتەرىنە وراي وزگەرتىلىپ قولدانىلادى. بۇگىنگى تاڭدا بولىپ جاتقان ومىرىمىزدەگى وزگەرىستەرگە بايلانىستى ۇستازدار مەن اتا انالاردىڭ بالا تاربيەلەۋدەگى جاۋاپكەرشىلىگى ارتا تۇسۋدە. ءاربىر ۇستاز اتا انالارمەن قارىم-قاتىناس جاساۋدا ءتۇرلى تاسىلدەردى, قازىرگى جاڭا تەحنولوگيالاردى پايدالانا وتىرىپ, اتا-انانىڭ قىزىعۋشىلىعىن ارتتىرۋ ماقساتىندا جۇمىس ىستەسە, اتا انانىڭ مەكتەپكە, ۇستازعا دەگەن كوزقاراسى وزگەرەر ەدى», – دەيدى №68 مەكتەپ-گيمنازياسىنىڭ پەداگوگ-پسيحولوگى رايگۇل سايلاۋباەۆا.
جيىن بارىسىندا استانا قالاسى ءبىلىم باسقارماسىنىڭ كامەلەتكە تولماعانداردىڭ قۇقىعىن قورعاۋ ءبولىمىنىڭ باسشىسى ديانا امانگەلدىقىزى العى ءسوز سويلەدى. PhD بالابەك ساقتاعانوۆ «تۇلعالىق قۇندىلىقتاردى دامىتۋدىڭ پسيحولوگيالىق اسپەكتىلەرى» تاقىرىبىندا قىزىقتى بايانداما جاسادى.
اتا-انالار ۇيىمداستىرىلعان ءىس-شارادان زاماناۋي بالا پسيحولوگياسى جايلى جاڭا اقپاراتتار الىپ, قىزىقتى تاقىرىپتار توڭىرەگىندە پىكىر الماستى.
