كەشە استانا قالاسى ءماسليحاتىنىڭ كەزەكتى سەسسياسىندا ەلوردادا مەملەكەتتىك-جەكەمەنشىك ارىپتەستىك جوبالارىن ىسكە اسىرۋ بارىسىنا جاۋاپتى جەرگىلىكتى اتقارۋشى ورگاننىڭ ەسەبى تىڭدالدى. بۇل ماسەلە بويىنشا قالا اكىمىنىڭ ورىنباسارى ەۆگەني گلوتوۆ بايانداما جاسادى. سونداي-اق جيىنعا قالا باسشىسىنىڭ تاعى ءبىر ورىنباسارى ەسەت بايكەن قاتىستى.
– بۇگىنگى تاڭدا استانا قالاسىنىڭ اكىمدىگى مەملەكەتتىك-جەكەمەنشىك ارىپتەستىك جوبالارى تۋرالى 14 كەلىسىمشارتتى ىسكە اسىرۋدا. سونىڭ ىشىندە 10 مەملەكەتتىك-جەكەمەنشىك ارىپتەستىك جوباسىنىڭ كەلىسىمشارتى بويىنشا قابىلدانعان مەملەكەتتىك مىندەتتەمەلەر ورىندالۋدا. اعىمداعى جىلدىڭ 1 ماۋسىمىنداعى جاعداي بويىنشا مىندەتتەمەلەردىڭ ورىندالۋى 65 پايىزدى قۇرادى. قازىرگى ۋاقىتتا ىسكە اسىرىلىپ جاتقان جوبالار ءوز تيىمدىلىگىن كورسەتىپ وتىر. ونىڭ ىشىندە مەكتەپ جانە مەكتەپكە دەيىنگى مەكەمەلەردىڭ تاپشىلىعىن ازايتۋ, ينۆەستيتسيا تارتۋ, بيۋدجەت تۇسىمدەرىن ارتتىرۋ, جاڭا جۇمىس ورىندارىن قۇرۋ سياقتى ناتيجەلەر بار, – دەدى ەۆگەنيي گلوتوۆ.
ونىڭ ايتۋىنشا, ىسكە اسىرىلىپ جاتقان جوبالار كەلىسىمشارتىنىڭ نەگىزگى ۇلەسى الەۋمەتتىك سالاعا تيەسىلى, ياعني قولدانىستاعى 14 كەلىسىمشارتتىڭ 73 پايىزى نەمەسە 10 كەلىسىمشارت الەۋمەتتىك سالادا جاسالعان.
قولدانىستاعى جوبالارعا توقتالعان قالا اكىمىنىڭ ورىنباسارى ءبىلىم بەرۋ سالاسىندا 8 مەملەكەتتىك-جەكەمەنشىك ارىپتەستىك كەلىسىمشارتى جاسالعانىن اتاپ ءوتتى. اتاپ ايتقاندا, 2017 جىلى ءبىلىم باسقارماسى مەن «ءبۇلدىرشىن-2012» جشس اراسىندا 20 جىل مەرزىمىنە 360 ورىندىق بالاباقشا سالۋعا ءبىرىنشى مەملەكەتتىك-جەكەمەنشىك ارىپتەستىك كەلىسىمشارتى جاسالدى. بۇگىنگى كۇنى جەكە سەرىكتەستىككە ينۆەستيتسيالىق شىعىنداردى وتەۋ تۇرىندەگى بارلىق قابىلدانعان مىندەتتەمەلەر تولىق كولەمدە ورىندالدى. 2023 جىلى نىسان كوممۋنالدىق مەنشىككە بەرىلدى. قازىرگى تاڭدا 360 ورىنعا مەملەكەتتىك ءبىلىم بەرۋ تاپسىرىسى ورنالاستىرىلعان.
– گۋمانيتارلىق كوللەدجدى سەنىمدى باسقارۋعا بەرۋ تۋرالى مەملەكەتتىك-جەكەمەنشىك ارىپتەستىك تۋرالى كەلىسىمشارت 2019 جىلى ءبىلىم باسقارماسى مەن «استانا» حالىقارالىق ۋنيۆەرسيتەتى اراسىندا مەملەكەتتىك مىندەتتەمەلەردى قابىلداۋسىز 6 جىل مەرزىمىنە جاسالدى. جوبانى ىسكە اسىرۋ كوللەدجدى سەنىمدى باسقارۋعا بەرۋدى, سونداي-اق جاڭا وقۋ عيماراتىن قۇرۋ ارقىلى جوعارى ءبىلىم بەرۋ ءۇشىن گۋمانيتارلىق-پەداگوگيكالىق اكادەميانى قۇرۋدى كوزدەيدى. قازىرگى ۋاقىتتا جوبا جەكە سەرىكتەستىك مەملەكەتتىك-جەكەمەنشىك ارىپتەستىك نىساندارىن پايدالانۋعا بەرۋ بولىگىندە ىسكە اسىرىلۋدا, – دەدى ەۆگەني گلوتوۆ.
ەلوردادا مەملەكەتتىك-جەكەمەنشىك ارىپتەستىك جوبالارىن ىسكە اسىرۋ اياسىندا 2021 جىلدان بەرى جوبالىق قۋاتتىلىعى اۋىسىمىنا 2 مىڭ وقۋشىعا ارنالعان 6 Binom مەكتەبى اشىلىپ, جۇمىس ىستەپ جاتقانىن ايتقان بايانداماشى بۇل قىسقا مەرزىمدە تاپشىلىقتى 24 مىڭ وقۋشىعا قىسقارتۋعا مۇمكىندىك بەرگەنىن, وقۋشىلار وسى مەكتەپتەرگە ارنايى ىرىكتەۋسىز قابىلداناتىنىن اتاپ ءوتتى. ونىڭ ايتۋىنشا, Binom مەكتەپتەرى قىسقا مەرزىمدە بەلگىلى ءبىر جەتىستىكتەرگە جەتتى. اتالمىش مەكتەپتەر ءتۇرلى وليمپيادالاردىڭ, شىعارماشىلىق, سپورتتىق, ينتەللەكتۋالدىق جارىستاردىڭ جانە رەسپۋبليكالىق دەڭگەيدەگى بايقاۋلاردىڭ 271 جەڭىمپازىن, قالالىق دەڭگەيدەگى 714 جەڭىمپازدى جانە 15 حالىقارالىق دارەجەدەگى جەڭىمپازداردى دايىندادى.
– دەنساۋلىق ساقتاۋ سالاسىندا 2019 جىلدان بەرى مەملەكەتتىك-جەكەمەنشىك ارىپتەستىك شەڭبەرىندە ەففەرەنتتى تەراپيا جانە گەموتۇزەتۋ ورتالىعى ءوز قىزمەتىن جۇزەگە اسىرادى. مەملەكەتتىك-جەكەمەنشىك ارىپتەستىك كەلىسىمشارتى 7 جىل مەرزىمىنە جاسالدى. مەملەكەتتىك قولداۋ شاراسى – №1 كوپسالالى قالالىق اۋرۋحانادا اۋدانى 910 شارشى مەتر ورىنجاي بەرۋ. جوبا اياسىندا بۇگىنگى كۇنى مەديتسينالىق ورتالىقتا كەلىسىمشارت جاسالعان ساتتەن باستاپ 70 مىڭنان استام گەمودياليز پروتسەدۋراسى جاسالدى, – دەدى قالا اكىمىنىڭ ورىنباسارى.
ەكولوگيا سالاسىنداعى مەملەكەتتىك-جەكەمەنشىك ارىپتەستىك جوبالارىنا توقتالعان بايانداماشى قۇرامىندا سىنابى بار قاۋىپتى قالدىقتاردى زالالسىزداندىرۋ بويىنشا قىزمەتتەردى كورسەتۋ ءۇشىن 2023 جىلى كەلىسىمشارت 10 جىل مەرزىمىنە جاسالعانىن جەتكىزدى. مۇنىڭ ناتيجەسىندە وتكەن كەزەڭدە 2,8 ملن-نان استام قۇرامىندا سىنابى بار شامدار سىناپسىزداندىرىلدى, 17 ملن تەكشە مەتر اۋانىڭ سىناپ بۋىمەن لاستانۋىنا جول بەرىلمەدى, ۆانداليزم سالدارىنان ورىن العان 1 مىڭنان استام قالپىنا كەلتىرۋ جۇمىستارى جۇرگىزىلدى.
– كولىك جانە قوعامدىق قاۋىپسىزدىك سالاسىندا وتكەن جىلدىڭ سوڭىندا استانا قالاسىنىڭ اكىمدىگى «Ecology service» ۇيىمىمەن بىرلەسىپ, 7 جىل مەرزىمىنە كولىكتىك قىزمەت كورسەتۋ بويىنشا جاڭا كەلىسىمشارت جاسادى. جوبا 100 اۆتوكولىكتى پايدالانۋدى قاراستىرادى. جاڭا مەملەكەتتىك-جەكەمەنشىك ارىپتەستىك جوباسىنىڭ ەرەكشەلىگى – ەلەكتروموبيلدەردى بەلسەندى تۇردە ەنگىزۋ, قالا اۋماعىندا قالا تۇرعىندارى پايدالانا الاتىن 30-عا جۋىق ەلەكترزاريادتاۋ ستانساسىن ورنالاستىرۋ, – دەدى ەۆگەني گلوتوۆ.
ونىڭ ايتۋىنشا, بيىل 2017 جىلى جاسالعان «سەرگەك» فوتو-بەينەجازبا جانە بەينەتالداۋ كەشەنىن قۇرۋ جانە پايدالانۋ بويىنشا مەملەكەتتىك-جەكەمەنشىك ارىپتەستىك كەلىسىمشارتىنىڭ مەرزىمى اياقتالىپ جاتىر. بۇگىنگى تاڭدا جوبانى ىسكە اسىرۋ اياسىندا بىرقاتار ناتيجەلەرگە قول جەتكىزىلدى. اتاپ ايتقاندا, جول-كولىك وقيعالارىنان ءولىم دەڭگەيى 42 پايىزعا نەمەسە 100 مىڭ تۇرعىنعا شاققاندا 2,5 ادامعا تومەندەدى. بۇل الەمدەگى دامىعان قالالاردىڭ دەڭگەيىنە سايكەس كەلەدى. قىلمىس دەڭگەيى 46 پايىزعا ازايدى. «بۇل جوبانىڭ بيۋدجەتتىك تيىمدىلىگىن راستايدى» دەدى بايانداماشى.
– جولاۋشى كولىگى جانە اۆتوموبيل جولدارى باسقارماسى مەن «استانانىڭ تۇراق كەڭىستىگى» سەرىكتەستىگى اراسىندا اقىلى تۇراق كەڭىستىگىن قۇرۋ ەسەبىنەن كوشە-جول جەلىسىنە جۇكتەمەنى تومەندەتۋدى قامتاماسىز ەتۋ, جول قوزعالىسى قاۋىپسىزدىگىن ارتتىرۋدى ۇيىمداستىرۋ ماقساتىندا قالا اۋماعىندا 10 مىڭ تۇراق ورنىن اشۋدى كوزدەيتىن كەلىسىمشارتقا 2019 جىلى قول قويىلدى. بۇگىنگى تاڭدا جەكە سەرىكتەس 7192 تۇراق ورنىن ۇيىمداستىردى. بۇل رەتتە سەرىكتەستىك شىعىندارىن بيۋدجەتتەن وتەۋ بويىنشا قارجىلىق مىندەتتەمەلەر قاراستىرىلمايدى. جوبا بويىنشا 20 جىل ىشىندە 3 تولىق جاڭارتۋ جانە جۇيەلەر مەن ينفراقۇرىلىمعا جىل سايىن قىزمەت كورسەتۋ جوسپارلانعان. جوبانى ىسكە اسىرۋ ساتىنەن باستاپ تۇسكەن تۇسىمدەر 4,7 ميلليارد تەڭگەدەن استى, سونىڭ ىشىندە ايىپپۇلداردان بيۋدجەتكە تۇسەتىن تۇسىمدەر 4,3 ميلليارد تەڭگەدەن اسادى. 2023 جىلدان باستاپ جەكە سەرىكتەستىكتەگى مەملەكەتتىڭ ۇلەسى ارتىپ, 25 پايىزدى قۇرايتىنىن اتاپ وتكىم كەلەدى, – دەدى ەۆگەني گلوتوۆ.
مەملەكەتتىك-جەكەمەنشىك ارىپتەستىك اياسىندا جۇزەگە اسىرىلىپ جاتقان سپورت سالاسىنداعى جوبالارعا توقتالعان بايانداماشى مۇمكىندىگى شەكتەۋلى جاندارعا ارنالعان پاراليمپيادالىق جاتتىعۋ ورتالىعى مەن «تارلان» مۇز ارەناسىنىڭ قىزمەتىن ۇيىمداستىرۋ تۋرالى ايتتى. كەلىسىمشارت «كاسپي» سپورتتى دامىتۋ قورى» قوعامدىق قورىمەن جاسالعان. جوبادا ەكى سپورت نىسانىن جالعا بەرۋ قاراستىرىلعان. جوبا 6 جىل بويى ءساتتى ىسكە اسىرىلۋدا. «قازاقستان» سپورت سارايىن جاڭعىرتۋ جانە پايدالانۋ بويىنشا مەملەكەتتىك-جەكەمەنشىك ارىپتەستىك كەلىسىمشارتىنان حابار بەردى.
قالا اكىمىنىڭ ورىنباسارى مەملەكەتتىك-جەكەمەنشىك ارىپتەستىك جوبالارى استانانىڭ ينفراقۇرىلىمىن دامىتۋدا جانە ءومىر ءسۇرۋ ساپاسىن ارتتىرۋدا ەلەۋلى ءرول اتقارىپ وتىرعانىن اتاپ ءوتتى.
«سەرگەك», Binom مەكتەپتەرى جانە باسقا ءساتتى جوبالار – مەملەكەت پەن بيزنەستىڭ ءتيىمدى ىنتىماقتاستىعىنىڭ جارقىن مىسالى. بۇل جوبالار قالا ءومىرىنىڭ ءارتۇرلى سالاسىنا تيگىزگەن وڭ اسەرىن كورىپ وتىرمىز. بۇل جەتىستىكتەر مەملەكەت پەن جەكە سەكتوردىڭ بىرلەسكەن كۇش-جىگەرىنىڭ ارقاسىندا مۇمكىن بولدى, – دەپ تۇيىندەدى ءسوزىن قالا اكىمىنىڭ ورىنباسارى.
