ۇلتتىق اكادەميالىق كىتاپحانادا اقىن اسپانبەك شۇعاتاەۆتىڭ «قانىشنامە» كىتابىنىڭ تانىستىرىلىمى ءوتتى. وعان اۆتوردىڭ كىتاپپەن اتتاس پوەماسى ەنگىزىلدى. اتالمىش تۋىندى قانىش ساتباەۆتىڭ 125 جىلدىعىنا ارنالعان, اكادەميكتىڭ اتا تەگىنەن باستاپ اقىرعى دەمىنە دەيىنگى عۇمىرىن قامتيدى. كىتاپ قىلقالام شەبەرى الماس سىرعابايدىڭ ءماندى دە ماعىنالى سۋرەتتەرىمەن كوركەمدەلدى, تانىستىرىلىممەن قاتار سول سۋرەتتەر كورمەسى دە ۇيىمداستىرىلدى.
پارلامەنت سەناتىنىڭ دەپۋتاتى, «ق.ي.ساتباەۆ حالىقارالىق قورى» قوعامدىق قورىنىڭ قامقورشىلىق كەڭەسىنىڭ توراعاسى التىنبەك نۋحۇلى قانىش ساتباەۆتىڭ بيىلعى مەرەيتويى وتە جاقسى دارەجەدە ءوتىپ جاتقانىن, جازۋشى مەدەۋ سارسەكەنىڭ ساتباەۆتانۋداعى ايرىقشا ەڭبەگىن, قالامگەر قانىشتانۋعا 60 جىل عۇمىرىن ارناعانىن اتاپ ءوتتى. «قانىشنامە» پوەماسىنىڭ ەرەكشەلىگىنە توقتالا كەلە, اۆتور ساتباەۆتىڭ كوپ جازىلماي جۇرگەن اتا-باباسىن, تۋعان جەرىندەگى ادامداردى, عۇلاما عالىمنىڭ تەكتىلىگىن تانىتقانىن ايتتى. بۇعان دەيىن قانىش ساتباەۆ تۋرالى كورنەكتى اقىن, مەملەكەتتىك سىيلىقتىڭ لاۋرەاتى نەسىپبەك ايتۇلى پوەما جازعانىن, قانىش جايىندا وسى تانىستىرىلىمعا قاتىسقان ارداكۇرەڭ اقىن, اباي اتىنداعى مەملەكەتتىك سىيلىقتىڭ يەگەرى عالىم جايلىباي تاماشا ولەڭدەر تۋدىرعانىن جەتكىزدى.
عالىم جايلىباي كەزىندە «ق.ي.ساتباەۆ حالىقارالىق قورى» قوعامدىق قورىنىڭ اتقارۋشى ديرەكتورى بولىپ, اكادەميكتىڭ 100 جىلدىعىنىڭ اتاپ وتىلۋىنە ۇلكەن ۇلەس قوستى. اقىن سول كەزدى ەسكە الدى. سول ۋاقىتتا دا قانىش ساتباەۆقا ارنالعان ولەڭدەر جازىلعانىن, اتاپ ايتقاندا, جاركەن بودەش پوەما ارناعانىن, ءبىرىنشى ورىن ءداۋىتالى ستامبەكوۆ العانىن جەتكىزدى. قانىش تۋعان باياناۋىلدىڭ قاسيەتىنە توقتالىپ, سول جەردەن شىققان شاكەن ايمانوۆ, جۇمات شانين سەكىلدى تۇلعالار قازاق مادەنيەتى مەن ونەرى سالالارىنىڭ نەگىزىن قالاعانىن ايتتى. جەزقازعاندىق قالامگەر باتىربەك مىرزابەكوۆ قانىش ساتباەۆ جايىندا رومان جازىپ بىتىرگەنىن سۇيىنشىلەدى. كىتاپ اۆتورى اسپانبەك شۇعاتاەۆ ايتىس ونەرىنە قۇبىلىس بولىپ كەلگەنىن اتاپ ءوتتى.
پارلامەنت ءماجىلىسىنىڭ دەپۋتاتى, اقىن, جۋرناليست جاناربەك ءاشىمجان قازىر ەسىمى كوپ ايتىلمايتىن ەلىمىزدەگى ەنەرگەتيكا سالاسىنىڭ نەگىزىن قالاۋشىلاردىڭ ءبىرى شاپىق شوكيننىڭ قانىش ساتباەۆتىڭ ەڭبەگىن ناسيحاتتاۋداعى ۇلەسىنە توقتالدى, اۆتورعا جىلى تىلەگىن ايتتى.
اكادەميك, ۇلتتىق قۇرىلتاي مەن استانا قالاسى قوعامدىق كەڭەسىنىڭ مۇشەسى كارىمبەك قۇرمانالى كەزىندە قانىش ساتباەۆ قۇرعان ۇلتتىق عىلىم اكادەمياسى قۇلدىراعان كەزەڭنەن ءوتىپ, مەملەكەت باسشىسىنىڭ پارمەنىمەن مەملەكەتتىك مارتەبە العانىن, قازىر ەلىمىزدە عىلىم سالاسى جاڭعىرىپ جاتقانىن اتاپ ءوتتى, عىلىمنىڭ ءمان-ماڭىزىنا توقتالدى.
تۇركيا ەلىندە التىن قۇيما پىشىنىندە, قالتاعا سىيارلىقتاي شاعىن بولىپ باسىلعان كىتاپتىڭ جارىق كورۋىنە, تۋىندىنىڭ العاشقى تانىستىرىلىمىنىڭ دا سول باۋىرلاس ەلدە وتۋىنە قولداۋ كورسەتكەن ديپلومات تەمىرتاي رىمتايۇلى, مەدەۋ سارسەكەنىڭ قارىنداسى, ادەبيەتتانۋشى عالىم, ل.گۋميلەۆ اتىنداعى ەۋرازيا ۇلتتىق ۋنيۆەرسيتەتىنىڭ «قازاق ادەبيەتى» كافەدراسىنىڭ مەڭگەرۋشىسى قايىربەك كەمەڭگەر ىزگى لەبىزدەرىن جەتكىزدى. بايان ەلىنىڭ ونەرپازدارى داۋرەنبەك سليامعالي مەن «بەۋ, جىگىتتەر» ءانسامبلى اسەم اندەردى اۋەلەتتى.
