استانالىق ۆولونتەرلەر جالعىزباستى زەينەتكەرلەر مەن قارتتار ءۇيىنىڭ اۋلاسىن قاردان تازالاۋعا كومەكتەستى. شارا قالانىڭ 5 اۋدانىندا جۇرگىزىلەدى.
اۋا رايىنىڭ بۇزىلۋىنا بايلانىستى تولاسسىز جاۋعان قار جەكە تۇرعىن ءۇي سەكتورىندا تۇراتىندارعا, اسىرەسە قارتتارعا قولايسىزدىق تۋعىزۋدا. سوعان بايلانىستى «استانا جاستارى» مەن «جاستار رۋحى» ۆولونتەرلەرى ازىرشە ەلوردانىڭ 2 اۋدانىنداعى 5 تۇرعىن ءۇيدىڭ اۋلاسىن قاردان تازارتۋعا كومەكتەستى.
ەرىكتىلەر جالعىز تۇراتىن قارت كىسىلەردىڭ اۋلاسىنىڭ قارىن كۇرەۋدى, ءۇي شارۋاسىنا قولعابىس ءبىلدىرۋدى داستۇرگە اينالدىرىپ كەلەدى. كەزەكتى اكتسيا بارىسىندا ۆولونتەرلەر قالا تۇرعىنى گالينا ۆەربوۆسكايانىڭ اۋلاسىنداعى قاردى كۇرەپ, زەينەتكەردىڭ العىسىن الدى.
«مۇنداي كومەك بولعانى قانداي تاماشا! جەكە ۇيدە تۇرعاندىقتان قىستا قار كۇرەۋ قيىندىق تۋعىزادى. ماعان بۇگىن كومىر اكەلۋى ءتيىس ەدى, ال قاقپانى قار باسىپ قالعان. سوندىقتان بۇل دەر كەزىندە كورسەتىلگەن كومەك بولدى. قاردى ءوزىمىز كۇرەسەك, ارينە, قيىن بولار ەدى» دەدى زەينەتكەر.
اتاپ وتەرلىگى, ەلوردالىق ۆولونتەرلەر قىستا قار كۇرەۋمەن قاتار, الەۋمەتتىك تۇرعىدان از قامتىلعان وتباسىلارعا ازىق-تۇلىك سەبەتىن جەتكىزۋگە, قارتتارعا اعاش جارۋعا كومەكتەسىپ, كوممۋنالدىق قىزمەت ماماندارىنا ىستىق شاي مەن باۋىرساق تاراتتى.
