– مەملەكەت باسشىسى قاسىم-جومارت توقاەۆتىڭ «Egemen Qazaqstan» گازەتىنە بەرگەن سۇحباتىنان وتانداستارىمىز كوكەيىندە جۇرگەن سان ساۋالىنا تۇشىمدى جاۋاپ الىپ, وزدەرىن تولعاندىرعان وزەكتى سۇراقتاردىڭ شەشىمىن تاپتى.
قاسىم-جومارت كەمەلۇلىنىڭ «ادىلەتتى قازاقستان» قۇرۋ جولىنداعى تاباندى شەشىمدەرىنىڭ ارقاسىندا ەلىمىزدەگى ساياسي رەفورمالار ءساتتى جۇزەگە اسىپ جاتىر. Amanat پارتياسىنىڭ «حالىقپەن بىرگە» سايلاۋالدى باعدارلاماسىن ىسكە اسىرۋ اياسىندا حالقىمىزدىڭ ءال-اۋقاتىن جاقسارتۋ ماقساتىندا بىرقاتار مىندەت ايقىندالىپ, بۇل باعىتتا ۇلكەن جۇمىس اتقارىلۋدا.
ءوزىم 15 جىلدىق تاجىريبەسى بار بانك مامانى, تۇرعىن ءۇي ساراپشىسى بولعاندىقتان, سۇحبات بارىسىندا ەرەكشە نازار اۋدارعان وزەكتى ماسەلە – نەسيە تاقىرىبى. مەملەكەت باسشىسى ءوز سوزىندە نەسيەسىن تولەي الماي جۇرگەن وتانداستارىمىزدىڭ قارجىلىق ساۋاتتىلىعىن كوتەرۋ قاجەتتىگىن باسا ايتتى.
كۇندەلىكتى الدىما سان ءتۇرلى تاعدىر يەلەرى نەبىر قيىن جاعدايمەن كەلگەندە, باسپانالى بولعىسى كەلەتىن ەل ازاماتتارىنا قارجىلىق ساۋاتتىلىق قانشالىقتى قاجەت ەكەنىن ايقىن تۇسىنەسىڭ. ءۇي العىسى كەلەتىن ازاماتتارىمىز باسپانا الۋ بويىنشا نەسيە راسىمدەيىن دەسە, باسقا بانكتەرگە قارىزىن ۋاقىتىلى وتەي الماي, بورىشكەرلەر تىزىمىندە ءجۇر. ازىق-تۇلىك باعاسىنىڭ قىمباتتاپ كەتۋىنەن تاماقتى نەسيەگە الۋعا ءماجبۇر قازاقستاندىقتاردىڭ ءومىر ءسۇرۋ ساپاسىن ارتتىرۋ تۇرعىسىنان قارجىلىق ساۋاتتىلىقتى كوتەرۋ, وسى باعىتتاعى جۇمىستاردى جولعا قويۋ اسا ماڭىزدى.
جالپى ەل ازاماتتارىنىڭ ءوز قارىزىن قينالماي وتەپ, نەسيەسىن ۋاقىتىلى تولەۋى ءۇشىن بەلگىلى ءبىر دەڭگەيدە ارنايى جەڭىلدىكتەر قاراستىرىلعانىن قالايمىن. باسپانالى بولعىسى كەلەتىن حالقىمىزدىڭ ءۇيدى ساتىپ الۋعا شاماسى كەلە بەرمەيدى. ءوزىنىڭ جەكە شاڭىراعىن ارماندايتىن وتانداستارىمىز يپوتەكالىق نەسيەگە جۇگىنىپ, كومەگىمىزدى اسىعا كۇتەدى. وسى باعىتتا ەل ازاماتتارىنىڭ باسپانالى بولۋىنا جان-جاقتى قولداۋ كورسەتىلىپ, ءوز ۇيىنە قول جەتكىزۋىنە جەڭىلدەتىلگەن نەسيەلەر قاراستىرىلسا يگى ءىس بولار ەدى. بۇل كەزەكتە نەسيە بەرۋ ءتارتىبىنىڭ زاڭدىلىعىنا دا ءتيىستى وزگەرىس ەنگىزىلىپ, ءار ادامنىڭ كۇندەلىكتى كۇنكورىس دەڭگەيىن ەسەپتەپ, تولەم قابىلەتىنە تالداۋ جۇرگىزىپ, سول بويىنشا نەسيە راسىمدەگەن دۇرىس. سول كەزدە عانا نەسيە بەرەتىن بانك تە, قارىز الۋشى بورىشكەر دە ۇتىلماي, نەسيە ۋاقىتىلى وتەلەدى. قىسقاسى, قارجىلىق ساۋاتتىلىعىمىز ارتپاي, قارجى توڭىرەگىندەگى قوردالانعان ماسەلەلەر دە وڭ شەشىم تاپپايدى.
ءمادينا اجىكەنوۆا,
استانا قالاسى ءماسليحاتىنىڭ دەپۋتاتى
