قازاق ايەلى, جەرلەسىمىز نازگۇل بالمۇحان – بريۋسسەل پارلامەنتى دەپۋتاتتىعىنا ۇمىتكەر, دەپ حابارلايدى astana-akshamy.kz.
ول وسى جەكسەنبىدە وتەتىن پارلامەنت سايلاۋىنا, بەلگيانىڭ اشىق فلاماندتىق ليبەرالدار جانە دەموكراتتار پارتياسىنىڭ اتىنان ءتۇسىپ, باق سىناماق.
قاراعاندىنىڭ تۋماسى 90-جىلداردىڭ باسىندا جۇمىس بابىمەن بەلگياعا بارىپ, سول جەردە وتباسىن قۇرعان. ەكى بالانىڭ اناسى. بريۋسسەلدەگى سوتتا ورىس, اعىلشىن, فرانتسۋز, نيدەرلاند تىلدەرىنەن ءتارجىمالايتىن اۋدارماشى. قازىر پارتيالاستارىمەن بىرگە ساياسي ناۋقانعا قىزۋ دايىندىق ۇستىندە.
– بريۋسسەل پارلامەنتىنە ءوتىپ جاتسام سايلاۋشىلاردىڭ كۇندەلىكتى تۇرمىسىن جاقسارتۋ ءۇشىن كوپ ءىس اتقارار ەدىم. سونداي-اق مەن بريۋسسەل مەن استانانىڭ, بەلگيا مەن قازاقستاننىڭ پارلامەنتتىك دەلەگاتسيالارىنىڭ اراسىنداعى دوستىق قاتىناستى دامىتۋعا بار كۇش-جىگەرىمدى سالامىن. جانە ەكى ەل ازاماتتارىنىڭ بايلانىسىن نىعايتۋعا تىرىسامىن, – دەيدى بەلگيانىڭ اشىق فلاماندتىق ليبەرالدار مەن دەموكراتتار پارتياسىنىڭ مۇشەسى نازگۇل بالمۇحان.
– نازگۇل بالمۇحان ادامداردى سەندىرۋگە مىقتى. ەگەر ول ءبىر ءىستى باستاسا, سوڭىنا دەيىن جەتكىزبەي, تىنبايدى. ول كۇنى بويى ءۇيدى-ءۇيدى ارالاپ, پوشتا جاشىكتەرىنە اقپاراتتاردى سالىپ, سايلاۋشىلاردىڭ سەنىمىنە يە بولۋعا تىرىسىپ ءجۇر. ول قازاق قوعامى, بريۋسسەل قوعامى ءۇشىن ايانباي ەڭبەكتەنەدى. سوندىقتان, ول – لايىقتى كانديدات, – دەيدى سۆەن گاتتس, بريۋسسەلدىڭ قارجى جانە بيۋدجەت ءمينيسترى, “Open vld” پارتياسىنىڭ مۇشەسى.
دەرەككوز: https://qazaqstan.tv/news/194872/
