قازاقستاندا 226 مىڭ ەتنيكالىق نەمىس, ال گەرمانيادا قازاقستاننان قونىس اۋدارعان 1 ميلليونعا جۋىق نەمىس تۇرادى, دەپ حابارلايدى astana-akshamy.kz
بۇگىن استانادا قازاقستان مەن گەرمانيا اراسىنداعى مادەني-گۋمانيتارلىق ىنتىماقتاستىقتى كۇشەيتۋ جانە ەلىمىزدەگى نەمىس ەتنوسىنىڭ تۇرمىس-تىرشىلىگىن تالقىلاۋ ماقساتىندا قازاقستان رەسپۋبليكاسىندا تۇراتىن ەتنيكالىق نەمىستەردىڭ ماسەلەلەرى جونىندەگى قازاقستان-گەرمانيا ۇكىمەتارالىق كوميسسياسىنىڭ 20-شى وتىرىسى ءوتتى.
وتىرىس قازاق تاراپىنان سىرتقى ىستەر ءمينيسترىنىڭ ورىنباسارى رومان ۆاسيلەنكو, گەرمان تاراپىنان بۋندەستاگ دەپۋتاتى, فەدەرالدىق ۇكىمەتتىڭ قونىس اۋدارۋشىلار جانە ازشىلىق ۇلتتار ىستەرى جونىندەگى وكىلەتتى ۋاكىلى ناتالي پاۆليكتىڭ توراعالىعىمەن ءوتتى. كوميسسيا جۇمىسىنا ەكى ەلدىڭ سالالىق مينيسترلىكتەرى مەن ۇيىمدارىنىڭ, سونداي-اق «ۆوزروجدەنيە» قازاقستاننىڭ نەمىستەرى بىرلەستىگى» قوعامدىق قورىنىڭ وكىلدەرى دە قاتىستى.
ءىس-شارانىڭ كۇن ءتارتىبى بويىنشا تاراپتار قازاقستان مەن گەرمانيا اراسىنداعى ىنتىماقتاستىق جانە قازاقستان نەمىستەرىنىڭ مادەني, تىلدىك جانە ۇلتتىق بىرەگەيلىگىن قولداۋ شارالارى, سونداي-اق عىلىم, ءبىلىم جانە مادەنيەت سالالارىنداعى بىرلەسكەن جوبالاردى ىسكە اسىرۋ بويىنشا پىكىر الماستى.
كوميسسيانىڭ تەڭ توراعالارى ۇاك اياسىنداعى ىنتىماقتاستىقتى كەڭەيتۋگە دەگەن بىرلەسكەن ۇمتىلىستى راستاپ, قازاقستان مەن گەرمانيانى بايلانىستىراتىن «جاندى كوپىردى» كۇشەيتۋ ءۇشىن بىرلەسكەن ءىس-قيمىلدى جالعاستىرۋعا ۋاعدالاستى.
ستاتيستيكاعا سۇيەنسەك, قازاقستاندا 226 مىڭ ەتنيكالىق نەمىس, ال گەرمانيادا قازاقستاننان قونىس اۋدارعان 1 ميلليونعا جۋىق نەمىس تۇرادى.
ر.ۆاسيلەنكو اتاپ وتكەندەي, قازاقستاننىڭ كوپۇلتتى حالقى رەسپۋبليكامىزدىڭ تابىستى دامۋىنىڭ ماڭىزدى فاكتورلارىنىڭ ءبىرى.
«تاريحتىڭ جازۋىمەن قازاقستاندا كوپتەگەن نەمىس دياسپوراسى, ال گەرمانيادا قونىس اۋدارعان بۇرىنعى وتانداستارىمىز تۇراتىنىن ايتقان ديپلومات مەملەكەتتەرىمىز اراسىنداعى ايتارلىقتاي قاشىقتىققا قاراماستان قازاق-گەرمان بايلانىستارى بەلسەندى نىعايتىلىپ, حالىقتارىمىز ءبىر-بىرىنە جاقىنداي تۇسكەنىن جەتكىزدى», – دەدى ديپلومات.
ۇلتى نەمىس قازاقستاندىقتار ەلىمىزدىڭ بارلىق سالالارىندا قىزمەت ەتىپ كەلەدى. استاناداعى قازاق-نەمىس ورتالىعى, الماتىداعى قازاق-نەمىس ۋنيۆەرسيتەتى, اقتاۋداعى قازاق-نەمىس تۇراقتى ينجەنەريا ينستيتۋتى, نەمىس دراما تەاترى, «Deutsche Allgemeine Zeitung» گازەتى سياقتى قۇرىلىمداردىڭ بارلىعى قازاقستان مەن گەرمانيا اراسىنداعى مادەني-گۋمانيتارلىق بايلانىستى نىعايتۋعا ماڭىزدى ۇلەس قوسىپ كەلەدى.
وسى ورايدا, قازاق تاراپى گەرمانيا بيلىگىمەن مادەنيەت, ءبىلىم جانە الەۋمەتتىك سالالارداعى ارىپتەستىككە ەرەكشە ءمان بەرەدى. بۇل ءوز كەزەگىندە قازاقستانداعى ەتنيكالىق نەمىستەردىڭ جارقىن كەلەشەگىنە جانە ولاردىڭ ەكى ەل اراسىنداعى ءوزارا ءتيىمدى ىنتىماقتاستىققا ءوز ۇلەستەرىن قوسا الۋلارى ءۇشىن مۇمكىندىك بەرەدى.
ءوز كەزەگىندە ن.پاۆليك ەكىجاقتى ىنتىماقتاستىق سەرپىنىن جوعارى باعالاپ, قازاقستان گەرمانيانىڭ ورتالىق ازياداعى نەگىزگى ارىپتەسى ەكەنىن اتاپ ءوتتى. گەرمان تاراپىنىڭ تەڭ توراعاسى گفر ۇكىمەتىنىڭ قازاقستاندا تۇراتىن ەتنيكالىق نەمىستەرگە كورسەتىپ كەلە جاتقان قولداۋى مەن بولاشاق جوسپارلارى تۋرالى حاباردار ەتتى. ونىڭ ايتۋىنشا, قازاقستاندا نەمىس ءتىلىن وقىتۋدى دامىتۋ نەمىس ەتنوسىنىڭ ۇلتتىق بىرەگەيلىگىن ساقتاۋعا ىقپال ەتىپ قانا قويماي, بىرلەسكەن ينۆەستيتسيالىق جوبالار ءۇشىن كاسىبي ماماندار دايارلاۋعا جاقسى نەگىز بولماق.
وتىرىس قورىتىندىسى بويىنشا ۇكىمەتارالىق ىنتىماقتاستىقتىڭ دامىتۋدى كوزدەيتىن كومميۋنيكەگە قول قويىلدى.
