پاكىستان ۇلتتىق ونەر كەڭەسىندە قازاقستاننىڭ پاكىستانداعى ەلشىلىگىمەن بىرلەسىپ ۋردۋ تىلىنە اۋدارىلعان «قازاق حاندىعى. التىن تاق» تاريحى ءفيلمىنىڭ كورسەتىلىمى ءوتتى, دەپ حابارلايدى astana-akshamy.kz.
ءىس-شاراعا قۇرمەتتى قوناق رەتىندە پاكىستاننىڭ اقپارات جانە تەلەراديوتاراتۋ, ۇلتتىق مۇرا جانە مادەنيەت ءمينيسترى اتاۋللا تارار قاتىستى.
سالەمدەسۋ سوزىندە پاكىستاندىق ساياساتكەر ەكى ەل اراسىنداعى مادەني بايلانىستاردى دامىتۋدىڭ ماڭىزدىلىعىن, وسىنداي ءىس-شارالار ازاماتتاردىڭ ءوزارا تۇسىنىسپەۋشىلىگى مەن قارىم-قاتىناسىن نىعايتاتىنىن اتاپ ءوتتى.
قازاقستاننىڭ پاكىستانداعى ەلشىسى ەرجان قىستافين مادەني ىنتىماقتاستىق بويىنشا جۇرگىزىلىپ وتىرعان جۇمىستار تۋرالى, پاكىستان مەن قازاقستاندا دا وسىنداي ءىس-شارالاردى تۇراقتى نەگىزدە ۇيىمداستىرۋ نيەتىن ءبىلدىردى. وسى جىلى اقپارات سالاسىنداعى ىنتىماقتاستىق تۋرالى مەموراندۋمعا قول قويۋ جوسپارى تۋرالى ايتتى.
ءفيلمنىڭ كورسەتىلىمىنە پاكىستاننىڭ رەسمي, ىسكەرلىك, اكادەميالىق, شىعارماشىلىق ورتا وكىلدەرى شاقىرىلدى. ءفيلمنىڭ كورسەتىلىمى پاكىستاندىق كورەرمەندەردىڭ زور ىلتيپاتىمەن اياقتالدى.
ءىس-شارا قوناقتارى كينو يندۋستريا سالاسىنداعى قازاق شەبەرلەرىنىڭ جۇمىسىن جوعارى باعالاپ, ەكى ەل مادەنيەتى مەن ءداستۇرىنىڭ ورتاق تۇستارىن اتاپ ءوتتى.
