قازاقستاننىڭ ىستانبۇلداعى باس كونسۋلدىعىنىڭ ۇيىمداستىرۋىمەن تالانتتى جاس قازاق قالامگەرى جاميليا باقتيارقىزىنىڭ جەتى تىلدە باسىلىپ شىققان بەستسەللەرى «بايشەشەك» كىتابىنىڭ تۇرىك تىلىندەگى نۇسقاسىنىڭ تۇساۋكەسەرى ءوتتى, دەپ حابارلايدى astana-akshamy.kz.
ءىس-شاراعا تۇركياداعى قازاق دياسپوراسىنىڭ وكىلدەرى, ستۋدەنتتەر, سونداي-اق, ادەبيەت سۇيەر قاۋىم قاتىستى.
شىنايىلىق جانە شابىتپەن جازىلعان «بايشەشەك» كىتابى جاميليانىڭ ومىرىندەگى جاستىق شاعىنا ارنالعان. كىتاپتا اۆتوردىڭ قايسارلىعى مەن ءومىر سۇرۋگە دەگەن ەرىك-جىگەرىنىڭ ارقاسىندا 10 جىل بويى بىرتە-بىرتە بۇكىل دەنەسىنە تاراعان اۋىر دەرتپەن كۇرەسىپ, ونى جەڭە العانى تۋرالى باياندالادى.
دۇنيەجۇزى قازاقتار قاۋىمداستىعىنىڭ تۇركياداعى وكىلى ەرجان ۋايس «بايشەشەك» كىتابىندا قيىندىققا بەرىلمەي, توتەپ بەرۋ ماعىنانىڭ قانشالىقتى ماڭىزدى ەكەنىن, وقىرماندى شابىتتاندىراتىن وقيعا ەكەنىن جانە شىعارمانىڭ ءومىردى باعالاي بىلۋگە جانە تۇلعانىڭ وزىنە دەگەن سەنىمىن جوعالتپاۋعا ۇيرەتەتىنىن اتاپ ءوتتى.
ءىس-شارا سوڭىندا باس كونسۋل نۋريددين امانكۋل جاميليا باقتيارقىزىنىڭ قايسارلىعى اسىرەسە جاس بۋىنعا جىگەر بەرەتىنىن, سونداي-اق تاباندىلىق پەن ءۇمىت بولسا جەتىستىكتىڭ جولى تابىلاتىندىعىنىڭ دالەلى ەكەنىن ايتتى.
