جەلىدە قازاق تىلىندەگى ەڭ العاشقى اۋديوجازبا جاريالاندى. اۋديودىبىس 1904 جىلى تاسپالانعان, دەپ حابارلايدى astana-akshamy.kz ورتالىق مەملەكەتتىك كينو-فوتوقۇجاتتار مەن دىبىس جازبالار ءارحيۆىنىڭ Instagram-داعى پاراقشاسىنا سىلتەمە جاساپ.
«قازاقستاننىڭ العاشقى اۋديوجازباسى: ەستۋىڭىز كەرەك وتكەن زاماننىڭ داۋىسى. ءبىزدىڭ ارحيۆتەن تىڭداڭىز!», – دەيدى ارحيۆ ماماندارى. مەكەمە مالىمەتىنشە, بۇل – قازاقستان تاريحىنداعى ەڭ ەسكى اۋديوجازبا جانە ول 1904 جىلى تاسپالانعان. اۋديوجازبادا قازاق جىگىتى 1 سانىنان 165-كە دەيىنگى ساندى قازاق تىلىندە ساناپ شىعادى. ياعني, ساناماق دىبىستالعان.
ايتا كەتەلىك, مادەنيەت جانە اقپارات مينيسترلىگى ارحيۆ, قۇجاتتاما جانە كىتاپ ءىسى كوميتەتىنىڭ مالىمەتىنە سۇيەنسەك, 1974 جىلعى اقپاندا قازاق كسر وما بولىمدەرىنىڭ بازاسىندا قازاق كسر ورتالىق مەملەكەتتىك عىلىمي-تەحنيكالىق قۇجاتتاما ءارحيۆى جانە قازاق كسر ورتالىق مەملەكەتتىك كينو-فوتوقۇجاتتار مەن دىبىس جازبالار ءارحيۆى قۇرىلدى. قازىرگى ۋاقىتتا قازاقستان رەسپۋبليكاسىنىڭ ورتالىق مەملەكەتتىك ءارحيۆى – ءوز قورلارىندا 1 ملن 500 مىڭنان استام ءىسى بار ەلىمىزدەگى ەڭ ءىرى كوپ سالالى ارحيۆ, سونداي-اق, كەڭەس داۋىرىنە دەيىنگى بىرەگەي قۇجاتتاردىڭ رەسپۋبليكاداعى جالعىز قويماسى.
فوتو:https://daboom.ru
