قازاقستان مەن وڭتۇستىك كورەيا استانالارى قايتادان تىكەلەي اۋە قاتىناسىمەن بايلانىستى
قازاقستان مەن وڭتۇستىك كورەيا استانالارى قايتادان تىكەلەي اۋە قاتىناسىمەن بايلانىستى, دەپ حابارلايدى astana-akshamy.kz.
قازاقستان رەسپۋبليكاسىنىڭ كولىك مينيسترلىگى تۇراقتى نەگىزدە رەيستەر سانىن ودان ءارى ۇلعايتۋ جانە قازاقستاننان ۇشۋ گەوگرافياسىن كەڭەيتۋ بويىنشا جۇمىستى جالعاستىرۋدا.
جاقىندا كورەيا رەسپۋبليكاسىنىڭ پرەزيدەنتى يۋن سوك ءيولدىڭ قازاقستان رەسپۋبليكاسىنا رەسمي ساپارى بارىسىندا ەكى ەلدىڭ مەملەكەت باسشىلارى ەكىجاقتى ىنتىماقتاستىقتى نىعايتۋ ماقساتىندا ەكى ەلدىڭ استانالارى – استانا مەن سەۋل اراسىندا تىكەلەي اۋە قاتىناسىن قايتا باستاۋدىڭ ماڭىزدىلىعىن اتاپ ءوتتى.
15 ماۋسىم كۇنى قازاقستان مەن وڭتۇستىك كورەيا اراسىندا تىكەلەي اۋە قاتىناسىنىڭ رەسمي اشىلۋ ءراسىمى ءوتتى. رەسمي ءىس-شاراعا قازاقستان رەسپۋبليكاسىنىڭ كولىك ۆيتسە-ءمينيسترى تالعات لاستاەۆ, ازاماتتىق اۆياتسيا كوميتەتىنىڭ توراعاسى سالتانات تومپيەۆا, قازاقستان رەسپۋبليكاسىنىڭ كورەيا رەسپۋبليكاسىنداعى توتەنشە جانە وكىلەتتى ەلشىسى نۇرعالي ارىستانوۆ, سونداي-اق كورەيا رەسپۋبليكاسىنىڭ قازاقستان رەسپۋبليكاسىنداعى ەلشىسىنىڭ كەڭەسشىسى سين كيۋحو قاتىستى.
بيىلعى اقپان-ناۋرىز ايلارىندا ەكى ەلدىڭ اۆياتسيالىق بيلىگىنىڭ كەلىسسوزدەرىنىڭ ناتيجەسى بويىنشا استانا – سەۋل باعىتى بويىنشا اۋە قاتىناسى قالپىنا كەلتىرىلدى. وسى كەلىسسوزدەر بارىسىندا ەكى ەل اراسىنداعى اۋە رەيستەرىنىڭ سانىن ارتتىرۋ ماقساتىندا شارتتىق-قۇقىقتىق بازانى كەڭەيتۋ تۋرالى كەلىسىمگە قول جەتكىزىلدى.
استانا-سەۋل باعىتى بويىنشا ۇشۋلاردى «ەير استانا» اۋە كومپانياسى اپتاسىنا 2 رەت (سارسەنبى جانە سەنبى كۇندەرى) «ەيرباس-ا321» ۇلگىسىندەگى اۋە كەمەلەرىندە ورىندايتىن بولادى.
اۋە مارشرۋتتى ىسكە قوسۋ قازاقستان رەسپۋبليكاسى مەن كورەيا رەسپۋبليكاسى اراسىنداعى ساۋدا-ەكونوميكالىق, ىسكەرلىك جانە تۋريستىك ىنتىماقتاستىقتى ودان ءارى دامىتۋعا ىقپال ەتەتىن بولادى.
