12 ماۋسىمدا ەلوردادا «قازاقستان قۇستارى. دالالىق انىقتاعىش» اتتى كىتاپتىڭ رەسمي تۇساۋكەسەرى ءوتتى. بۇل – 2014 جىلى قازاقستان قۇستاردى قورعاۋ وداعىنىڭ باستاماسىمەن ورىس تىلىندە شىققان كىتاپتىڭ اۋدارماسى. وندا ەل اۋماعىندا تۇراتىن قۇستاردىڭ 516 ءتۇرى تۋرالى مالىمەتتەر بار, دەپ حابارلايدى astana-akshamy.kz.
اۆتورلار ۇجىمى – قازاقستانداعى قۇستاردى بىرنەشە جىلدان بەرى زەرتتەپ جۇرگەن كاسىبي ورنيتولوگتەر: اناتولي كوۆشار, ۆيكتوريا كوۆشار, نيكولاي بەريوزوۆيكوۆ. انىقتاعىشتاعى قۇستاردىڭ سۋرەتتەرىنىڭ اۆتورى – ۆاديم ريابيتسەۆ. كىتاپتى قازاق تىلىنە اۋدارعاندار – بەلگىلى كاسىبي زوولوگتەر, قازاق تىلىندەگى زوولوگيا وقۋلىقتارىنىڭ اۆتورلارى بىرلىكباي ەسجانوۆ پەن قىلىشبەك مۇسابەكوۆ.
«شىنىمدى ايتسام, مەن 50 جىلدان استام ۋاقىت بويى قۇستارمەن اينالىستىم. ەگەر كىتاپتىڭ ارتقى جاعىنا قاراساڭىز, اۆتور سۋرەتتەرى بار. ەكىنشى اۆتور – اكەم اناتولي كوۆشار. ول مەنى العاش رەت 9 جاسىمدا قۇستاردى زەرتتەۋگە ارنالعان ەكسپەديتسياعا اپاردى. جالپى, مەنىڭ بۇكىل ءومىرىم تەك قۇستارمەن بايلانىستى», – دەيدى ۆيكتوريا كوۆشار.
كىتاپتىڭ ورىس تىلىندەگى نۇسقاسى – 1 000, قازاق تىلىندەگى نۇسقاسى 2000 دانا.
«قازاقستان عىلىمى قازاق تىلىندە تاعى ءبىر قۇندى باسىلىممەن تولىقتى. بۇل كىتاپ قازاقستاندا مەكەندەيتىن بارلىق قۇستاردى انىقتاۋعا كومەكتەسىپ قانا قويماي, وقىرمانعا ءبىزدىڭ ورنيتوفاۋنامىز تۋرالى كوپتەگەن قوسىمشا اقپارات بەرەدى. انىقتاعىشتىڭ قازاق تىلىندەگى باسىلىمىن شىعارۋ – اسبك ماماندارىنىڭ زور ەڭبەگى», – دەيدى بىرلىكباي ەسجانوۆ.
