قر سىرتقى ىستەر مينيسترلىگى قازاقستان باس رەداكتورلار كلۋبىمەن ءوزارا سەرىكتەستىك شەڭبەرىندە قازاقستان تۋرالى ماتەريالداردى جازاتىن, تۇسىرەتىن شەتەلدىك جۋرناليستەر ءۇشىن «قازاقستان شەتەلدىك باق كوزىمەن» اتتى 9-بايقاۋىنا وتىنىمدەردى قابىلداۋدى باستادى, دەپ حابارلايدى astana-akshamy.kz.
2014 جىلدان باستاپ بايقاۋ قازاقستاندىق بولمىستىڭ ءارتۇرلى اسپەكتىلەرىن بارىنشا كرەاتيۆتى, شىنايى جانە وبەكتيۆتى تۇردە جاريالايتىن شەتەلدىك اۆتورلاردىڭ جازبا جانە بەينەماتەريالدارىن ىرىكتەيدى. قازىرگى ۋاقىتتا الەۋمەتتىك جەلىلەر ساپالى كونتەنتتى ۇسىنۋدا نەعۇرلىم ماڭىزدى ءرول اتكارۋدا, سوندىقتان ءبىز بلوگەرلەر مەن الەۋمەتتىك پلاتفورمالاردىڭ بەلسەندى پايدالانۋشىلارىنىڭ قازاقستانعا بىرەگەي كوزقاراسىمەن بولىسۋگە قاتىسۋىن شىن جۇرەكتەن قۇپتايمىز.
بايقاۋعا قاتىسۋعا 2023 جىلعى 1 تامىزدان 2024 جىلعى 1 تامىزعا دەيىنگى ارالىقتا قازاقستان تۋرالى شەتەلدىك باق-تا نەمەسە الەۋمەتتىك جەلىلەردە جاريالانعان اقپاراتتىق (اناليتيكالىق, مادەني ويىن-ساۋىق, دەرەكتى جانە ت.ب.) ماتەريالداردى قامتيتىن وتىنىشتەر قابىلدانادى.
جەڭىمپازدار استانا, الماتى قالالارى مەن ماڭعىستاۋ وبلىسىنا ساپار شەگۋ جۇلدەسىنە يە بولادى. ساپار بارىسىندا مازمۇندى مادەني باعدارلاما جوسپارلانعان.
بيىل «Kazakh Tourism» ۇلتتىق كومپانياسى» اق, ازياداعى ءوزارا ءىس-قيمىل جانە سەنىم شارالارى جونىندەگى كەڭەسىنىڭ (اوسشك) حاتشىلىعى, «KazAID» قازاقستاندىق حالىقارالىق دامۋ اگەنتتىگى», ۇلتتىق سپورت قاۋىمداستىعى جانە «Jibek Joly» ۇلتتىق تەلەارناسى بايقاۋدىڭ سەرىكتەستەرى اتاندى.
نەگىزگى تاقىرىپتان باسقا وسى جىلى «KazAID» جانە ۇلتتىق سپورت قاۋىمداستىعى اتىنان جاڭا نوميناتسيالار ۇسىنىلادى, ولاردىڭ اياسىندا ەكى جەڭىمپاز ايقىندالاتىن بولادى.
بايقاۋ قورىتىندىسى بويىنشا بەس گەوگرافيالىق ايماقتان بەس جەڭىمپاز انىقتالادى:
– سولتۇستىك جانە وڭتۇستىك امەريكا;
– ەۋروپا;
– تمد;
– تاياۋ شىعىس جانە افريكا;
– ازيا-تىنىق مۇحيت ءوڭىرى
جانە تۋريزم, اوسشك, «KazAID» پەن ۇلتتىق سپورت تۇرلەرى تاقىرىپتارىنا قاتىستى نوميناتسيالار بويىنشا ءتورت لاۋرەات.
سونىمەن بىرگە, قالىپتاسقان داستۇرگە سايكەس, بايقاۋ جەڭىمپازدارىنا ارنايى مەملەكەتتىك سەكتور وكىلدەرىمەن, ساراپشىلار جانە جۋرناليستەرمەن, قازاقستاننىڭ عىلىم جانە مادەنيەت قايراتكەرلەرىمەن كەزدەسۋلەر ۇيىمداستىرىلاتىن بولادى.
بايقاۋ جەڭىمپازدارىنىڭ قۇرامىنا قر سىرتقى ىستەر مينيسترلىگىنىڭ, قازاقستاننىڭ باس رەداكتورلار كلۋبىنىڭ, «Kazakh Tourism», اوسشك, «KazAID», ۇلتتىق سپورت قاۋىمداستىعىنىڭ, سونداي-اق «Jibek Joly» تەلەارناسىنىڭ باسشىلارى مەن جاۋاپتى قىزمەتكەرلەرى كىرەتىن قازىلار القاسى ايقىندايتىن بولادى.
بارلىق جۇمىستار 2024 جىلعى 1 تامىزدان كەشىكتىرىلمەي mediacontest2024@mfa.kz ەلەكتروندى پوشتاسىنا جىبەرىلۋى ءتيىس.
بايقاۋ ناتيجەلەرىن 2024 جىلعى 5 تامىزعا دەيىن جاريالاۋ جوسپارلانۋدا.
قوسىمشا اقپارات الۋ ءۇشىن mediacontest2024@mfa.kz پوشتاسىنا نەمەسە +77172720987 جۇمىس تەلەفونىنا حابارلاسۋعا بولادى.
