ۇكىمەتتە ۆيتسە-پرەمەر سەرىك جۇمانعاريننىڭ توراعالىعىمەن وتكەن كەڭەستە الەۋمەتتىك ماڭىزى بار ازىق-تۇلىك ونىمدەرىنىڭ باعاسىنا قاتىستى جاعداي قارالدى, دەپ حابارلايدى astana-akshamy.kz. Primeminister.kz سايتىنا سىلتەمە جاساپ.
«ءبىر اپتا ىشىندە 10 ءتۇرلى تاۋاردىڭ, اتاپ ايتساق: قىرىققابات (9,7%), پياز (1,3%), قاراقۇمىق جارماسى (1,1%), تاۋىق ەتى (0,6%), كۇرىش (0,4%), كۇنباعىس مايى (0,4%), ماكارون ءونىمى (0,2%), قانت, سۇزبە جانە ۇن باعاسى (0,1%) تومەندەدى. جالپى, ەلىمىزدە نەگىزگى ازىق-تۇلىك باعاسىنىڭ يندەكسى 0,1%-عا تومەندەپ وتىر. باعا 11 وبلىستا, اسىرەسە الماتى, پاۆلودار, شىعىس قازاقستان جانە باتىس قازاقستان وبلىستارىندا ايتارلىقتاي تومەندەدى», — دەپ اتاپ ءوتتى ساۋدا جانە ينتەگراتسيا ءبىرىنشى ۆيتسە-ءمينيسترى ايجان بيجانوۆا.
وڭتۇستىك وڭىرلەردە ەرتە پىسەتىن كوكونىستەردى جيناۋ ناۋقانى باستالىپ جاتىر. اۋىل شارۋاشىلىعى ۆيتسە-ءمينيسترى ەربول تاسجۇرەكوۆتىڭ ايتۋىنشا, ەرتە پىسەتىن كارتوپ – 219 مىڭ توننا, قىرىققابات – 105 مىڭ توننا, ءسابىز – 32 مىڭ توننا, پياز – 66 مىڭ توننا كولەمىندە كۇتىلۋدە. بۇل كولەم ماۋسىم-شىلدە ايلارىندا حالىقتىڭ اتالعان كوكونىستەرگە دەگەن قاجەتتىلىگىن قاناعاتتاندىرۋعا جەتكىلىكتى.
«وندىرۋشىلەردەن مەگاپوليستەرگە تىكەلەي جەتكىزۋدى قامتاماسىز ەتۋ ءۇشىن اقمولا, الماتى, شىعىس قازاقستان, جامبىل, جەتىسۋ, قاراعاندى, پاۆلودار, سولتۇستىك قازاقستان جانە تۇركىستان وبلىستارىنداعى اۋىل شارۋاشىلىعى ءونىمىن وندىرۋشىلەردىڭ ءتىزىمى قۇرىلدى, بارلىعى 900-دەن استام كاسىپورىن. مالىمەتتەر استانا, الماتى جانە شىمكەنت اكىمدىكتەرىنە كوكونىستەردى جەتكىزۋ كەلىسىمدەرىن جاساۋ ءۇشىن بەرىلدى», — دەپ اتاپ ءوتتى ەربول تاسجۇرەكوۆ.
كەڭەس قورىتىندىسى بويىنشا سەرىك جۇمانعارين اكىمدىكتەرگە الداعى ماۋسىمارالىق كەزەڭدە ەرتە پىسەتىن جانە كۇزگى كوكونىستەردى جەتكىزۋ ءۇشىن كەلىسىمگە وتىرۋ جۇمىستارىن جانداندىرۋدى تاپسىردى.
