قازاقستاندا اەس سالۋ ماسەلەسىن تالقىلاۋ ماقساتىندا بۇگىن جەزقازعان قالاسىندا قالانىڭ «ۇلىتاۋ جاستارى» قوعامدىق بىرلەستىگىنىڭ باستاماسىمەن جاريا تالقىلاۋلار ءوتتى, دەپ حابارلايدى astana-akshamy.kz.
جاريا تالقىلاۋلارعا ءوڭىر تۇرعىندارى, جەرگىلىكتى قوعامدىق كەڭەستىڭ, ارداگەرلەر كەڭەسىنىڭ مۇشەلەرى, وبلىستىق جانە قالالىق ءماسليحاتتاردىڭ دەپۋتاتتارى, قر ەنەرگەتيكا مينيسترلىگىنىڭ, «قازاقستاندىق اتوم ەلەكتر ستانتسيالارى» جشس, «يادرولىق فيزيكا ينستيتۋتى» رمك, «ءۇلبى مەتاللۋرگيا زاۋىتى» اق, قازاقستان حالقى اسسامبلەياسىنىڭ, شاعىن, ورتا جانە ءىرى بيزنەستىڭ, جاستار جانە ۇكىمەتتىك ەمەس ۇيىمداردىڭ, باق وكىلدەرى, جەرگىلىكتى بەلسەندىلەر, ەكولوگتار, ەنەرگەتيكتەر جانە ت.ب. قاتىستى.
سپيكەرلەر رەتىندە قر ەنەرگەتيكا مينيسترلىگى, «قازاقستاندىق اتوم ەلەكتر ستانتسيالارى» جشس, «يادرولىق فيزيكا ينستيتۋتى» رمك, «ءۇلبى مەتاللۋرگيا زاۋىتى» اق ءسوز سويلەدى.
سپيكەرلەر ءوز سوزىندە قازىرگى تاڭدا قازاقستاننىڭ ەنەرگەتيكا سەكتورىنداعى باسىم باعىتتاردىڭ ءبىرى اتوم ەنەرگەتيكاسىن دامىتۋ بولىپ تابىلاتىنىن اتاپ ءوتتى. ەلەكتر ەنەرگياسىن تۇتىنۋدىڭ ءوسۋىن ەسكەرە وتىرىپ, قازاقستان ەلدىڭ قاجەتتىلىگىن تۇراقتى قامتاماسىز ەتۋ ماقساتىندا جاڭا بازالىق قۋاتتاردى ىسكە قوسۋدى قاجەت ەتەدى. ەنەرگەتيكا سەكتورىندا قولدانىلاتىن تەحنولوگيالاردى دامىتۋدىڭ اعىمداعى دەڭگەيى جاعدايىندا اەس شىعاتىن قۋاتتاردى اۋىستىرۋدىڭ ەڭ پەرسپەكتيۆالى شەشىمى بولىپ تابىلادى. سونىمەن قاتار, قازاقستاننىڭ اتوم ەنەرگەتيكاسىن دامىتۋ ءۇشىن بارلىق ارتىقشىلىقتارى بار. ەلدە شيكىزات پەن وندىرىستىك بازانىڭ بولۋى اتوم ەنەرگەتيكاسىن دامىتۋدىڭ بارلىق العىشارتتارىن جاسايدى.
اتالعان ءىس-شارادا جەرگىلىكتى تۇرعىندار ەكولوگيا, ەكونوميكالىق فاكتورلار, ينفراقۇرىلىمدى دامىتۋ, اەس-ءتىڭ شاعىن جانە ورتا بيزنەستى دامىتۋعا اسەرى, رەاكتوردىڭ قاۋىپسىزدىگى, كادرلار دايارلاۋ بويىنشا بەلسەندى سۇراقتار قويدى.
