قازاقستان ليتي ءوندىرىسىن جولعا قويۋدى جوسپارلاپ وتىر. بۇل تۋرالى ونەركاسىپ جانە قۇرىلىس ءمينيسترى قانات شارلاپاەۆ ايتتى, دەپ حابارلايدى astana-akshamy.kz.
«كورەيا قازاقستاننىڭ ينۆەستيتسيا بويىنشا ەڭ ۇلكەن 5 سەرىكتەسىنىڭ ءبىرى سانالادى. قازىرگى تاڭدا كىا زاۋىتى سالىنۋدا. ونى كەلەسى جىلى اشامىز. بۇل – ونەركاسىپكە بايلانىستى ءبىرىنشى ماسەلە. ەكىنشىدەن, بۇگىندە كورەي گەولوگيالىق-گەوفيزيكالىق جانە مينەرالدى رەسۋرستار ينستيتۋتى قازاقستاندا سيرەك مەتالدارعا – ليتيگە گەولوگيالىق بارلاۋ جۇرگىزىپ جاتىر. وسىعان وراي بۇگىن كەلىسىمشارتقا قول قويامىز. وسى جۇمىستار اياقتالعاننان كەيىن ەلىمىزدە ليتي وندىرۋگە مۇمكىندىك بولادى. قازىرگى تاڭدا مۇنداي ءوندىرىس ەلىمىزدە جوق», – دەدى مينيستر بۇگىن اقوردادا.
ءمينيستردىڭ ناقتىلاۋىنشا, كورەيالىق ينستيتۋت ەلىمىزدىڭ شىعىس قازاقستان وبلىسىندا ليتي كەن ورنىنا بارلاۋ جۇرگىزىپ جاتىر. اتالعان مەتالدان كولىكتەرگە ارنالعان باتارەيالار شىعارىلادى.
ايتا كەتەيىك, بۇگىن اقوردادا مەملەكەت باسشىسى قاسىم-جومارت توقاەۆ پەن قازاقستانعا ۇشكۇندىك مەملەكەتتىك ساپارمەن كەلگەن وڭتۇستىك كورەيا پرەزيدەنتى يۋن سوك يول اراسىندا كەلىسسوزدەر وتەدى.
