قازاقستاندا ۇلتتىق رەيتينگ اگەنتتىگى قۇرىلادى, دەپ حابارلايدى, دەپ حابارلايدى astana-akshamy.kz
قارجى نارىعىنىڭ ينفراقۇرىلىمىن ودان ءارى دامىتۋ ماقساتىندا قازاقستان رەسپۋبليكاسىنىڭ قارجى نارىعىن رەتتەۋ جانە دامىتۋ اگەنتتىگى (بۇدان ءارى – اگەنتتىك) ۇلتتىق رەيتينگتىك اگەنتتىك تۋرالى زاڭ جوباسىن ازىرلەدى. قۇجات قازاقستاندىق كرەديتتىك رەيتينگتىك اگەنتتىكتى قۇرۋ ءۇشىن زاڭنامالىق نەگىز بولادى. جوبانى ازىرلەۋ كەزىندە باعالى قاعازدار جونىندەگى كوميسسيالاردىڭ حالىقارالىق ۇيىمىنىڭ (IOSCO) كرەديتتىك رەيتينگتىك اگەنتتىكتەردىڭ قىزمەتىنە قاتىستى ۇسىنىمدارى پايدالانىلدى.
زاڭ جوباسى شەڭبەرىندە رەيتينگتىك اگەنتتىك قىزمەتىنىڭ نەگىزگى قاعيداتتارى, كورپوراتيۆتىك باسقارۋعا, رەيتينگتىك قىزمەتتى ۇيىمداستىرۋعا, مۇددەلەر قاقتىعىسىن باسقارۋعا, اقپاراتتى جاريالاۋعا قويىلاتىن تالاپتار جانە IOSCO كرەديتتىك رەيتينگتىك اگەنتتىكتەرىنىڭ كاسىپتىك ءىس-قيمىل كودەكسىنە سايكەس باسقا دا تالاپتار بەلگىلەنەدى.
«قازاقستاندىق رەيتينگتىك اگەنتتىك نارىقتى ساپالى, وبەكتيۆتى جانە قولجەتىمدى رەيتينگتىك قىزمەتتەرمەن قامتاماسىز ەتۋ ءۇشىن قاجەت. مۇنداي رەيتينگتىك اگەنتتىكتىڭ پايدا بولۋى وبليگاتسيالار نارىعى ارقىلى ەكونوميكانىڭ ناقتى سەكتورىن قارجىلاندىرۋدى كەڭەيتۋگە, قارجىلىق تۇراقتىلىق تاۋەكەلدەرىن تومەندەتۋگە, سونداي-اق كرەديتتىك تاۋەكەلدەردى تاۋەلسىز باعالاۋ سالاسىندا قۇزىرەتتەر ورتالىعىن قۇرۋعا مۇمكىندىك بەرەدى», – دەپ اتاپ ءوتتى قازاقستان رەسپۋبليكاسىنىڭ قارجى نارىعىن رەتتەۋ جانە دامىتۋ اگەنتتىگىنىڭ توراعاسى ءمادينا ابىلقاسىموۆا.
رەيتينگتىك اگەنتتىكتىڭ قاتىسۋشىلارى قازاقستاندىق قارجى ۇيىمدارى, قارجى نارىعىنىڭ ينفراقۇرىلىمدىق ۇيىمدارى, دامۋ ينستيتۋتتارى بولادى دەپ كۇتىلۋدە. شەتەلدىك رەيتينگتىك اگەنتتىكتەردىڭ قازاقستاندىق رەيتينگتىك اگەنتتىكتىڭ ستراتەگيالىق سەرىكتەسى رەتىندە قاتىسۋى تۋرالى كەلىسسوزدەر جۇرگىزىلۋدە. وسى زاڭ جوباسىن قازاقستان رەسپۋبليكاسىنىڭ پارلامەنتىنە 2024 جىلدىڭ سوڭىنا دەيىن ەنگىزۋ جوسپارلانۋدا.
قازىرگى ۋاقىتتا قازاقستان رەسپۋبليكاسىنىڭ رەيتينگتىك قىزمەتتەر نارىعىندا S&P, Moody’s جانە Fitch حالىقارالىق رەيتينگتىك اگەنتتىكتەرى بار. سونىمەن بىرگە قازاقستان رەسپۋبليكاسى قارجى نارىعىن رەتتەۋ جانە دامىتۋ اگەنتتىگى باسقارماسىنىڭ 2023 جىلعى 31 شىلدەدەگى №67 قاۋلىسىمەن بىلىكتىلىك ولشەمشارتتارى نەگىزىندە شەتەلدىك رەيتينگتىك اگەنتتىكتەردى تانۋ راسىمدەرى قابىلداندى. وسى راسىمگە سايكەس, اسا ءىرى رەسەيلىك كرەديتتىك رەيتينگتىك اگەنتتىكتەرى تكرا مەن ەكسپەرت را تانىلدى, ولار بەلگىلەنگەن ولشەمشارتتارعا سايكەستىگىن راستادى. بۇل رەتتە ەاەو كەڭىستىگىندە بۇگىنگى تاڭدا بەس كرەديتتىك رەيتينگتىك اگەنتتىك جۇمىس ىستەيدى – تورتەۋى رەسەيلىك, بىرەۋى – بەلورۋسسيانىكى.
حالىقارالىق رەيتينگتىك اگەنتتىكتەردىڭ رەسمي سايتتارىنىڭ دەرەكتەرى بويىنشا 2022 جىلعى جاعداي بويىنشا 75 قازاقستاندىق كومپانيانىڭ حالىقارالىق رەيتينگتىك اگەنتتىكتەردىڭ 101 جاريا كرەديتتىك رەيتينگى بولعان. ونىڭ ىشىندە 19% – ەدب, 19% – ساقتاندىرۋ كومپانيالارى, 41% – مەملەكەتتىك سەكتور كومپانيالارى, 8% – ميكروقارجى كومپانيالارى, 7% – باسقا بانكتىك ەمەس قارجى ۇيىمدارى, 6% – جەكە قارجىلىق ەمەس كومپانيالار.
