قازاقستاندا جىلىنا 1 مىڭ جەتىم بالا اسىراپ الىنادى
ەلىمىزدە 21 مىڭ جەتىم بالانىڭ 17 600-ءى وتباسىلاردا تاربيەلەنۋدە. جىل سايىن ازاماتتار 1 مىڭعا جۋىق جەتىم بالانى ءوز وتباسىنا الادى, دەپ حابارلايدى astana-akshamy.kz.
تالىمگەرلىك ينستيتۋتى ەنگىزىلدى: 300 جۋىق ادام جەتىم بالالارعا تالىمگەر بولدى. بۇل تۋرالى وكق الاڭىندا وتكەن دوڭگەلەك ۇستەلدە قر وقۋ-اعارتۋ مينيسترلىگى بالالاردىڭ قۇقىقتارىن قورعاۋ كوميتەتىنىڭ توراعاسى ناسىمجان وسپانوۆا ايتتى.
«مەملەكەتتىڭ باسىم مىندەتى – بالالاردى كوشەدەگى, ۇيدەگى جانە مەكتەپتەگى قاۋىپتى جاعدايلاردان قورعاۋ. سوندىقتان بالالار وبەكتىلەرىندە بۇرىن-سوڭدى بولماعان كەشەندى قاۋىپسىزدىك شارالارى جۇزەگە اسىرىلۋدا. مەملەكەتتىك ءبىلىم بەرۋ ۇيىمدارىنىڭ 100%-ى قاۋىپسىزدىك جۇيەلەرىمەن قامتاماسىز ەتىلىپ, جبو-عا قوسىلدى, ليتسەنزيالانعان كۇزەت قويىلىپ, دابىل تۇيمەلەرى ورناتىلدى», – دەدى سپيكەر.