ەلىمىزدە زيراتتارعا دەيىن تسيفرلانىپ, ارنايى قوسىمشاعا بىرىكتىرىلمەك, دەپ حابارلايدى astana-akshamy.kz
وسىلايشا مارقۇمداردىڭ جەرلەنگەن جەرىن ءبىلۋ وڭايلاي تۇسپەك.
تسيفرلاندىرۋ مۇمكىندىگى ءار سالادا كەڭىنەن قولدانىلىپ جاتقانى ءمالىم. ەندى مۇنداي جاڭاشىلدىقتار ومىردەن وتكەن ادامدى جەرلەۋ, ءبىراز ۋاقىت بۇرىن قايتىس بولعان ادامنىڭ جاتقان جەرىن انىقتاۋ باعىتىندا دا قولدانىلماق.
قازاقستان مۇسىلماندار ءدىني باسقارماسىنا قاراستى «قامقور-شاراپات» سالتتىق قىزمەت كورسەتۋ ورتالىعى «زيراتتاردى تسيفرلاندىرۋ» جوباسىن قولعا الىپ وتىر. سوعان سايكەس, الدىمەن رەسپۋبليكالىق ماڭىزى بار ءۇش قالا مەن وبلىس ورتالىقتارى, كەيىن اۋىل-ايماق ماڭىنداعى زيراتتاردىڭ بارلىعى تسيفرلاندىرىلماق. بۇگىندە بۇل باعىتتاعى جۇمىس استانا جانە شىمكەنت قالالارىندا تولىعىمەن اياقتالدى. ەندىگى رەتتە ماماندار پاۆلودار قالاسىنىڭ جانىنداعى قابىرستانداردى ەلەكتروندى جۇيەگە ەنگىزۋگە كىرىستى. بۇل باعىتتاعى جۇمىتى جىل سوڭىنا دەيىن اياقتاۋ جوسپارلانىپ وتىر. ال كەلەسى جىلى وبلىسقا قاراستى اۋدان-اۋىلدارداعى جەرلەۋ ورىندارىن تسيفرلاندىرۋ قولعا الىنادى.
«قامقور-شاراپات» ورتالىعىنىڭ باسشىسى مەيرامبەك قابىلبەكۇلىنىڭ ايتۋىنشا, جاۋاپتى قىزمەتكەرلەر مارقۇمداردىڭ اتى-ءجونى جازىلعان بەلگىتاستاردى, تاقتاي اعاشتاردى سۋرەتكە ءتۇسىرىپ, ارنايى قوسىمشاعا جولدايدى. بۇل مالىمەتتەردىڭ بارلىعى ارنايى ورتاق بازاعا تۇسەدى. بۇرىندارى جەرلەنگەن, بەيىت باسىندا بەلگىسى جوق ادامدارعا قاتىستى مالىمەتتەر شىراقشىلار, مارقۇمداردىڭ تۋىستارى مەن ۇرپاقتارىنان جينالادى. سودان كەيىن ولاردىڭ باسىنا ارنايى بەلگىتاس قويادى.
«باستى ماقسات – تىڭ تەحنولوگيالاردىڭ كومەگىمەن ومىردەن وتكەن ادامدارعا قاتىستى مالىمەتتەردى جيناۋ. وسى باعىتتا «ۋاقىپ» قوعامدىق قورىنىڭ, ءىت سالاسى ماماندارىنىڭ كومەگىمەن تسيفرلاندىرۋ جوباسىن دايىندادىق. جىل سوڭىنا قاراي بۇل پلاتفورما ىسكە قوسىلعان كەزدە ادامدار قانداي دا ءبىر مارقۇمنىڭ قايدا جەردە جەرلەنگەنىن, وعان قاتىستى وزگە دە قىسقاشا مالىمەتتى كەز كەلگەن ۋاقىتتا, الەمنىڭ كەز كەلگەن جەرىنەن قاراي الادى.
سونىمەن قاتار, «جەرلەۋ» ءموبيلدى قوسىمشاسىندا دۇنيەدەن وتكەن ادامدى جەرلەۋگە قاتىستى قىزمەتتەر كورسەتىلەتىن بولادى. سول تۇستا مارقۇمنىڭ تۋىس-تۋعاندارى قاي قورىمدا قانداي ورىن بارىن ءبىلىپ, تاڭداي الادى. ءار ءوڭىردىڭ ەرەكشەلىگىنە بايلانىستى جەردى قازۋ جانە جەرلەۋ قىزمەتتەرىنىڭ ءتاريفى دە كورسەتىلەدى. بۇل ءبىر جاعىنان ىسىراپشىلىقتىڭ الدىن الۋعا باعىتتالسا, ەكىنشىدەن ءدىني راسىمدەردى ءتارتىپ اياسىندا جۇرگىزۋدى رەتتەيدى.
پاۆلودار وبلىسى بويىنشا وكىل يمام جولداس قاجى قوسپاقۇلىنىڭ سوزىنشە, وبلىس ورتالىعى مەن اقسۋ قالاسىنا قاراستى 19 زيرات ەلەكتروندى كارتانىڭ تىزىمىنە كىرەدى. مۇنداعى ەڭ العاش اشىلعان جانە ەڭ ۇلكەن مويىلدى اۋىلىنىڭ قاسىنداعى زيرات ەلەكتروندى جۇيەگە اۋىسادى. مۇندا 1960 جىلدان بەرى ادامدار جەرلەنىپ كەلەدى.
قازىرگى ۋاقىتتا زيراتتىڭ كولەمى 63 گەكتاردى قۇرايدى.
