قازاقستانداعى قىلمىس جاسالمايتىن ەلدى مەكەندەر بار

جامبىل وبلىسى سارىسۋ اۋدانىنىڭ جاڭاارىق اۋىلدىق وكرۋگى ەڭ ۇلگىلى اۋىل اتاعىنا ۇمىتكەر. مۇندا سوڭعى 4 جىلدا بىردە-ءبىر قىلمىس تىركەلمەگەن. اۋىلدىق وكرۋگكە اقتوعاي جانە ۇزاقباي سىزدىقباەۆ اۋىلدارى كىرەدى, وندا 1700-گە جۋىق ادام تۇرادى.

وكرۋگتەگى ءۇش دۇكەندە الكوگول مەن تەمەكى ساتىلمايدى. جاقىندا ءتورتىنشى دۇكەن اشىلادى, بىراق ول كاسىپكەر دە اۋىل تۇرعىندارىنىڭ باستاماسىن بىردەن قولداعان. مۇنداي شەشىمدى تۇرعىندار ۇرپاقتى ازعىرماۋ ءۇشىن اقىلداسا وتىرىپ قابىلداعان.

ناتيجە بىردەن بايقالا باستادى. بۇل باستاما قىلمىس پەن قۇقىق بۇزۋشىلىقتاردىڭ, سونداي-اق وتباسىلىق جانجالداردىڭ الدىن الادى. بىراق بۇل جەردە ۋچاسكەلىك پوليتسيا ينسپەكتورىنىڭ قۇقىق بۇزۋشىلىقتىڭ الدىن الۋ بويىنشا جۇيەلى جۇمىسى دا ماڭىزدى ءرول اتقارادى. ۋچاسكەلىك ينسپەكتور ساعىنعالي سالاماتوۆ 5 جىلدان بەرى سىزدىقباەۆ اۋىلىندا تۇرادى. ول ءوز اۋماعىنداعى احۋالدى تولىق مەڭگەرۋ ءۇشىن جۇيەلى شارالار قولدانادى: رەيدتەر جۇرگىزىپ, پوليتسيادا ەسەپتە تۇرعان ادامداردى تۇرعىلىقتى جەرى بويىنشا تەكسەرەدى, ازاماتتىق قارۋ يەلەرىنىڭ ەرەجەلەردى ساقتاۋىنا تەكسەرۋلەر جۇرگىزەدى.

جامبىل وبلىسىندا وسىنداي ۇلگىلى باسقا دا اۋىلدار بار. بەس اۋداندا 12 اۋىلدىق وكرۋگ الكوگولدەن باس تارتقان. ناتيجە بارلىق جەردە بىردەي: ولار ەڭ قاۋىپسىز اۋىلدار دەپ تانىلدى. بۇل جۇمىستا اۋىل تۇرعىندارىنىڭ داۋلى ماسەلەلەرىن شەشۋگە كومەكتەسىپ, بارلىعىن بەيبىتشىلىك پەن كەلىسىمگە شاقىراتىن اۋىل اقساقالدارىنا ۇلكەن ءرول بەرىلەدى.