نيۋ-يوركتە قازاقستاندىق ۇلتتىق ساياباقتار مەن تابيعاتقا ۇقىپتى قاراۋعا باعىتتالعان جوبالارعا ارنالعان «Winds of Change» يممەرسيۆتى كورمەسى ءوتتى. كورمە مانحەتتەندەگى (نيۋ-يورك, اقش) The Canvas 3.0 گالەرەياسى مەن دۇكەنىندە Qazaq National Parks قولداۋىمەن ۇيىمداستىرىلدى, دەپ حابارلايدى astana-akshamy.kz.
قازاقستان رەسپۋبليكاسىنىڭ تۋريزم جانە سپورت ۆيتسە-ءمينيسترى ەرجان ەركىنباەۆ: «قازاقستان ارقاشان تابيعي مۇراسى مول جانە قورشاعان ورتاعا قۇرمەتپەن قارايتىن ەل بولعان جانە بولادى. «Winds of Change» كورمەسى – بۇل ءبىزدىڭ ۇلتتىق ساياباقتارىمىزدىڭ سۇلۋلىعىن كورسەتۋ عانا ەمەس, سونىمەن قاتار ءىس-ارەكەتكە شاقىرۋ. ءبىز كۇش بىرىكتىرۋ ارقىلى بولاشاق ۇرپاق ءۇشىن تابيعي مۇرانى ساقتاپ, جاھاندىق ەكولوگيالىق وزگەرىستەرگە ۇلەس قوسا الامىز دەپ سەنەمىز», – دەپ اتاپ ءوتتى.
«Winds of Change» كورمەسى امەريكاندىق كەلۋشىلەردى قازاقستاندىق ۇلتتىق تابيعي ساياباقتارمەن بىرەگەي كرەاتيۆتى جوبالار ارقىلى تانىستىرادى:
• «ىلە-الاتاۋ تاريحى» كىتابى — اتتاس ۇلتتىق ساياباقپەن بايلانىستى ادامداردىڭ اڭگىمەلەرى. كىتاپتىڭ باستى كەيىپكەرلەرى – ءوز ءومىرىن تابيعاتپەن بايلانىستىرعان ناقتى ادامدار: عالىمدار, زوولوگتار, بوتانيكتەر, ارحەولوگتار, گلياتسيولوگتار, استرونومدار, ورمانشىلار مەن اڭشىلار, الپينيستەر, تۋريستەر مەن ەرىكتىلەر, ولاردىڭ ارقايسىسى وقىرمانمەن ءوز ءومىرىن ىلە-الاتاۋ تابيعي پاركىمەن بايلانىستىراتىن وزىندىك, ەرەكشە تاريحىمەن بولىسەدى.
• «ادام-تابيعات» جوباسى — لەند-ارت ينستاللياتسياسى, قازىرگى ادام تابيعاتتىڭ ءبىر بولىگى بولىپ قالا ما دەگەن سۇراقتى زەرتتەيتىن جوبا. قىسقارتىلعان, بىراق وتە سيمۆولدىق «تج» دەگەن اتاۋمەن دە بەلگىلى جوبا ءبىر كەزدەرى ايۋساي شاتقالىندا تۋريستەر قالدىرعان قوقىسپەن تاۋلاردىڭ بىتەلۋىنىڭ وزەكتى ماسەلەسىن كوتەرەدى. «تج» – الماتى تاۋلارىنداعى Wild Nature Volunteers ەرىكتىلەردىڭ قوعامدىق سەنبىلىكتەر كەزىندە تاپقان ۆينتاجدى قوقىستارعا (20-70 جاس ارالىعىنداعى) ارنالعان كورمە.
• The ROOTS — بۇل ينستاللياتسيا تيانشان شىرشاسىنىڭ زاقىمدالعان تامىرلارىن لەند-ارت تۇرىندە جانداندىرادى. ادامنىڭ قولىنداعى نازىك تابيعاتتىڭ ءۇش بەينەسى ادام مەن تابيعات اراسىنداعى ۇيلەسىمدىلىكتىڭ ماڭىزدىلىعىن كورسەتەدى.
Qazaq National Parks كرەاتيۆتى ديرەكتورى دينارا گۋجاۆينا: «Qazaq National Parks التىن-ەمەل, شارىن جانە ىلە-الاتاۋ ۇلتتىق پاركتەرىندە ەكولوگيالىق تۋريزم مەن تۋريستىك ينفراقۇرىلىمدى دامىتۋدا. ءبىز قوعامداعى تابيعاتقا ۇقىپتى جانە جاۋاپكەرشىلىكپەن قاراۋ يدەيالارىن دامىتۋعا ۇمتىلامىز».
كورمە كۋراتورى نارگيز ماگاەۆانىڭ پىكىرىنشە: «قازاقستاندىق ۇلتتىق ساياباقتار – بۇل جۋساننىڭ ءيىسى, ءشولدى جەلدىڭ سىبدىرى جانە تاۋلى اڭعارلاردىڭ گۇلدەنگەن القاپتارى. «Winds of Change» كورمەسى تابيعاتپەن بايلانىستا بولعان ءاربىر ادامنىڭ ىشكى الەمىن وزگەرتەتىن جوبالار جاساۋعا شابىتتاندىرادى».
كورمەگە كەلۋشىلەر شارىن, التىن-ەمەل جانە ىلە-الاتاۋ ۇلتتىق پاركتەرىنە ارنالعان Qazaq National Park ونىمدەرىن ساتىپ الدى.
