وزبەكستاندا جاھاندىق جاستار فەستيۆالى ءوتىپ جاتىر. حالىقارالىق كەزدەسۋدە 150 ەلدەن 1000-عا جۋىق جاس عالىم, ونەر, كرەاتيۆتى يندۋستريا جانە ەكولوگيا سالاسىنىڭ وكىلدەرى, كاسىپكەرلەر جينالدى, دەپ حابارلايدى astana-akshamy.kz.
«جاھاندىق جاستار فەستيۆالى ىنتىماقتاستىعىمىزدى دامىتۋدا جانە ەلدەرىمىزدىڭ جاستارى اراسىنداعى دوستىق بايلانىستاردى نىعايتۋدا ماڭىزدى كەزەڭ سانالادى. بۇل بەيبىتشىلىكتى, تۇراقتىلىقتى پەن ورنىقتى دامۋدى ىلگەرىلەتۋگە باعىتتالعان بىرلەسكەن باستامالاردى ازىرلەۋگە ارنالعان بىرەگەي الاڭ», – دەپ اتاپ ءوتتى فەستيۆالدىڭ اشىلۋىندا قر مام جاستار جانە وتباسى ىستەرى كوميتەتى توراعاسىنىڭ ورىنباسارى ءبىرجان ءالىمجانوۆ.
فەستيۆال وزبەكستاننىڭ بۇحارا, سامارقاند, جيزاق, حيۋا جانە تاشكەنت سياقتى بەس تاريحي ورىنىندا وتەدى. اۋقىمدى باعدارلامادا جاستار فورۋمى, مانەرلەپ وقۋ, ۋنيۆەرسيتەت كورمەسى, فوتوگالەرەيا, مادەني شەرۋلەر, سپورتتىق تۋرنيرلەر, كتا ويىنى جوسپارلانعان. فەستيۆال اياسىندا تمد ەلدەرى كاسىپكەرلەرىنىڭ قاتىسۋىمەن عىلىمي-پراكتيكالىق كونفەرەنتسيا مەن بيزنەس-مارافون وتەدى. جابىلۋ سالتاناتى 30 ماۋسىمدا تاشكەنتتە بولادى.
