باس قالا تورىندە «قاجىمۇقان جولى» اتتى ۇلتتىق جارىس ۇيىمداستىرىلدى. كۇش اتاسى – قاجىمۇقاننىڭ شەبەرلىگى مەن ەرلىگىن ونەگە تۇتقان سايىپقىران جىگىتتەر سايىسقا ءتۇستى. سالاۋاتتى ءومىر سالتى مەن سپورتتىڭ قۇندىلىعىن ناسيحاتتاعان ءىس-شارا كوپشىلىكتىڭ كوڭىلىنەن شىقتى.
ەلوردا تورىندەگى QAZAQSTAN جەڭىل اتلەتيكا سپورت كەشەنىندە «قاجىمۇقان جولى» اتتى ۇلتتىق ءتۋرنيرى ءوتتى. ءىس-شاراعا استانا قالاسى اكىمىنىڭ ورىنباسارى ەسەت بايكەن, قالالىق دەنە شىنىقتىرۋ جانە سپورت باسقارماسىنىڭ باسشىسى سامات جىلقىباەۆ, قازاقستان سپورتشىلار وداعىنىڭ توراعاسى ازامات قارلىعاشەۆ جانە بوكستان قر مەملەكەتتىك جاتتىقتىرۋشىسى مەرەي اقشالوۆ, شورت-ترەكتەن حالىقارالىق دارەجەدەگى سپورت شەبەرى ابزال اجىعاليەۆ قاتىستى.
باسقارما باسشىسى ءوز سوزىندە بۇل جارىس قاجىمۇقان, بالۋان شولاقتاردىڭ جولىن جالعاعان, حالىق اراسىندا كەڭىنەن ناسيحاتتالىپ تانىمال بولعاندىعىن ايرىقشا اتاپ ءوتتى.
ايتۋلى جوبانىڭ اۆتورى جانە باستاماشىسى اتاقتى پالۋان جانە گيننەستىڭ رەكوردتار كىتابىنىڭ رەكوردشىسى سەرگەي تسىرۋلنيكوۆ شارا بارىسىندا بولات تەمىردى مايىستىرىپ, جينالعان جۇرتشىلىقتى تاڭداي قاقتىردى.
سايدىڭ تاسىنداي 8 باتىر سايىستىڭ 5 ءتۇرى بويىنشا ياعني, 60, 70, 80, 90 كەلىلىك قاپشىقتى جىلدامدىققا كوتەرۋ, 1 مينۋتتا 140 كەلىلىك تاستى بيىكتىگى 1 مەترلىك تۋمبانىڭ ۇستىنە مەيلىنشە كوپ قويۋ, تەمىر تاعا پىشىندەس رەتىندە جىلدام مايىستىرۋ, 100 كەلىدەن اساتىن توماردى يىققا سالىپ كوتەرۋ, بەلدەسۋدە سىنعا ءتۇستى.
جارىس قورىتىندىسى بويىنشا, چەمپيوندىق اتاق بولات احمەتوۆكە, كۇمىس جۇلدە ومىربەك اقەدىلگە, قولا جۇلدە تىلەگەن گابدۋلينگە بۇيىرىپ, ولار ارنايى ۇلتتىق ءداستۇرىمىزدىڭ بۇيىمدارىمەن, ديپلوممەن ماراپاتتالدى.
قانات بايۇزاقوۆ
