قالانى الداعى ۋاقىتتا جىلۋمەن جانە اۋىزسۋمەن قامتاماسىز ەتۋ ءۇشىن جۇمىس ىستەپ تۇرعان نىسانداردىڭ قۋاتىن ارتتىرۋ جانە جاڭا نىساندار سالۋ باعىتىندا جۇيەلى جۇمىس جۇرگىزىلەدى. جاقىندا ينفراقۇرىلىمدىق نىسانداردى ارالاپ, جۇمىس بارىسىمەن تانىسقان استانا اكىمى جەڭىس قاسىمبەك وسىنداي مالىمدەمە جاسادى.
«قالانى جىلۋمەن جانە سۋمەن قامتاماسىز ەتەتىن ينفراقۇرىلىم نىساندارىنىڭ جۇمىس بارىسىمەن تانىستىم. ولاردىڭ قاتارىندا №2, 3 جىلۋ-ەلەكتر ورتالىقتارى (جەو), №3 اۋىزسۋ سورۋ-ءسۇزۋ ستانتسياسى, «تۇران» جانە «وڭتۇستىك-شىعىس» گاز-جىلۋ ستانتسيالارى بار. وتكەن جىلدىڭ كۇزىندە ءبىز «وڭتۇستىك-شىعىس» گاز جىلۋ ستانتسياسىن, «تۇران» گاز جىلۋ ستانتسياسىنىڭ ءبىرىنشى كەزەڭىن, قۇرىلىسى ۇزاققا سوزىلعان № 3 جىلۋ-ەلەكتر ورتالىعىن سالىپ ءبىتىرىپ, ىسكە قوسقانىمىزدى جاقسى بىلەسىزدەر. بۇل نىساندار قالاعا 1100 ساع/گكال-دان استام جىلۋ بەرۋگە جول اشىپ, بىزگە جىلىتۋ ماۋسىمىندا پروفيتسيتكە شىعۋعا مۇمكىندىك بەرەدى» دەپ جازدى قالا باسشىسى الەۋمەتتىك جەلىدەگى پاراقشاسىندا.
بۇدان بولەك, جەڭىس قاسىمبەك وتكەن جىلدىڭ جازىندا استانا سۋ قويماسىنان قالاعا سۋ قۇبىرى تارتىلىپ, №3 اۋىزسۋ سورۋ-ءسۇزۋ ستانتسياسى سالىنعانىن تىلگە تيەك ەتتى. «جوعارىدا اتالعان نىسانداردىڭ ءبارى شتاتتىق رەجيمدە جۇمىس ىستەيدى. قالانى الداعى ۋاقىتتا جىلۋمەن جانە اۋىزسۋمەن قامتاماسىز ەتۋ ءۇشىن جۇمىس ىستەپ تۇرعان نىسانداردىڭ قۋاتىن ارتتىرۋ جانە جاڭا نىساندار سالۋ باعىتىندا جۇيەلى جۇمىس جۇرگىزىلەدى. ماسەلەن, بيىل تاعى ءبىر «تەلمان» گاز جىلۋ ستانتسياسىن (1-كەزەك), «تۇران» گاز-جىلۋ ستانتسياسىنىڭ ەكىنشى كەزەگىن سالامىز. ولار قالاعا تاعى 850 گكال/ساع جىلۋ قۋاتىن بەرەدى. ەلوردانى كەلەشەكتە اۋىزسۋمەن تولىقتاي قامتاماسىز ەتۋ ءۇشىن قازىر سۋ قۇبىرىنىڭ ەكىنشى جەلىسىن سالۋ جۇمىسى جۇرگىزىلىپ جاتىر. نۇرا جەراستى سۋ كوزىنەن سۋ قۇبىرىن جوبالاۋ جانە تەلمان سورعى ستانتسياسىن كەڭەيتۋدى جوبالاۋ جۇمىسى اياقتالىپ كەلەدى» دەپ جازدى قالا اكىمى.
