استاناداعى يۋنۋس ەمرە تۇرىك مادەنيەت ورتالىعى عيماراتىندا قوجا احمەت ياسساۋي كىتاپحاناسى اشىلۋ ءراسىمى بولدى. ورتالىقتىڭ عيماراتىندا وتكەن كىتاپحانانىڭ تۇساۋكەسەرگە زيالى قاۋىم وكىلدەرى, قازاقستاننىڭ تۇركياداعى توتەنشە جانە وكىلەتتى ەلشىسى مۋستافا كاپۋدجۋ, قازاقستان پارلامەنتىنىڭ دەپۋتاتى ابزال قۇسپان, قر ۇلتتىق اكادەميالىق كىتاپحاناسىنىڭ ديرەكتورى عازيزا قۇدايبەرگەنوۆا, حالىقارالىق تۇركى اكادەمياسىنىڭ ۆيتسە- پرەزيدەنتى اسحات كەسىكباەۆ, ستۋدەنتتەر, قازاقستاندىق جانە تۇركيالىق باق وكىلدەرى قاتىستى.
اشىلۋ راسىمىندە ءسوز سويلەگەن تۇركيانىڭ قازاقستانداعى توتەنشە جانە وكىلەتتى ەلشىسى مۋستافا كاپۋدجۋ «نۋرفەر تەرجان مەن تانسەل تەرجاننىڭ يۋنۋس ەمرە تۇرىك مادەنيەت ورتالىعى كىتاپحاناسىنا كورسەتكەن قولداۋى- وتە قۇندى باستاما. وسى ورايدا, كىتاپحانانىڭ جابدىقتالىپ, وقىرماننىڭ قىزمەت بەرىلۋىنە قوسقان ۇلەستەرى ءۇشىن العىس ايتامىن. قۇتتى بولسىن دەي وتىرىپ, كىتاپحانانى جاستار مەن ستۋدەنتتەر پايدالانىپ, قازاقستان مەن تۇركيا اراسىنداعى قارىم -قاتىناستارعا كوپىر بولادى دەگەن سەنىمدەمىن» دەدى.
پارلامەنت دەپۋتاتى ابزال قۇسپان كىتاپحانانىڭ تۇساۋكەسەرىنە قاتىستى: «قازاقتا ءتۇبى ءبىر تۇركى ەلى» دەگەن جاقسى ءسوز بار. بۇل ءوزى قىسقا ءسوز بولعانىمەن ءمانى- ماڭىزى وتە كەڭ, وتە جوعارى. ورتالىقتا اشىلعان كىتاپحاناعا ەسىمى بەرىلىپ جاتقان قوجا احمەت ياسساۋي بابامىزدى تەك قانا قازاقتىڭ ابىزى, تەك قانا قازاقتىڭ اۋليەسى دەمەيمىز, ول جالپى تۇركى حالقىنا ورتاق تۇلعا دەپ بىلەمىز. وسى ورايدا, بىرلىگىمىزدى, ىنتىماعىمىزدى كورسەتىپ جاتقان بۇگىنگىدەي شارالاردىڭ كوپ بولعانىنا تىلەكتەسپىن. تۇركى الەمى بىرىگۋ ساتىسىندا, بۇرىن دا قۇرىلعان تۇركى ەلدەرىنىڭ حالىقارالىق ۇيىمدارىنا قوسا, جاقىندا تۇركى ينۆەستيتسيالىق قورىن ماجىلىستە راتيفيكاتسيادان وتكىزدىك».
استانا يۋنۋس ەمرە تۇرىك مادەنيەت ورتالىعى ديرەكتورىنىڭ مىندەتىن اتقارۋشى الماگۇل يسينا كىتاپحانانىڭ اشىلۋ راسىمىندە ءوز ويىن بولىسكەن ەدى:
-كىتاپحانا بۇگىنگە دەيىن كىتاپتى ۇيگە بەرەتىن ابونەمەنتتىك تاسىلمەن جۇمىس ىستەپ كەلگەن ەدى. وقىرماندار, ورتالىقتىڭ وقۋشىلارى, ەۇۋ مەن نازارباەۆ ۋنيۆەرسيتەتتەرىنىڭ تۇرىكشە بولىمدەرىندە ءبىلىم الىپ جاتقان ستۋدەنتتەر, ماگيسترانت, دوكتورانتتار, جالپى كىتاپسۇيەر قاۋىم وقۋ زالىنىڭ اشىلۋى جونىندە تالاپتارىن جەتكىزەتىن ەدى. استانادا تۇراتىن تۇركيا ازاماتى نۋرفەر تەردجان وقۋ زالىنا قاتىستى وسى تالاپتى ورىنداۋ ماقساتىمەن استانادا قىزمەت اتقاراتىن جولداسى تانسەل تەردجانمەن بىرگە ءوز مۇمكىندىكتەرىمەن كىتاپحانانى قايتادان جابدىقتاپ, وقۋ زالى رەتىندە قىزمەتكە اشۋدى ۇسىندى. تەردجان جۇبىنىڭ قولداۋىنىڭ ارقاسىندا وقۋ زالى قاجەتتى بارلىق جابدىقتارمەن قامتاماسىز ەتىلدى, قوسىمشا كىتاپتار الىندى, -دەدى ول.
جالپى يۋنۋس ەمرە اتىنداعى تۇرىك مادەنيەت ورتالىعى ەكى باۋىرلاس ەل اراسىنداعى مادەني بايلانىس اياسىن كەڭەيتۋ ماقساتىندا 2010 جىلى استانادا اشىلعان. ءتۇبى ءبىر, تىلەگى ءبىر ەكى ەلدىڭ حالقىنىڭ ءبىر–بىرىن جاقىننان تاني تۇسۋىنە وزىندىك ۇلەس قوسۋ ماقساتىندا ءتۇرلى مادەني شارالار كورمەلەر, كونتسەرتتەر, قول ونەر ۇيىرمەلەرى, كونفەرەنتسيالار ۇيىمداستىرىلىپ تۇرادى. سونداي –اق, ورتالىقتىڭ عيماراتىندا ءتىل ۇيرەنۋشىلەرگە, قالا تۇرعىندارىنا قىزمەت كورسەتۋ ماقساتىندا قوجا احمەت ياسساۋي بابامىزدىڭ اتى بەرىلگەن كىتاپحانا اشىلعان. كىتاپحانا قورىندا ءتۇرلى تاقىرىپتاردى قامتيتىن 3000 –نان استام تۇرىكشە, قازاقشا, اعىلشىنشا, ورىسشا كىتاپتار, ەنتسيكلوپەديالار, سيرەك كەزدەسەتىن سوزدىكتەر, روماندار, اكادەميالىق ەڭبەكتەر, بالالارعا ارنالعان كىتاپتار بار.
