الەمدەگى ەڭ ەڭبەكقور تىرشىلىك يەلەرى – قۇمىرسقالار تۋرالى قانشاما جازۋشى رومان, پوۆەست جازدى, قانشاما عالىم عىلىمي ەڭبەكتەرىنە ارقاۋ ەتتى دەسەڭشى! «ولاردىڭ تارتىپكە باعىنا بىلۋشىلىگى – كەز كەلگەن ديكتاتوردىڭ ارمانى! ولاردىڭ اقىل-ويىنا تەك قىزىعۋعا عانا بولادى! ولار – قۇمىرسقالار! جانە ولار ءبىزدىڭ ارامىزدا تۇرادى. نەمەسە ءبىز سولاردىڭ اراسىندا تۇراتىن شىعارمىز؟» دەپ جازدى بەرنارد ۆەربەر ءوزىنىڭ اتاقتى «قۇمىرسقالار» تريلوگياسىندا. استانادا وسى تىرشىلىك يەسىن زەرتتەپ, قۇمىرسقانى ءۇي جاعدايىندا وسىرگەن وقۋشى بارىن ەستىگەندە ءتىپتى تاڭعالعانىمىز راس.
قازىرگى ۋاقىتتا «ەرەكشە» بالانى قوعاممەن بىرىكتىرۋگە جانە الەۋمەتتەندىرۋگە, ونىڭ جەكە باسىنىڭ شىعارماشىلىق رەسۋرسىن اشۋعا ىقپال ەتۋگە جانە قولداۋعا مۇمكىندىك مول. بۇگىنگى تاڭدا ەرەكشە ءبىلىم بەرۋ قاجەتتىلىگى بار بالالارعا مەملەكەت كوپ كوڭىل بولۋدە.
اسىلجان رايىمبەكقىزى – ءبىلىم الۋدا ەرەكشە قاجەتتىلىگى بار وقۋشىنىڭ ءبىرى. استاناداعى №38 مەكتەپ-ليتسەيدىڭ 5-سىنىپ وقۋشىسى. ساباق ۇلگەرىمى, ىنتاسى وتە جاقسى, زامانداس قۇربىلارىنان قالىسپاي جاقسى ساباق وقىپ ءجۇر, اينالاسىنىڭ كوزقۋانىشىنا اينالعان بالاپان.
ارينە, ساۋ تۋعان ءسابيدىڭ اياقاستىنان اۋرۋى اناسى ءۇشىن اسپاننان جاي تۇسكەنمەن بىردەي بولعانى راس. بىراق قىسىلتاياڭ جاعداياتقا تاپ بولعان سوڭ, اسىلجاننىڭ اناسى تىرەنەتىن سۇيەنىش ىزدەپ, بالالارىنىڭ كەلەڭسىز جاعدايىن ەڭسەرۋگە ۇمتىلىپ, العا قاراي ادىمدايدى, جاي عانا ادىمداماي, جەڭىستى جولدارعا قاراي جەتەكتەيدى. ەرەكشە بالا تاربيەلەپ وتىرعان اسىلجاننىڭ اناسى نازگۇل ءامىرجانوۆا بالاسى تۋرالى بىلاي دەيدى.
– انا رەتىندەگى باستى پارىزىم – بالا تاربيەسىن تاسادا قالدىرماي, قىزىمدى تاعدىر تالكەگىنەن قۇتقارۋ, جانىنا جىلۋ, جۇرەگىنە شۋاق, كەلەشەگىنە قانات ءبىتىرۋ. اسىلجان – تۇلا بويى تۇڭعىشىم, جارىق دۇنيە ەسىگىن اشقاندا مۇمكىندىگى شەكتەۋلى بولمادى. كوز الدىمىزدا قۇلدىراڭداپ وسكەن قارشاداي قىز ەندى عانا مەكتەپ تابالدىرىعىن قاتارلاستارىمەن قول ۇستاسا اتتاپ, ءارىپ تانۋدى ارمانداپ جۇرگەندە سۋىق ءتيىپ اۋىرىپ قالدى. دەنە قىزۋى قاتتى كوتەرىلگەنى سونشالىق, ەكى اياعى مەن سول قولى سال بولىپ, قيمىلعا كەلمەدى. دارىگەرلەر ونىڭ سەبەبىن بالانىڭ پوليومەليتكە قارسى يممۋنداۋدان ۋاقىتىندا وتپەگەنىمەن بايلانىستىرعان. وسىلايشا, كوپتەن كۇتكەن تۇڭعىشىمىزدىڭ دەرتىنە ءوزىمىزدى كىنالادىق, اۋىرتپاشىلىققا تولى كەزەڭدەردى باستان وتكەرىپ, قىزىمدى ارقالاپ ءجۇرىپ اۋرۋحانادان اۋرۋحاناعا قاراتتىم. سونىڭ ارقاسىندا قيمىلسىز قالعان اسىلجانىڭ قولى قالپىنا كەلىپ, اياعىنا جان كىردى. سولاي ەركىن قوزعالا الماي, بالداققا تاۋەلدى بولعانمەن, ول قۇرداستارىنان قالماي مەكتەپتى ءوزى بارىپ ءجۇرىپ وقىپ, ءبىلىمىن جەتىلدىردى. اسىلجاننىڭ قارىم-قابىلەتىنىڭ تولىق اشىلۋىنا مۇمكىندىك جاسايمىن, زور جاۋاپكەرشىلىكپەن قارايمىن. ونىڭ قىزىعۋشىلىقتارىنا باسىمدىق بەرەمىن. ماسەلەن, سۋرەت سالعاندى جاقسى كورگەن كەزى بولدى, سۋرەت ۇيىرمەلەرىنە اپاردىم, جۇزۋگە دە قابىلەتتى, باسسەينگە بارۋ كۇن تارتىبىمىزدەن قالىس قالعان ەمەس, – دەيدى اناسى نازگۇل تۇرىسبەكقىزى.
– اسىلجان – دارىندى شاكىرت, مەكتەپ ماقتانىشى. تاعدىر تەڭىزى قانشاما رەت داۋىلداردا شايقاسا دا, جاعالاۋدان تال قارماماي, اعىسقا, تولقىنعا قارسى ءجۇزدى, العا ۇمتىلدى. ءبىلىم الاماندارىندا كىل جۇيرىكتەن شىن جۇيرىك انىقتالادى دەمەكشى, شەكتەۋلى مۇمكىندىگىنە قاراماستان توپ جاردى, قايسارلىق تانىتتى. 2022 جىلى «زەردە» رەسپۋبليكالىق زەرتتەۋ جۇمىستارى مەن شىعارماشىلىق جوبالار كونكۋرسىندا اۋداندىق, وبلىستىق كەزەڭدەردە ءى ورىندى يەلەنىپ, رەسپۋبليكالىق جارىستا ءىىى ورىننىڭ تۇعىرىنان كورىندى. ناتيجەسىندە ەتكەن ەڭبەگى اقتالىپ, ماداقتامادان بولەك, «بالداۋرەن» رەسپۋبليكالىق وقۋ-ساۋىقتىرۋ ورتالىعىنا جولداما الدى. مەكتەپتە رەيتينگى اسقاقتاپ, «جىل وقۋشىسى-2023» اتاعىنا يە بولدى, – دەيدى №38 مەكتەپ-ليتسەيى ديرەكتورىنىڭ بەيىندىك وقىتۋ جونىندەگى ورىنباسارى قامار بىرلەسوۆا.
اسىلجاننىڭ قۇمىرسقالارعا قاتىستى عىلىمي جوباعا كەلۋىنە ونىڭ قورشاعان ورتاعا, دالىرەك ايتساق, قۇمىرسقاعا دەگەن قىزىعۋشىلىعى سەبەپ بولدى. 2021 جىلى اتا-اناسىنان تۋعان كۇنىنە وراي ەرەكشە سىيلىق سۇراپ, «مyرaۆينaيا فەرمa» ساتىپ العانىن قالاعان ەكەن.
– ارينە, باستاپقىدا, اسا ءمان بەرمەدىم. كەيىن اۋىلعا بارعاندا قىزىعۋشىلىعىن بايقادىم, قۇمىرسقالاردىڭ كىرىپ-شىققانىنا ءمان بەرۋى مەنى بەيجاي قالدىرمادى. وسىلايشا, تۋعان كۇنىنە وراي سىيلىق تارتۋ ەتتىم, زەرتتەۋ جۇمىسىمىز دا وسى كەزدەن باستالدى. زەرتتەۋ جۇمىسى بارىسىندا ءبىز قۇمىرسقا تۇرلەرىمەن, قۇرىلىس ەرەكشەلىكتەرىمەن, قوعامدىق ءومىرىن باقىلاپ, زەرتتەدىك. ءبىز قۇمىرسقالاردى ءۇي جاعدايىندا دا باقىلاۋعا بولاتىنىنا كوز جەتكىزدىك. بىرنەشە تاجىريبە وتكىزۋ بارىسىندا قۇمىرسقالاردىڭ مىنەز-قۇلقىن ءبىلىپ, انىقتادىق. قويعان ماقساتىمىزعا جەتتىك, بولاشاقتا باقىلاۋ جۇمىسىن توقتاتپاي عاجايىپ جاندىكتەردى ءارى قاراي زەرتتەۋ جۇمىسىن جۇرگىزۋدى جوسپارلاپ وتىرمىز, – دەيدى اسىلجاننىڭ اناسى نازگۇل ءامىرجانوۆا.
اسىلجاننىڭ اناسىمەن بىرلەسە وتىرىپ جاساعان «مyرaۆينaيا فەرمa ۆ دومaشنيx ۋسلوۆياx» تاقىرىبىندا جۇرگىزگەن عىلىمي جۇمىسى ۇلكەن ناتيجەگە جەتتى. ەرەكشە بالانىڭ جەتكەن ءار جەتىستىگىنىڭ ارتىندا اناسىنىڭ وراسان زور ەڭبەگى, كوز جاسى, ءتوزىمى, اللادان سۇراعان تىلەگى جاتىر.
قۇمىرسقالاردىڭ تىرشىلىگىن الەمدە, ەلىمىزدە اۋقىمدى زەرتتەپ جاتقاندار كوپ. ولاردىڭ ءبارى زەرتتەۋ نىسانىنىڭ كەلەشەكتە عىلىم ءۇشىن وراسان زور جاڭالىقتار اكەلەتىنىنە سەنىمدىمىز. شىنىندا دا, ءالى جۇمباققا تولى قۇمىرسقالار تىرشىلىگىندەگى وزىمىزگە بەلگىلى جاقتاردىڭ وزىنەن الاتىن تاعىلىمىمىز كوپ قوي.
– «بالامنىڭ تابانىنا كىرگەن تىكەن ماڭدايىما قادالسىن» دەيتىن ەلمىز عوي, ءسابيىمىز ءۇشىن الاڭدايمىز, شىبىن جانىمىزدى شۇبەرەككە ءتۇيىپ, تاۋەكەل ەتەمىز. دەگەنمەن بارىنا شۇكىر ەتىپ, ءبىز «ەرەكشە» بالانىڭ باقىتتى اتا- اناسىمىز!, – دەيدى اناسى تەبىرەنە وتىرىپ.
№38 مەكتەپ-ليتسەي ۇجىمى, ۇستازدارى اسىلجاندى, اناسىن ۇنەمى قولدايدى, ولار وقۋشىنىڭ تاۋداي تالابىنا ءدان ريزا, قولىنان كەلگەنشە كومەك بەرۋمەن كەلەدى.
حالىق دانالىعى «اركىمگە شىداي الاتىنداي سىن بەرىلەدى» دەيدى. ەڭ باستىسى, قول جەتكەن ساتكە توقتاپ قالماي, جاقسىلىققا سەنە بىلسەڭ الىنبايتىن قامال جوق. ەندەشە اسىلجان سەكىلدى اياۋلى بالاپاننىڭ اينالاسىنا اناسىنداي, ۇستازدارىنداي, دوستارىنداي جاقسى, مەيىرىمدى جانداردى جىبەردى. الدا اسار اسۋى, بەلەسى بيىك, تۇعىرلى بولعاي!
