ۇلتتىق اكادەميالىق كىتاپحانادا اقىن, بارد, قوعام قايراتكەرى قۋانىش ماقسۇتوۆتىڭ «قۇت» اتتى كىتابىنىڭ تانىستىرىلىمى ءوتتى. باسقوسۋعا ەلوردانىڭ زيالى قاۋىم وكىلدەرى, تانىمال اقىن-جازۋشىلار, جۋرناليستەر جانە وقىرماندار قاتىستى.
اقىندار ايتىسىنداعى باتىل دا شىنشىل قوعامدىق-ساياسي ويلارى ءۇشىن «قازاقتىڭ سارى تەنتەگى» اتانعان اقىن, بارد قۋانىش ماقسۇتوۆتىڭ زاماناۋي جەتىستىكتەرمەن شىققان جاڭا كىتابىنا پوەزياسى, بارد تۋىندىلارىنىڭ, باردتىق, اۆتورلىق اندەرىنىڭ ماتىندەرى جانە كوسەمسوزدەرى توپتاستىرىلعان. وقىرمان «AlphaPrint» باسپاسىنان شىققان كىتاپتا كورسەتىلگەن QR-كود ارقىلى اۆتوردىڭ مۋزىكالىق تۋىندىلارىن تىڭداپ, اقىننىڭ جەكە YouTube ارناسىنداعى اقپاراتتارمەن تانىسا الادى. كىتاپتىڭ ءبىرىنشى بولىمىنە – پوەزيا, ەكىنشى بولىمىنە – بارد تۋىندىلارى, ءۇشىنشى بولىمىنە قالامگەردىڭ وي-تولعامدارى, كوسەمسوزدەرى جيناقتالعان. كىتاپ كوپشىلىك وقىرمانعا ارنالعان.
تانىستىرىلىم بارىسىندا ءسوز تىزگىنىن ۇستاعان قر اباي اتىنداعى مەملەكەتتىك سىيلىقتىڭ يەگەرى, اقىن عالىم جايلىباي, قر مەملەكەتتىك سىيلىعىنىڭ لاۋرەاتى, جازۋشى-باسپاگەر الىبەك اسقاروۆ, الاشتانۋشى عالىم, پروفەسسور ايگۇل ىسماقوۆا, فيلولوگيا عىلىمدارىنىڭ دوكتورى, پروفەسسور امانتاي ءشارىپ, جازۋشى-پۋبليتسيست, مادەنيەت قايراتكەرى قايىربەك سادۋاقاسوۆ جانە باسقالار اۆتوردى جاڭا تۋىندىسىمەن قۇتتىقتاپ, جىلى لەبىزىن جەتكىزدى. قۋانىش ماقسۇتوۆ جۇرتتىڭ الدىندا ءوزىنىڭ «قوتىرتاي» اتتى تاماشا بارد ءانىن ورىنداپ بەردى. جيىننىڭ سوڭىندا اۆتوردىڭ ونەردەگى اعا-ءىنىسى – قر ەڭبەك سىڭىرگەن قايراتكەرى امانتاي جۇماشەۆ پەن ەرلان داكەنوۆ «اقتوعاي ءۆالسىن» شىرقاپ, جيىلعان جۇرتتىڭ كوڭىلىن كوتەردى.
سونداي-اق كەشكە مۋزىكالىق جاس كورەرمەن تەاترىندا قۋانىش ماقسۇتوۆتىڭ «ماڭگىلىك مۇڭنىڭ اۋەنى» اتتى پوەتيكا-مۋزىكا قويىلىمى كورسەتىلدى.
