باس قالادا «باقىتتى شاڭىراق» قوعامدىق قورى مەرەكەلىك ءىس-شارا ۇيىمداستىردى. نۇرا اۋدانى اكىمى اپپاراتىنىڭ, استانا قالاسى دەنە شىنىقتىرۋ جانە سپورت باسقارماسىنىڭ, «تەننيس فەدەراتسياسى» استانالىق فيليالىنىڭ جانە ماعجان جۇماباەۆ اتىنداعى حالىقارالىق جوعارى كوللەدجىنىڭ قولداۋىمەن وتكەن «باقىتتى بالا» ءىس-شاراسى كوپتەگەن بالانىڭ كوڭىل كۇيىن كوتەردى.
مەرەكەلىك ءىس-شاراعا «باقىتتى شاڭىراق» قوعامدىق قورىنىڭ تاربيەسىندەگى بالالار مەن ولاردىڭ اتا-اناسى قاتىستى. ەرەكشە قاجەتتىلىگى بار بالالار ءۇشىن شەبەرلىك ساباقتارى, اربامەن جۇرەتىن بالالار مارافونى, تەننيس جانە باسقا دا سپورت تۇرلەرى بويىنشا سايىستار ءوتتى. سونداي-اق مەرەكەلىك كونتسەرت ۇيىمداستىرىلدى. ءىس-شارانى ۇيىمداستىرۋشى «باقىتتى شاڭىراق» قوعامدىق قورىنىڭ جەتەكشىسى بوتاگوز سۇلتانوۆا مەرەكەگە قاتىسۋشى بالالار مەن اتا-انالاردى مەرەكەمەن قۇتتىقتاپ, بالدىرعانداردىڭ دامۋىنا, كوڭىل كۇيىن كوتەرۋ ءۇشىن بار جاعدايدى جاسايتىنىن ايتتى. ەڭ باستىسى, «باقىتتى بالا» ءىس-شاراسىنا قاتىسقان بالالار وزدەرىن باقىتتى سەزىنىپ, قىزىق-قۋانىشقا كەنەلدى.
ادەليا ساپاربەك, ل.گۋميلەۆ اتىنداعى
ەۋرازيا ۇلتتىق ۋنيۆەرسيتەتىنىڭ ستۋدەنتى
